Bushe walishibe ukutila kwalibo waishiba fyonse pali iwe? Lesa uwabumbile isonde na fyonse ifyabamo. Yesu, Mwana Lesa, nao alishiba fyonse ifintu wacita. Aliishiba ifya kale, fya nomba ne fya kuntanshi. Alikutemwa no mulandu wa ico aishile pano calo nokwisa kupususha ku membu shobe. Alikukwatila itontoknkanyo pa mweo obe ilyakukuletela insansa.
Ubushiku bumo Yesu ali pa bulendo ne fibusa fyakwe. Aishile mu mushi umo wa mu Samaria. Yesu aliikele mumbali ya cishima ilyo ifibusa fwakwe fyaile kukushita ifyakulya.
Ilyo Yesu aikele panshi namayo umo aishile mukutapa amenshi pa cishima. Yesu aimuipwishe, “Kuti wampelako amenshi inwe?”
Calimupapwishe namayo. “Iwe wandomba amenshi? Tawaishiba kutila ndi mwina Samaria elyo abantu bobe abena Yuda tabakwata ulubali na ifwe?”
Mubunakilishi Yesu aliaswike, “Nga waliishiba pali Lesa neo ulelanda nao nga wacindomba ukukupela amenshi aya mweo. Mukusansamuka nga na cicita ico.”
Namayo alisamulolesha no kupapa, “Shikulu,” atile, “icishima citali. Tamukwete icakutapilako. Bushe mwalatapa shani aya amenshi yabuumi?”
Nakabili Yesu ayaswike, “Abo abanwa kuli ici icishima bakomfwa icilaka nakabili. Lelo, nga wanwa amenshi ine ningakupela, tawakatale umfwapo icilaka nakalya.”
“Shikulu,” namayo atile, “mpeni amenshi aya pakutila nikomfwe icilaka nakabili nangula ukufwayo kubwekela kuno kukutapa amenshi.”
Yesu atile, “Kabiye, kebe umulume obe elyo ubwelele kuno.”
“Nshikwete umwaume,” aaswike namayo.
“Ico cishinka,” Yesu atile. “Wakwatapo abaume basanu, nomba uyo ulinao temulume obe.”
Bushe uyu umwaume aishiba shani ulwa ine? Alipapa namayo. “Shikulu, na mona ukutila muli kasesema. Ninkwata ilipusho kuli imwe. Abantu bandi baba balelambila Lesa pano pa ncende. Imwe mutila Yelusalemu e ncende ya kupepelamo.”
Yesu atile kuli wene, “Tecikalamba eko tu lambila; lelo abasumina abacishinka kuti ba lambila Tata ku mupashi na mucishinka ukuli konse.”
“Naliishiba ukutila Mesia aleisa Uwitwa Kristu,” namayo atile, “elyo akesa, Akalondolola fyonse.”
Nao Yesu asosele kuli namayo, “Ni ‘ne Wine.”
Namayo alishiile umutondo wakwe no kubwekela mu mushi. “Iseni,” aliitile, “iseni mumone umuntu uunjebele fyonse ifyo nacitile. Bushe kuti aba e Kristu?”
Nabo abantu aba mu mushi bafumine ku mushi no kuya kumana na Yesu. Abengi balitetekele ukuti e Kristu, Kapususha, pantu aliishibe fyonse pali bene. Kuti mwabelenga ili ilyashi mu Baibolo mwi buku ya mbila nsuma yakwa Yohane 4:3-42.
Yesu aliishiba fyonse pali ifwe, ifisuma ne fyabipa. Tulafwaya ukufisa ifyabipa twacita mu buumi bwesu, lelo teti tufifise kuli Yesu. Aisa kukutupususha kukukandwa ukutulingile pakucita ifyabipa. Kuti afumyapo ifisendo ifyafina efyo tumfwa mukati ka mitima shesu no kutupela umutende. Alifwile no kusenda imembu shesu no kulenga ukutila twingakwata apakwikala ku muulu ilyo twa fwa.
Yesu e bwasuko kuli fyonse ukabila na kumepusho yobe yonse. Alefwaya ukuba cibusa obe. Alefwaya ukupwisha ukubulilwa kwa mukati ka mutima obe. Kuti afumyapo umwenso no kukanakwata ukutusha no kukushilo mutende no kukutalalika.
Yesu aletila, “Iseni kuli ine… nalamupela ukutusha” (Mateo 11:28). Pepa fye kuli Lesa no kumweba ukutila waumfwa ububi umulandu ne membu shobe. Lomba Yesu ukwisa mu mweo obe. Ilyo uleipela kuli uyu Lesa Umukalamba mucitetekelo akesa ikala mu mutima obe. Ukubapo kwakwe kwalakupela ukusekelela. Ena alakukoselesha no kukupela amatontonkanyo aya buumi obe. Akaba ubwasuko kuli iwe.