Sa Balaan nga Biblia atong mabasa, “Ug nakita ko ang mga minatay, dagko og gagmay, ug nagatindog sa atubangan sa trono; Ug gipamuklad ang mga basahon; ug may laing basahon nga gibuklad, nga mao ang basahon sa kinabuhi; ug ang mga minatay gipanghukman, ingon sa mga butang nga nahasulat sa mga basahonon sumala sa ilang mga buhat” (Revelation 20:12). Kini usa ka ebedinsya nga gilista sa Dios ang tanan.
Si Joshua Harris, usa ka ulitawo nga taga Maryland, USA, nagbakasyon siya sa Puerto Rico. Usa ka gabii aduna siyay damgo. Nabati niya nga ang Dios naghatag kaniya niini nga damgo aron sa pagbadlong sa iyang pagka dili matinumanon. Kini nga damgo nakapahinumdom kaniya sa nagbag-ong gahum ug dugo ni Jesucristo. Gusto namu nga ipa-ambit kini kanimo.
Ang Kwarto
Sa tunga sa akong pagkahinanok, nakita ko ang akong kaugalingon sa usa ka kwarto. Walay laing butang gawas lamang sa usa ka bungbung nga puno sa mga gagmayng papel. Susama kini sa anaa sa library nga adto didto nakalista ang mga ulohan ug kung kinsa ang nagsulat sa maong libro, ug ang alapabeto nga pagkasunudsunud. Pero kini nga pundok sa mga papel sangko hangtud sa kesame ug murag walay katapusan sa bisan asa nga direksyon, kini adunay nagkalainlain nga mga ulohan. Sa dihang miduol ako, ang unang nagkuha sa akong atensyon mao ang “Ang mga babayeng akong nagustohan. ”Ako kining giablihan ug nagsugud ko sa pagpakli sa mga kard, sa akong pagkakurat ako kining gisira, tungod kay nakaila ko sa maong mga ngalan nga nahisulat.
Dihadiha dayun, nasayran ko kung asa ako nga kwarto. Kini nga kwarto nga nahimutangan ko kung diin ania ang daghang papel mao ang akong orihinal nga seystema sa akong kinabuhi. Dinhi nahisulat ang tanan nakung nabuhat, magamay man or dagko, detalyado kaayo nga bisan ako dili na makahimu sa paghinumdom.
Gibati ko og katingala, naglibog uban ang kahadlok, nagsagol na ang akong gibati ug nagsugud ko sa pag-abli sa papel ug giusisa kung unsa ang mga sulud niini. Adunay uban nga nagdala og kalipay, mga maanindot nga mga handumanan; ang uban makauulaw ug grabe nga mga pagmahay nga dili ko gusto nga mahibaloan sa uban. Ang usa ka file gisuwatan og “Mga higala”, sunud niini sa usa nga gisuwatan og “Mga Higala nga akong gitraydor.”
Ang mga ulohan nagsugud sa mga ordinaryo padulong sa mga dili na maayo. “Mga Libro nga akong nabasa”, “Mga bakak nga akong nasulti”, “Kalingawan nga akong gitugot”, “Mga binuang nga akong gikataw-an”, “ Mga butang nga nasinggit nako sa akong mga igsoon”. Ang uban nga dili malipayon “Mga butang nga akong gibagotbot batok sa akong mga ginikanan.” Nagpadayun ang akong katingala sa mga nahisulat. Adunay daghan nga nahisulat nga wala na nako dahuma ug adunay dyutay lang usab.
Nakurat ako sa kadaghan nga akong nabuhat sa akong kinabuhi. Possible ba nga ako adunay oras sa akung baynte ka tuig aron isulat ang matag usa sa liboan, tingali milyon-milyon, sa mga kard? Pero kada kard nagsulti sa kamatuoran. Anaa ang akong pirma sa kada sinuwat.
