Ang pundasyon sa simbahan sa Diyos mao si Jesu-Kristo. Ang Bibliya tin-awng nagtudlo bahin niini nga ulohan. Si Pedro nga naghisgot mahitungod ni Jesus miingon, “Ikaw mao ang Kristo, ang Anak sa buhi nga Dios.” Si Jesus miingon, “Sa ibabaw niining bato pagatukoron ko ang akong simbahan, ug ang mga ganghaan sa impyerno dili makabuntog niini” (Mateo 16:16, 18).
Sa dihang si Jesus hapit nang mobiya niining yutaa, Iyang gisugo ang Iyang mga tinun-an sa paghulat sa Jerusalem hangtod nga ang Balaang Espiritu gibubo. Sa dihang nahitabo kini, sila gihatagan og linaing gahom ug inspirasyon sa pagwali kang Kristo ug Kaniya nga gilansang sa krus. Sila nagwali og paghinulsol ug kapasayloan sa sala pinaagi sa dugo ni Jesus. “Apan sa tanan nga nanagdawat kaniya, kanila naghatag siya sa katungod sa pagkahimong mga anak sa Dios, kanila nga nanagtoo sa iyang ngalan” (Juan 1:12). “Kadtong malipayon nga midawat sa iyang pulong gibawtismohan: ug nianang adlawa may mga tulo ka libo ka kalag nga gidugang kanila” (Buhat 2:41).
Ang plano sa Diyos mao nga ang tanang tawo maghinulsol, motuo Kaniya, ug mahimong bahin niining panag-igsoonay. Daghang tawo ang nangutana, "Hain ang simbahan sa Diyos?' Unsaon nato pagkahibalo?" Apan bisan pa niana, ang malig-ong patukoranan sa Dios nagabarog nga lig-on, nga adunay kini nga timbre: "Ang Ginoo nakaila kanila nga iya". Ug, himoa nga ang matag usa nga nagatawag sa ngalan ni Kristo mobiya sa kasal-anan “ (2 Timoteo 2:19). Ang mga pulong ni apostol Pablo nagpabilin nga tinuod, “Busa mogawas kamo gikan kanila, ug maglain kamo, nagaingon ang Ginoo, ug ayaw paghikap sa mahugaw nga butang; ug ako modawat kaninyo, ug ako mahimong usa ka Amahan kaninyo, ug kamo mahimong akong mga anak nga lalaki ug mga anak nga babaye, nagaingon ang Ginoo nga Makagagahum sa tanan “ (2 Corinto 6:17-18). Walay bisan kinsa nga dili angayng mobiya sa tanan ug magpas-an sa iyang krus ug mosunod kang Jesus. Alang sa daghang tawo kini morag lisod kaayo. (Mateo 19:16-22) Sila dili andam sa pagbiya sa kalibotan ug sa tanang tinguha niini aron mosunod sa Ginoo. (Mateo 10:37-38) Bisan pa niana, kini mao ang paagi sa Diyos. Buot niya nga ang Iyang mga anak mahigawas gikan sa bisan unsang mga bugkos nga makapugong sa usa ka dedikadong pag-alagad Kaniya.
Kining maong mga magtutuo naglangkob sa lawas ni Kristo. Sila adunay usa ka dato nga panaghiusa diha kang Kristo Jesus. Ang unang iglesia nalipay sa ilang bag-ong nakaplagan nga pagtuo, “Sila nagpadayon nga malig-on sa doktrina ug panag-uban sa mga apostoles, ug sa pagpinitpinit sa tinapay, ug sa mga pag-ampo” (Buhat 2:42). Ang maong panag-uban maoy usa usab ka kasinatian sa modernong-adlaw nga mga Kristohanon nga natawo pag-usab. Ang samang Balaang Espiritu gihatag usab kanila. Sila giinspirar sa mga pagtulon-an ni Jesus ug nakakaplag nga sila makaambit sa mga kasinatian sa mga isigkamagtutuo sa personal nga paagi. Sila mobati nga nahiusa sa ilang panginahanglan sa pagpasalamat ug pagdayeg sa ilang langitnong Amahan ug sa pagpangayog giya gikan Kaniya.
Ang mga magtutuo maningkamot sa pagtuman sa mga sugo ni Jesus. Siya miingon, "Kamo mao ang akong mga higala, kon kamo mobuhat sa bisan unsa nga akong gisugo kaninyo" (Juan 15:14). Siya usab miingon, "Kon kamo nahigugma kanako, inyong tumanon ang akong mga sugo" (Juan 14:15) ug, "Nganong gitawag ako ninyo, 'Ginoo, Ginoo,' ug dili ninyo buhaton ang mga butang nga akong gisulti?" (Lucas 6:46) Ang iglesya nga gitukod ni Kristo magpadayon sa pagtuman sa tanan nga iyang gisugo. (Mateo 28:20) Usisaon nato ang Kasulatan alang sa mga prinsipyo ug mga doktrina nga hinungdanon alang sa kaluwasan.
