Ang Kalibutang Walay Pahulay
Kini nga kalibotana usa ka lugar nga walay pahulay. Nakita nato ang mga tawo nga nagdalidali sa pagpangita og katagbawan diha sa kalihokan. Daghang tawo ang nagsakripisyo sa ilang kinabuhi sa pagtigom og mga bahandi. Ang uban nagtinguha sa tanang kalipay sa sensual nga kinabuhi. Ang uban usab gusto og dugang nga kalingawan ug mohikay sa schedule nga motrabaho og diyutay ug mas makalingawlingaw pa. Bisan pa niana, ang ilang mga espiritu wala matagbaw. Ang mga gamit, mga kalingawan, ug mga kabtangan sa ngadtongadto mawad-an na sa ilang madanihon nga kinaiya. Ang matag bag-ong kalingawan makapahimuot sa usa ka panahon apan sa madali lang mawala ang iyang kailibgon. Morag adunay kulang gayud.
Kitang tanan adunay mga kapakyasan. Ang atong mga kalihokan limitado sa atong pisikal nga mga katakos. Ang mga membro sa pamilya nagkinahanglag kanunayng pag-atiman. Kita mobati nga natanggong sa usa ka trabaho tungod kay kita walay kahanas sa paghimog laing trabaho. Mogasto kita og kuwarta ug mangutang nga naglaom nga ang sunod nga pagpalit maghimo sa kinabuhi nga mas madahom. Ang atong kaminyoon dili sama sa atong gidahom. Walay kapuslanan ang atong pagpangita sa katumanan ug katuyoan.
Mao ba kini ang tibook nga kinabuhi? Dili ba angay nga adunay usa ka butang nga makahatag kanato og katagbawan, usa ka butang nga mas permanente? Sa pagkatinuod, adunay solusyon man.
Unsa man ang kinabuhi?
Ang kinabuhi usa ka bililhon nga gitas-on sa panahon nga gihatag kanato sa Magbubuhat. Ang Bibliya nag-ingon nahisama kini sa anino (1 Cronicas 29:15); ingon nga mubo sama sa mga tanum ug bulak (1 Pedro 1:24); ug ingon nga mawala ingon usa ka alisngaw (Santiago 4:14).
Samtang kita batan-on kita makakita nga ang kinabuhi molungtad og daghang tuig. Samtang kita nagkatigulang, ang panahon morag nagkadali. Kita wala makakab-ot sa atong gilaoman kaniadto. Kita mawad-ag paglaom tungod sa nagkalainlaing mga babag nga nagdili sa atong paagi sa pagkinabuhi.
Unsa man ang problema?
Unsa ang hinungdan sa pagkadismaya sa sulod nato?
Ang kinabuhi maoy usa ka kahigayonan apan usab usa ka responsabilidad. Kita dili malipay kon kita mosupak sa maayo nga atong nahibaloan nga angay natong buhaton. Ang pagpakasala batok sa atong isigkatawo magdala og kasubo ug pagkasad-an. Ang pagpakasala batok sa atong kaugalingon adunay makadaot nga mga epekto sa atong kalinaw sa hunahuna. Kita mobati nga responsable sa atong mga buhat.
Kadaghanan sa mga tawo mobati nga ang kinabuhi maoy bahin sa mas dakong hulagway kay sa ilang mubong mga tuig dinhi sa yuta. Alang sa kadaghananan kini nagkahulogan nga kinahanglan nilang ilhon ang mas taas nga espirituwal nga gahom, usa ka mas dakong katuyoan nga naglihok sa uniberso. Sila tingali dili kanunay mahibalo kon kinsa o unsa kana.
Kasagaran ang mga tawo dili matagbaw sa kinabuhi tungod kay dili nila kini makita gikan sa panglantaw sa Diyos. Sila walay alamag sa kabubut-on ug katuyoan sa Diyos alang sa tawo, usahay kinabubut-on nga walay mahibalo. Daghan ang napakyas sa paghanduraw sa walay-kataposang kalipay sa mga matinumanon ug mas gusto nga dili maminaw sa kataposang paghukom sa mga daotan ug mga dili-diyosnon (Roma 6:23).
