Sa wala pa magsugod ang panahon aduna nay Diyos. Siya ang naglalang sa kalibotan ug sa tanang butang niini. Tungod sa iyang gugma, gilalang sa Diyos ang tawo diha sa Iyang kaugalingong dagway ug gibutang siya diha sa usa ka matahom nga tanaman. Ang tawo misupak sa mga tugon sa Diyos. Kini nga pagsupak usa ka sala ug nagpahimulaag sa tawo gikan sa Diyos. Gisultihan Niya sila nga kinahanglang maghalad sila ug batan-ong mga hayop alang sa ilang mga sala. Ang maong mga halad wala magbayad alang sa ilang sala kondili nagpunting lamang ngadto sa kinadak-ang halad nga gitagana sa Diyos. Muabot ang panahon ang Diyos magpadala sa Iyang Anak nga si Jesus nganhi sa yuta aron mahimo nga kinalabwang halad alang sa mga sala sa tanang tawo.
Si Maria ug ang Anghel
Upat ka libo ka tuig milabay, sa lungsod sa Nazaret, nagpuyo ang usa ka batan-ong babaye nga ginganlag si Maria. Siya mimyo-onon kang Jose. Usa ka adlaw ang usa ka manulonda mipakita kang Maria ug miingon kaniya nga siya makabaton og usa ka espesyal nga bata. Siya paganganlan og Jesus. Kining bataa walay yutan-ong amahan. Siya Anak sa Diyos.
Ang pagkatawo ni Jesus
Pagkahuman sa pagbisita sa anghel, si Joseph ug Maria mihimo og usa ka taas nga panaw padulong sa Betlehem aron sa pagbayad sa ilang buhis. Pag-abot nila sa Betlehem, ang siyudad napuno. Nagpabilin sila sa gabii sa kuwadra tungod kay wala'y lugar sa balay nga abutanan. Didto natawo si Jesus. Giputos ni Maria ang Bata nga si Jesus sa mga pangputos nga panapton ug gibutang Siya sa pasungan.
Ang mga Magbalantay sa Karnero
Nianang gabhiona, sa usa ka bungtod sa gawas sa siyudad, ang mga magbalantay nagbantay sa ilang mga karnero. Usa ka manulonda mitungha kanila ug ang himaya sa Diyos misidlak sa palibot sa mga magbalantay. Ang manulonda miingon: “Ayawg kahadlok. Ako adunay maayong balita nga maghatag og dakong kalipay sa tanang tawo. Karong gabhiona usa ka Manluluwas ang natawo. Siya mao si Jesu-Kristo nga Ginoo. Makita ninyo ang bata nga giputos sa mga panapton ug naghigda sa pasungan”. Unya mitungha ang daghang mga anghel nga naghimaya ug nagdayeg sa Diyos, nga nag-ingon: "Himaya sa Diyos sa kahitas-an, ug sa yuta pakigdait sa mga tawo". Sa dihang mibiya na ang mga manulonda, ang mga magbalantay sa karnero mibiya sa ilang mga karnero ug midali sa pag-adto sa Betlehem. Didto ilang nakita ang bata sumala sa giingon sa manulonda kanila..
Ang mga Maalamon nga Tawo
Human matawo si Jesus, dihay mga tawong manggialamon nga gikan sa laing nasod nga miadto sa Jerusalem. Sila nangutana: "Hain ba ang natawo nga hari sa mga Hudiyo? Kay nakita namo ang iyang bituon sa sidlakan ug buot kaming mosimba kaniya". Sa dihang nadungog kini ni Haring Herodes, siya wala malipay. Gitawag niya ang mga saserdote ug mga magtutudlo sa Balaod. Gisultihan nila siya nga ang mga manalagna nag-ingon nga ang magmamando natawo sa Betlehem. Si Haring Herodes nagpadala sa mga tawong maalamon ngadto sa Betlehem aron sa pagpangita niining hariha. Sa dihang ang mga tawong maalamon mibiya sa Jerusalem, ang bituon naggiya kanila ngadto sa balay diin ilang nakaplagan ang bata nga si Jesus. Sila miluhod ug misimba, ug mihatag kaniyag mga gasa nga bulawan, insenso, ug mirra. Sa usa ka damgo, gipasidan-an sila sa Diyos nga dili mobalik kang Haring Herodes, busa mibalik sila sa ilang nasod pinaagi sa laing dalan.
Ang Katuyoan sa Gasa sa Diyos
Si Jesus Anak sa Diyos. Siya nagkinabuhi nga walay sala ug hingpit sa tanan niyang mga dalan. Sa edad nga traynta, si Jesus misugod sa pagtudlo sa mga tawo bahin sa Diyos, ang Iyang Amahan. Siya naghimog daghang mga milagro sama sa pag-abli sa panan-aw sa mga buta, pag-ayo sa daghang tawo sa ilang mga sakit, ug pagbanhaw pa gani sa mga patay. Labaw sa tanan, iyang gitudlo ang dalan aron makabaton ug kinabuhing walay kataposan sa langit. Dayon Iyang gihatag ang Iyang kinabuhi ingong halad alang sa sala sa tibuok kalibotan.
Ang Bibliya nag-ingon diha sa Juan 3:16, “Kay ang Diyos nahigugma kaayo sa kalibotan, nga iyang gihatag ang iyang bugtong nga Anak, aron ang bisan kinsa nga motuo kaniya dili malaglag, kondili makabaton ug kinabuhing walay kataposan.” Si Jesus mianhi niining yutaa aron mamatay diha sa krus ingong kinadak-ang halad. Pinaagi sa iyang kamatayon, ang bili sa tanang sala gibayran na. Wala nay kinahanglang mga halad alang sa sala. Kini mao ang katumanan sa saad sa Diyos nga magpadala ug Manluluwas.
Bisan kung si Jesus gipatay sa mga tawong dautan, ang kamatayon walay gahom Kaniya. Human sa tulo ka adlaw Siya mibangon nga madaogon gikan sa lubnganan. Sulod sa mga adlaw human sa Iyang pagkabanhaw, si Jesus nakita sa daghang tawo. Unya usa ka adlaw, human sa pagpanalangin sa iyang mga sumusunod, Siya misaka sa langit.
Sa dihang kita mopili sa pagtuo ug sa paghatag sa atong kinabuhi ngadto kang Jesus, ang iyang dugo naghinlo kanato gikan sa tanan natong mga sala. Samtang atong dawaton kining gasa sa kaluwasan, kita nahiusa usab sa Diyos. Si Jesus nahimong atong personal nga Manluluwas, ug atong matagamtam ang mga panalangin sama sa usa ka anak! Usa ka adlaw si Jesus mobalik. Dad-on Niya ang tanang matuod nga mga magtutuo ngadto sa langit. Didto sila mabuhi sa walay kataposan uban sa Diyos.