Aron maluwas ang tawo kinahanglang maghinulsol sa iyang mga sala. Si Juan Bawtista, sa pagpangandam alang sa pag-anhi ni Jesus, miingon, "Maghinulsol kamo: kay ang gingharian sa langit haduol na" (Mateo 3:2). Si Jesus, sa pagsugod sa Iyang ministeryo, migamit sa samang mga pulong: “ Sukad niadtong panahona si Jesus misugod sa pagsangyaw, ug sa pag-ingon, Maghinulsol: kay ang gingharian sa langit haduol na” (Mateo 4:17). Sa adlaw sa Pentecostes si Pedro miingon sa mga tawo nga "maghinulsol, ug magpabunyag ang matag usa kaninyo sa ngalan ni Jesukristo alang sa kapasayloan sa mga sala, ug kamo makadawat sa gasa sa Espiritu Santo" (Buhat 2:38). Sa dihang giwali ni Pedro ang ebanghelyo, kining mga tawhana nakombinsir sa sala ug gustong mahibalo kon unsay ilang buhaton. Ang susama tinuod karon ug magpadayon hangtod sa kataposan sa panahon. Ang pagbasa sa Bibliya ug ang pagwali sa ebanghelyo maghatag og kombiksyon alang sa makasasala. Kini mao ang tawag sa Ginoo sa paghinulsol. Ang paghinulsol nagkinahanglag pagbasol sa sala, pagbiya sa dili-matarong nga pagkinabuhi, ug dayon usa ka pasalig sa pag-alagad sa Ginoo. Ang Diyos mohatag sa tawo sa pagpamatuod sa kalinaw diha sa iyang kasingkasing ug sa pagpuno sa Balaang Espiritu kon siya maghinulsol. Kini gitawag og bag-ong pagkatawo. Sa iglesya sa Diyos, kini gikinahanglan alang sa pag-apil.
Si Jesus miingon, “Ako mao ang pultahan: pinaagi kanako bisan kinsa nga mosulod, siya maluwas, ug mosulod ug mogula, ug makakaplag ug sibsibanan” (Juan 10:9). Sa dihang ang usa ka tawo tinuod nga natawo pag-usab, siya moagi niining pultahan. Sa laing higayon, gitandi ni Jesus ang gingharian sa langit sa usa ka hari nga nag-andam og kombira sa kasal. Siya naghisgot bahin sa usa ka tawo nga miduol sa kombira sa kasal nga wala magsul-ob og besti sa kasal. Siya gipangutana kon sa unsang paagi nga siya misulod nga wala magbisti para sa kasal. Wala siya makatubag. “Unya ang hari miingon sa mga sulugoon, 'Bugkosa ang iyang mga kamot ug mga tiil, ug dad-a siya sa gawas, ug isalibay siya ngadto sa kangitngit sa gawas; didto may pagminatay ug pagngingigot sa mga ngipon” (Mateo 22:13). Pagkasubo alang kang bisan kinsa nga dili makasulod niining pultahan.
Ang simbahan sa Diyos naggabuhat og bawtismo sa mga magtutuo. Aron mabawtismohan ang usa ka indibiduwal kinahanglang magpakita una og ebidensiya nga nakabatog bag-ong pagkatawo ug kinahanglang motuo sa makatabon nga dugo ni Kristo. “Siya nga motuo ug magpabunyag maluwas; apan siya nga dili motuo pagahukman sa silot” (Marcos 16:16). Si Jesus usab miingon, "Gawas kon ang usa ka tawo matawo sa tubig ug sa Espiritu, siya dili makasulod sa gingharian sa Dios" (Juan 3:5). Ang bawtismo maoy dayag nga ilhanan sa usa ka sulod nga paghinlo nga nahitabo na. Kini usab ang pultahan ngadto sa simbahan. Mao kini ang paagi nga gitudlo sa Bibliya; busa ang iglesya nagpadayon sa pagtudlo ug paggawi niining paagiha.
Kadtong misulod sa simbahan niining paagiha naglangkob sa panag-igsoonay diha kang Kristo. Sila nagtagamtam sa panag-uban ug panaghiusa sa mga magtutuo. Aron mahuptan kini, ang ilang relasyon uban kang Kristo kinahanglang magpabilin nga malig-on. Si Jesus nagtudlo kanila nga magbaton og inigsoong pag-atiman ug kabalaka alang sa usag usa (Mateo 18:15-17). Siya nagtudlo nga taliwala sa mga magtutuo kinahanglang adunay pagkaandam sa paghatag ug pagdawat og pagbadlong. Si Jesus naghatag niining mga instruksyona aron sa pagtabang sa mga nakasala. Gihimo niya kini aron maluwas ang ilang mga kalag ug aron mahuptan ang kaputli sa iglesya. Niini adunay kasegurohan samtang ang mga igsoon nagtabang sa usag usa sa pagpabiling matinumanon.
