Unsay kahulugan niining kusog nga pagtibok sa akong dughan?
Kining kanunay’ng pagpangita sa kalinaw ug pahulay?
Kining kamingaw nga akong gibati?
Bisan kung musagol ako sa panon sa katawhan
Kining sakit nga kahaw-ang grabe gayud;
Ang iyang singgit tinood! Tinuod kaayo!
Walay-Pulos nga kalibutan, pwede ba nimung mapalipay kini nga tinguha?
Ang imong dakong natigum naghatag ba kanimo og kapahulayan?
Busa taposa kining walay pulos nga mga tinguha!
Tan-awa! Mga bahandi, kalipay, garbo, ug kadungganan,
Kung maangkon, kutob ra man ni sa ngalan!
Wala sila makahatag og katagbawan!
oh, ang akong kalag! Kini ang iyang singgit!
Makita ba nimu ang kamatayon nga dayun nga hadool na,
Gawas kung ang Dios magahatag kanimo og pahulay?
Sa lubnganan, usa ka kaparte niya;
Ug tungod niini, naninguha ka nga makalingkawas sa sala.
Makig-uban kaniya sa katapusan:
Oh! Alaot ako! Nawala ako sa sala!
Nahimulag gikan sa Dios ang akong kalag!
Kaluy-I ako, Ginoo!
Pamati, Pamati! Usa ka tingog nakatawag sa akong ngalan:
“Minahal kong makakasala, gipas-an ko ang imung sala:
Gipa-agay ko ang akong dugo alang kanimo!
Kadtong muabot, hatagan ko sila og tam-is nga pahulay,
Kamingaw diri sulod sa dughan;
“Kini makita lang diri kanako”
Padulong na ako, Ginoo, padulong na ako karon!
Sa ubos sa imung krus ako malipayong miyukbo;
Gihatag ko ang tanan para kanimo!
Makuha ko ang tam-is nga kalinaw sa calbaryo!
Ang akong kabug-at nawala, ang akong kalag gawasnon!
(Dinhi na ako magpabilin!)
Oo, Si Jesus nagpahilum nianang natago nga singgit;
Ang akong kalag karon may balay na sa kahitas-an,
Ug naghulat sa dakong adlaw!
Tingali pamilyar ka niining tinago nga singgit kong si Jesus dili magkontrolar sa imong kasingkasing. Tingali dili nimo hingpit nga masabtan kini nga tinguha. Ang imung kalag nagasangpit sa Dios, siya nagbuhat niini, ug mukab-ot kini niya. “Ang tawo nahimong kalag nga may kinabuhi” ( Genesis 2:7). Kana nga kalag mabuhi sa walay kataposan.
Adunay dako nga kaguol sulod sa yuta, daghan ang modalagan ngadto-nganhi (Daniel 12:4). Ang usa ka makalibog ug binuang ang pagpangita alang sa kalipayan imbis nga ang tawo mubalik ngadto sa Ginoo para sa tubag alang sa mga hangyo sa iyang kalag. Daghang mga lalaki ug babaye, batang lalaki ug babaye nga mihunong sa pagkamatinud-anon ug kaligdong sa kawang nga paglaum aron sa pagtagbaw sa niining masakit nga kahaw-ang sa sulod. Sa ilang paningkamot sa pagpuno niini nga kahaw-ang, natural nga ang mga tawo magtinguha sa, "Ang kaibog sa unod, ug ang kaibog sa mga mata, ug ang garbo sa kinabuhi" (1 Juan 2:16). Makapasubo nga ang libo-libo, bisan milyon-milyon, ang nadani sa dakong lit-ag ni Satanas pinaagi niining mga tinguha. Sa kataposang adlaw ilang atubangon ang makusog nga kamatuoran nga si Satanas maoy usa ka malimbongon ug nga ang makasasalang, unodnong pagkinabuhi maoy ilusyon lamang. Sa kataposan sa ilang kinabuhi sila ilabay ngadto sa nagdilaab nga gahong sa impyerno. Sa impyerno! Didto sila mag-antos sa dili-masaysay nga pagsakit ug kasakit sa walay kataposang mga katuigan sa kahangturan. (Tan-awa usab ang Mateo 25:41; Pinadayag 20:10-15; 21:8)
Karon mao ang adlaw sa grasya, ang panahon nga ang mga makasasala makaadto sa Ginoo alang sa kapasayloan. Karong adlawa, kon ang imong kasingkasing nagasinggit alang sa kalinaw ug pahulay, balik ngadto Kaniya nga gihigugma sa imong kalag. Ang sala nagbulag kanato gikan sa Dios, apan adunay Usa nga makaluwas kanimo - si Jesus, ang bugtong Anak sa Dios (Juan 3:16). Siya nagtinguha sa pagluwas kanimo. Siya lamang ang makahatag kanimo og kalinaw sa kasingkasing ug sa hunahuna. Siya malulot-on kaayong nagdapit "Umari kamo kanako, kamong tanan nga nagabudlay ug nabug-atan, ug papahulayon ko kamu" (Mateo 11:28).