Ang Madagayaong Kinabuhi Abli
Si Jesus miingon diha sa Juan 16:24, “Hangtod karon wala pa kamo mangayo ug bisan unsa sa akong ngalan: pangayo, ug kamo makadawat, aron ang inyong kalipay mahingpit.” Ang kalipay nga gihatag ni Jesus dili dali nga makuha gikan sa kasingkasing sa usa ka Kristohanon.
Sa mga higayon mabug-atan kita tungod sa mga tentasyon. Apan ang kalipay gikan sa presensya sa Balaang Espiritu nagkalalom. Tingali dili kini ang pagbula-bula, gaan nga pagbati sa tanan nga panahon apan ang usa ka yano nga kalmado nga pagsalig sa Ginoo nagtugot kanato nga mobarug nga dili matarug sa pagsulay ug dili matandog sa bagyo.
Ang uban tingali mosulti kanimo nga ang Kristohanon nga paagi sobra ka higpit nga matagamtaman. Tingali maghunahuna sila nga aron magmalipayon ka kinahanglan nga mahimo nimo ang gusto nimo. Sulayi lang ang Ginoo! Makita nimo nga makalipay ang pag-alagad sa Usa nga namatay alang kanimo. Mahimong klaro na kanimo nga ang tawo nga nag-alagad sa iyang kaugalingon mao gayod ang naulipon ug ang ulipon ni Kristo mao ang tawong gawasnon.
Ang tinuod nga katagbawan dili makaplagan diha sa pagsunod sa mga uso o sa paghimo sa atong mga kinabuhi aron magpabilib sa uban. Ang maong matang sa pagkinabuhi mahimong mapugosong puwersa diha kanato ug magdala ngadto sa pagkaulipon. Kon kita mapainubsanon kita gawasnon. Libre nga magpaka-kita (Free to be ourselves). Libre sa pagpahulay sa atong mga hunahuna gikan sa pagkabalaka ug kon unsay hunahunaon sa uban bahin kanato.
Si Jesus Nagtanyag ug Kinabuhi nga Takos sa Pagkinabuhi
Sa Mateo 11:28 atong mabasa, "Umari kanako, kamong tanan nga nagabudlay ug nabug-atan, ug ako magapahulay kaninyo". Dinhi gitanyag ni Jesus ang kapahulayan sa tanan kansang palas-anon morag mas dako kay sa ilang madala, kansang kinabuhi walay katuyoan, kansang kinabuhi wala matuman.
Umari ka sa Ginoo ug ihatag Kaniya ang imong palas-anon nga sala, ang imong kawalay-katagbawan, ang imong wala matuman nga kahaw-ang, ug ang imong kapakyasan. Dawata ang imong kawalay-katakos sa pagsagubang sa mga suliran sa kinabuhi. Likayi ang imong nahibaloan nga sayop sa imong kinabuhi. Itugyan ang imong kinabuhi kang Jesus. Salig Kaniya nga mokupot kanimo ug mogiya kanimo.
Sa dihang imong masabtan nga nagkinahanglan ka og tabang sa imong kinabuhi, ikaw makaadto kang Jesus ug makadawat nianang tabang. Hangtod nga mobati ka nga independente ug sa kaugalingon igo, Siya walay mahimo alang kanimo. Sa dihang itugyan nimo ang imong kaugalingon sa iyang pag-atiman, adunay paglaom alang kanimo.
Si Jesu-Kristo makapatagbaw sa kinahiladman nga tinguha sa imong kalag. Itugyan ang imong kinabuhi ug kabubut-on ngadto Kaniya. Samtang ikaw mangayo Kaniya sa pagpuno kanimo sa iyang kadagaya, ang kinabuhi sa tibuok niini nga kahingpitan mahimong imo.