Sa dihang gikuha ko ang file nga ang nakasuwat “Mga kanta nga kong ginapaminaw,” Ang mga kard giputos pag-ayo, ug bisan pa pagkahuman sa duha or tulo ka yarda wala pagihapon nako maabot ang katapusan. Gisirhan ko kini, naulaw gayud ako, dili sa kalidad sa musika apan sa kadako sa oras nga akong gigahin para niini.
Sa pag-abot nako sa file nga gimarkahan og “Malaw-ay nga mga panghunahuna” gibati ko og kabugnaw sa tibook kung lawas. Gipagawas nako ang file (sudlanan) og usa ka pulgada, tungod kay dili nako gusto masabtan kun unsa siya kadako ug gikuha ko ang usa ka kard. Nahadlok ako sa detalyado nga mga impormasyon. Dili maayo ang akong gibati sa paghunahuna nga girecord bisan ang mga ing-ane nga butang.
Sa kalit mibati ko og grabe nga kapungot. Usa ra ka butang ang naa sa ako ulo: “Dapat wala gyuy makakita ani nga mga kard! “Kinahanglan ko kining gubaon!” Tungod sa akong kasoko gikuha nako ang file (sudlanan) bisan og unsa pa kini kadagko. Kinanglan ko kining kuhaon ug sunugon tanan. Sa dihang nagsugud nako sa pagkuha nangahulog kini sa salog; wala ako makapagawas bisan usa ka card niini. Nawad-an nako og paglaum ug mikuha ako og usa ka kard pero nabati nako nga mura kini ug puthaw sa dihang gusto ko kining gision.
Masulob-on ug wala nay paglaum ug wala na gyud koy mahimu, gibalik ko nalang ang file sa iyang gibutangan. Gisandig ko ang akong ulo sa bungbong, ug miginhawa og halalom uban ang kalooy sa kaugalingon. Sa dihang aduna koy nakita-an nga ang nakasuwat. “Mga tawo nga akong nasuginlan sa maayong balita.” Sinaw ang iyang hawiranan kumpara sa uban, mas bag-o, halos wala nagamit. Akong gibira ug nakita ko ang gamay nga kahon mga halos tolo ka pulgada ug gibutang ko sa akong mga kamot. Maihap ko lang ang sulud nga mga kard.
Sa kalit mitulo ang akong mga luha. Misugud ako sa paghilak, hangtud sa misakit ang akong tiyan ug nagkurog tungod sa grabe nga pagbakho. Miluhod ako ug mihilak. Mihilak ako tungod sa kaulaw, tungod sa grabe nga kaulaw. Ang akong mga luha nagpuno sa akong mga mata ug wala nakoy makita. Dapat wala gayuy makahibalo niini nga kwarto. Kinahanglan ko kining butangan og kandado ug tagoan ko ang yawi.
Ug sa dihang gipahid ko ang akong mga luha, nakita ko Siya. Ayaw, dili unta Siya, ayaw dinhi, Hala, bisan kinsa na lang dili lang unta si Jesus.
Wala koy nahimu sa dihang Iyang gisugdan og abli ang mga file ug gibasa Niya ang mga kard. Wala koy igong kusog sa paghuwat sa Iyang tubag. Ug sa dihang makahimu nako sa pagtan-aw sa Iyang nawong, nakita ko ang grabe nga kasubo labaw pa sa akong gibati. Gusto Niya magbasa ngadto sa mga dili maayo nga mga kard. Kinahanglan ba gyud Niya basahon tanan?
Sa katapusan Siya mitan-aw kanako gikan sa tabok sa kwarto. Mitotok Siya kanako uban ang maloloy-ong mga mata. Apan kini usa ka kalooy nga wala makapasoko kanako. Giduko ko ang akong ulo, gitabunan ko ang akong nawong sa akong mga kamot ug mihilak pag-usab. Miduool Siya kanako ug gibutang Niya ang Iyang mga bukton kanako. Pwede unta Siya magsulti kanako ug daghang butang. Apan wala Siyay gisulti bisan usa ka pulong. Mihilak Siya uban kanako.