Si Jesus nag-antos ug namatay sa krus aron sa paglukat sa atong mga kalag (1 Pedro 2:24). Kita ang sad-an! Ang hustisya nagkinahanglan nga ang matag usa kanato mamatay - bisan ang walay-kataposang kamatayon. Apan tungod niini nga katubsanan, ang kamatayon "pagalamyon sa kadaugan" (1 Corinto 15:54). Si Jesus mao ang inosenteng "Kordero sa Dios, nga nagakuha sa sala sa kalibutan" (Juan 1:29). Siya nahigugma pag-ayo sa mga kalag sa mga tawo nga Siya andam nga mobiya sa trono sa iyang Amahan uban sa tanang himaya niini ug moanhi niining yutaa. Si Jesus nagpuyo dinhi ingon nga usa ka tawo ug kuhaman gihatag ang Iyang kinabuhi sa krus. Iyang giula ang iyang dugo aron sa pagluwas sa atong mga sala. "Nga bisan kinsa nga motuo kaniya dili mawala, kondili adunay kinabuhi nga dayon" (Juan 3:15).
Daghan ang nagtuo nga maluwas sila tungod lamang kay sila nagtuo kang Jesus. Sa pagkatinuod, kinahanglan nga kita motuo Kaniya, apan ang "pagtuo nga walay mga buhat patay" (Santiago 2:20). Si Jesus Mismo miingon, “Dili ang matag usa nga moingon kanako, Ginoo, Ginoo, mosulod sa gingharian sa langit; apan siya nga nagabuhat sa kabubut-on sa akong Amahan nga anaa sa langit” (Mateo 7:21)
Mahimong walay pahuway ang imong kalag, ug pwede ka mahadlok sa kahangturan tungod sa sala sa imong kasingkasing. Duol kang Jesus sa tibook mong kasingkasing ug hangyoa Siya nga pasayloon ang imong mga sala ug limpyohan ka sa tanan nga pagkadili-matarong. Ang sala dili gayud makasulud sa langit! “Ang kalag nga makasala, kini mamatay” (Ezequiel 18:4). Apan magmaisogon! “Nag-ingon ang GINOO, “Ngari kamo ug maghusay kita. Bisag unsa ka pula ang inyong sala, maputi kini kaayo; bisan pa kinig dagtom-pula, maputi kini sama sa balhibo sa karnero”( Isaias 1:18)
Samtang imong gibasa kini nga mga pulong mahimo nimong bation ang Espiritu sa Dios nga nagtuktok sa imong kasingkasing. Duol kang Jesus karon! Andam Siya nga magpasaylo ug magluwas kanimo gikan sa pagkaulipon sa sala ug kahadlok.
Aron matubag ang tawag sa Diyos, bukha ang imong kasingkasing ngadto Kaniya. Dawata nga ikaw usa ka makasasala nga walay tabang, ug nga ikaw nawala sa walay kataposan. Tuohi nga ang imong bugtong paglaom anaa kang Jesus, nga nag-antos ug namatay alang sa imong mga sala. Kini magdala ug dakong kasubo tungod sa imong mga sala. Kon kamo maghinulsol ug mohimo ug tibuok nga pakigsaad ngadto sa Diyos, Siya magpasaylo kaninyo. Ikaw mobati ug kahupayan ug kalinaw nga makatagbaw sa singgit sa imong kasingkasing. Mahinungdanon nga sundon ang pagkamasinugtanon samtang ang Balaang Espiritu mosugod sa paggiya sa imong kinabuhi. Siya mogiya kanimo sa pagsugid sa imong mga sala ug sa pagpasig-uli kon gikinahanglan. Kini mao ang bag-ong pagkatawo nga gihisgotan ni Jesus diha sa Juan 3:3.
Ang usa ka tawo nga natawo pag-usab makadawat ug bag-ong kinaiya, bag-ong mga tinguha, ug kasingkasing nga napuno sa gugma sa Diyos. Si Jesus, pinaagi sa Balaang Espiritu, mopuyo diha sa kasingkasing sa usa ka tawo nga natawo pag-usab, ug ang tinguha sa kalag matagbaw. Siya adunay pakig-uban sa iyang Magbubuhat! Samtang siya nagpabilin nga mapainubsanon ug masinugtanon sa hinay nga gamay nga tingog sa Espiritu sa Dios, siya pagadumalaon sa dalan nga padulong sa walay katapusan nga kalipayan.
Hinaut nga himuon nato ang pagpangamuyo sa makausa pa. Dili ka ba moanhi kang Jesus karong adlawa? Ayaw na pagtaboni ang tinago nga singgit! Diha sa kalibotan sa kalibog ug kaguliyang diin ang sala kaylap sa tanang kiliran, ikaw makabaton ug matam-is nga kalinaw ug pahulay!