Gibati kaba og kamingaw, o pagbati sa pagkasad-an ug kahadlok sa kinahiladman sa imong kasingkasing? Naghunahuna ka ba bahin sa katuyoan sa imong kinabuhi? Daghang tawo ang naningkamot sa pagpangita sa tubag niini nga pagbati. Ikaw tingali makakaplag og mga kalingawan o ubang mga kalihokan nga makapahulay kanimo gikan niining mga pagbati sa mubo nga panahon, apan unya mobalik kini, nga mas kusog pa kay sa kaniadto.
Sa sinugdan ang gimugna sa Dios hingpit man. Ang tawo walay mga suliran hangtod nga miabot ang yawa ug nagtukmod kaniya sa pagsupak sa Diyos. Siya nakasala ug dili na hingpit. Sukad niadto ang tanang tawo makasasala.
Mahimo ba nimong masabtan ang pagkahulog? Sa bata ka pa, ang Diyos wala mag-isip sa imong mga sala kay napasaylo kini tungod kang Jesus. Sa atong pagdako, kining mga butanga misugod sa pagbag-o ug ikaw misugod sa pagbaton og mga pagbati sa pagkasad-an. Unsay nahitabo? Gitugotan ka sa Diyos nga mobati og pagkasad-an sa imong mga sala. Ang dugo ni Jesus wala na magtabon sa imong mga sala. Ang Diyos nag-ingon, “Kamo karon maoy responsable sa inyong ginabuhat”. Kon wala ka modawat kang Jesus ingong imong Manluluwas, ikaw nagdala gihapon og palas-anon sa pagkasad-an.
Unsay imong mahimo aron mausab kining mga pagbati sa pagkasad-an? Dili nimo mabayran ang imong mga sala bisag pila ka maayong buhat ang imong buhaton. Sa mga mata sa Diyos ikaw makasasala gihapon. Dili tugotan sa Diyos ang sala. Ang sala nagbulag kanato gikan sa Diyos (tan-awa ang Isaias 59:2).
Karon ania ang matahom ug yano nga plano nga gitagana sa Diyos sa pagtabang kanimo. Si Jesus, ang walay-sala ug hingpit nga Anak sa Diyos, mianhi aron sa pagdala niini nga plano. Iyang gikuha ang atong mga sala diha sa Iyang Kaugalingon ug namatay diha sa krus, nagbayad sa bili nga gikinahanglan alang sa atong mga sala. Pinaagi sa kamatayon ug pagkabanhaw ni Jesus kita makabaton og kaluwasan karon. Si Jesus nagdapit kanato sa pagduol Kaniya nga may palas-anon sa sala.
Buot ka tabangan sa Diyos. Siya magpasaylo kanimo kon ikaw andam sa pag-angkon nga ikaw makasasala ug mag-ampo Kaniya alang sa tabang. Ang tanan nimong mga paningkamot ug maayong mga tuyo dili makahinlo kanimo gikan sa sala. Adunay usa lamang ka paagi nga ikaw malimpyohan gikan sa imong mga sala ug kana mao ang pag-aplikar sa dugo ni Jesu-Kristo sa imong kasingkasing.
Sa dihang nalimpyohan ka pinaagi sa dugo ni Kristo, imong masabtan nga dili ka makabag-o sa imong kinabuhi pinaagi sa imong kaugalingong gahom. Kinahanglang motuo ka nga ang Diyos adunay kaalam ug gahom sa pagbantay sa imong kinabuhi. Kon ikaw moduol sa Diyos uban ang bug-os nga kasingkasing, mobiya sa imong mga sala ug mosunod, Siya mohimo sa labing maayo alang kanimo. Kini mao ang pagtuo ang tibuok nga pagsalig sa Diyos sa imong kinabuhi. Sa dihang ihatag na nimo ang tanan ngadto sa Diyos, ang kalinaw nga imong madawat diha sa imong kasingkasing maoy pamatuod nga gipasaylo ka na Niya.
Ang kapasayloan nga imong madawat gikan sa Diyos maghimo kanimo nga LIBRE; nga gawasnon uban sa matam-is nga pagsalig nga ikaw karon maoy anak sa Diyos, nga gihingpit pinaagi sa dugo ni Jesu-Kristo. Ang usa ka bag-ong katuyoan nabuhi nga motugot kanimo sa pagbuntog sa mga pagbati sa kahadlok ug kawalay-pulos.
Mateo 11:28 Umari kanako.
Mateo 6: 25-31 Giatiman ka sa Dios.
Juan 3:16 Gihigugma ka sa Dios.
Juan 14:15 Sunda ang Dios.