Sa wala pa matapos ang kinabuhi ni Jesus, Iyang gikuha ang tinapay, gibahin kini, ug gihatag kini ngadto sa Iyang mga tinun-an aron kan-on, nga nag-ingon, "Kuhaa, kan-a: kini mao ang akong lawas, nga gibahin alang kaninyo: buhata ninyo kini sa paghinumdom kanako" (1 Corinto 11:24). Iyang gikuha usab ang usa ka kopa nga may bunga sa parrasan ug giingnan sila nga moinom niini. Siya miingon, "Buhata kini, sa matag higayon nga kamo moinom niini, sa paghinumdom kanako" (1 Corinto 11:25). Kini maoy magpahinumdom sa mga magtutuo sa bili nga gibayran ni Jesus sa pagluwas kanila. Unya si Jesus usab nagbagkos sa iyang kaugalingon sa usa ka panaksan. Unya gibuboan niya o tubig ang usa ka palanggana ug gihugasan ang mga tiil sa iyang mga tinun-an. Si Pedro misupak niini nga buhat, apan si Jesus miingon, "Kong dili ako magahugas kanimo, ikaw dili makaambit kanako. " (Juan 13:8). Miingon usab siya: "Kon ako, bisan tuod Ginoo ug Magtutudlo, naghugas sa inyong mga tiil, kamo usab angay nga maghinugasay sa mga tiil sa usag usa. Kay ako naghatag kaninyog panig-ingnan, aron kamo usab magabuhat sama sa akong gibuhat kaninyo". Ang simbahan nagpadayon sa pagtuman sa paghugas sa mga tiil panahon sa Komunion.
Ang Diyos naghunahuna sa kalipay sa tawo ingon man sa pagpadaghan sa tawhanong kaliwatan. Alang niini nga katuyoan, Iyang gipasiugda ang kaminyoon diha sa Hardin sa Eden tali sa usa ka lalaki ug usa ka babaye. Gipamatud-an ug gisagop ni Jesus kining maong kahikayan sa dihang Siya naglakaw niining yutaa. Ang simbahan nag-ila sa balaang kaminyoon ingong plano sa Diyos alang sa kaayohan sa tawhanong kaliwatan. Ang mga instruksiyon ni Jesus mao, "Tungod niini ang usa ka tawo mobiya sa iyang amahan ug sa iyang inahan, ug motapot sa iyang asawa" ug "Busa ang gihiusa sa Dios, dili pagabulagon sa tawo" (Mateo 19:5-9). Ang mga Pariseo naghagit Kaniya, nga nangutana kon nganong gitugotan ni Moises ang diborsiyo. Si Jesus miingon kanila nga dili kini mao ang kahimtang sukad sa sinugdan, apan tungod sa katig-a sa ilang mga kasingkasing. Busa, ang iglesya sa Diyos nagpadayon sa pagtudlo batok sa diborsiyo.
Ang laing importanting doktrina nga gipatuman sa iglesya mao ang dili-pagbatok. Si Jesus miingon, "Ayaw pag-asdang sa daotan; apan bisan kinsa nga mosagpa kanimo sa imong tuo nga aping, itugyan usab kaniya ang pikas nga aping" (Mateo 5:39). Gipakita niya kini sa dihang siya gidakop ug gihusay nga walay hustisya. Sa dihang si Pedro misulay sa pagpanalipod kang Jesus pinaagi sa pagputol sa dalunggan sa sulugoon sa hataas nga saserdote, si Jesus miingon kaniya sa pag- ingon "Ibalik ang imong espada sa dapit niini: kay ang tanan nga mogamit sa espada mangamatay pinaagi sa espada" (Mateo 26:52). Sulod sa daghang katuigan, ang mga apostoles ug daghan pang uban nagbarog nga malig-on niining doktrina bisan pag alang sa daghan kini nagpasabot og kamatayon.
Gibiyaan ni Jesus sa mga apostoles ang pag-organisar ug pagtukod og mga simbahan. Si apostol Pablo mas madasigon gayod niining buluhatona. Siya nabalaka sa usa ka maayong, may katakos nga ministeryo, nga may pagdumala sa panon. Siya naghatag og mga instruksiyon bahin sa mga kuwalipikasyon nga importante sa usa ka epektibong ministeryo. Ang mga ministro tawgon sa Diyos ug pilion gikan sa mga igsoon. Kinahanglang sila mapuno sa Balaang Espiritu, maalamon sa doktrina ug pagtulon-an.
Ang simbahan naningkamot sa pagtudlo ug pagbuhat sa doktrina ni Jesu-Kristo ug sa mga apostoles. Hinaot nga imong susihon ang mga kasulatan aron sa pagsabot kon ikaw nagpadayon ba sa "pagpadayon nga malig-on diha sa doktrina ug panag-uban sa mga apostoles" (Buhat 2:42). Ang imong gugma Kaniya pamatud-an pinaagi sa imong pagkamasinugtanon. Siya nagtinguha sa pagdala kanimo ngadto sa "iglesya sa buhi nga Dios, ang haligi ug ang sukaranan sa kamatuoran" (1 Timoteo 3:15). Didto makakaplag ka ug espirituwal nga puy-anan.