Mitindog Siya ug mibalik paingon sa pundok sa mga papel. Nagsugud Siya sa pikas daplin sa kwarto, Iyang gikuha ang usa ka file ug giusa-usa Niyang gisugdan ug sulat ang Iyang Ngalan ibabaw sa akong ngalan.
“Ayaw” misingit ako, midagan ako padulong Kaniya. Ug ang pulong nga ako lang masulti Kaniya kay “Ayaw,” “Ayaw,” samtang akong gikuha gikan Kaniya ang mga kard. Ang Iyang ngalan dili angayan mahisulat niani nga mga kard.pero ania na, nahisulat sa grabe ka baga ug grabe ka pula, buhi kaayo. Ang ngalan ni Jesus nagtabon sa akong ngalan. Gisulat pinaagi sa Iyang dugo.
Sa hinay nga paagi Iyang gikuha ang papel gikan kanako. Mipahiyom Siya sa usa ka masulob-ong pahiyom ug nagpadayun sa pagsulat sa mga papel. Wala gyud ko kasabot kung giunsa Niya paghuman, kay wala ra dahuma Iya nang gisira ang katapusang file ug Siya midool sa akong tapad. Gibutang Niya ang Iyang mga bukton sa akong abaga ug miingon, “Natapus na.”
Mitindog ako, ug Iya kung giubanan paggawas sa kwarto. Walay kandado ang purtahan. Apan aduna pay kard nga dapat suwatan.
The Room (Ang Kwarto) – Copyright 1995--- New Attitudes/ Joshua Harris
Naghunahuna kaba kung unsa ang pagtan-aw sa Dios sa imong kinabuhi? Si jesus nagsulti kanato “Sa tanang pulong walay pulos nga ginapamulong sa tawo, magahatag sila ug husay sa adlaw sa paghukom” (Mateo 12:36). Kung kita matinud-anon sa atung kaugalingon, atong angkunon uban ang kasubo ug magbasol nga napakyas kita sa atong mga panghunahuna ug mga binuhatan. Kita gihapon maulaw sa mga panghunahuna ug mga buhat nga gihimo nato sa tago. Ang Biblia nag-ingon sa (Roma 2:16) nga “Ang Dios magahukom sa mga tinago sa tawo pinaagi kang Jesucristo.” Si Apostol Pedro nagsangyaw “Busa paghinulsol kamo ug balik sa Dios aron papason niya ang inyong mga sala.” ( Buhat 3:19). Gikuha na ba ni Jesus ang imung mga sala, o naghasol pa ba kini kanimo karon?
Tinguha mo ba nga mahimong gawasnon? Naghatag ba kanimo ug kabug-at ang imong mga kagahapon? Ang atong mga sala, naghatag kini ug kabug-at sa atong kinabuhi. “Kong moingon kita nga kita walay sala, gilimbongan nato ang atong kaugalingon, ug walay kamatuoran diri kanato.” (1 Juan 1:8). “Kay ang bayad sa sala mao ang kamatayon; apan ang walay bayad nga hatag sa Dios mao ang kinabuhi nga walay katapusan nga anaa kang Cristo Jesus nga atong Ginoo.” (Roma 6:23).
Si Jesus naghatag og kapasayloan. Mianhi Siya sa kalibutan ug nagpaagas sa Iyang dugo alang sa mga makakasala. Ang plano sa kaluwasan na kompleto na. Gusto kabang mahimung kompleto? “Busa kong ang Anak magaluwas kaninyo, maluwas gayud kamu” (Juan 8:36). (Salmo 51) Duol kang Jesus karon! Magbasol ug isugid ang imung mga sala. “Kong igasugid nato ang atong mga sala, matinumanon ug matarung siya, aron pasayloon kita niya sa atong mga sala, ug pagahinloan kita niya gikan sa tanang kadautan” (1 Juan 1:9). Saligi si Jesus nga magdala kanimo ngadto sa maanindot nga kinabuhi uban Kaniya. Magahatag Siya kanimo ug direksyon para sa imung adlaw-adlaw nga pagkinabuhi.