- Ang tawo milingkod sa bangko sa parke ug nagbutang sa iyang ulo diha sa iyang mga kamot. Adunay usa ka dagway sa kaguol diha kaniya. Ang iyang lig-ong mga sapatos sa trabaho nagkadunot, ug ang iyang jaket daan kaayo. Siya nag-inusara nianang bugnaw nga adlaw sa tingtugnaw
- Gikuha sa batan-ong babaye ang iyang bawnanan sa paniudto ug mitan-aw sa palibot. Kang kinsa man kaha siya motapad karon, o hinoon, kinsa ang motapad kaniya? Nahadlok nga wala'y magkagusto sa iya nga makigtapad, ug miadto siya sa usa ka lamesa sa eskina. Usa ka panghupaw, katunga sa adlaw pa ang nahuman. Nagpuyo siya nga adunay pagkasinalikway ug pang-abuso ... una gikan sa iyang pamilya, ug karon gikan sa iyang mga higala ug mga kauban sa eskwelahan. Aduna bay kaikyasan?
- Miagi ang tungang gabii, unya ala una, alas dos, alas tres nga takna sa dihang ang tawong walay katulog samtang naghigda sa higdaanan sa usa ka hotel. Kahuman sa pipila ka oras siya ginahandom para sa panon sa mga tawo, magpahungaw sa ilang mga gibati, ug maglipay diha sa ilang mga katawa ug pagdayeg. Apan nganong naguol man? Dili kini ang paagi nga angayng mahitabo. Iya nakab-ot ang kabantog ug bahandi apan walay kalinaw sa hunahuna.
- Naghigda siya nga wala'y paglihok, makit-an ang kasakit sa tudling sa iyang kilay. Nagsugod kini, mga tuig na ang milabay nga adunay pagkawala sa iyang gibati sa tiilan, unya sa iyang mga tudlo. Karon ang iyang mga bukton ug mga tiil walay kapuslanan, ug ang komunikasyon nahulog ngadto sa usa ka paghunghong. Nagpuyo siya ilalom sa usa ka bug-at nga kupo sa depresyon. Unsa man ang katuyoan sa pagkinabuhi? Alang unta sa usa ka tawo nga makasabut og nagpakabana!
Kining mga butanga ug daghan pang uban pang mga kahimtang nag-abot sa mga tawo sa tanang nasyonalidad ug kultura. Daghang mga tawo, batan-on ug tigulang, nag-atubang og mga sakit nga walay tambal. Kada tuig, daghang tawo ang mamatay tungod sa sakit nga dili na maantos. Ang kakulang sa pagkaon, tubig, sinina, ug igong puy-anan maoy tinuod gayod nga mga kahimtang nga nagsamok sa milyon-milyong mga tawo.
Daghang mga tawo ang nagsalikway sa Dios ug nagpangita sa yutan-ong mga relasyon ug mga makit-an ra nga mga tinguha. Kini naghimo sa lawas ug kalag nga walay pahulay ug walay sulod. Kasagaran gibasol sa mga tawo ang Diyos sa ilang mga kasamok. Ang mga naguba nga mga damgo, napakyas nga mga kaminyoon, pagkaguba sa pinansyal, pag-abuso, pagsalikway, droga, ug alkoholikong ilimnon nakadugang sa depresyon ug paghikog o pagpakamatay sa kalibutan karon.
Sa sinugdan ang Diyos naglalang og usa ka hingpit nga kalibotan. Siya nakatagamtam og suod nga relasyon kang Adan ug Eva, ang unang mga tawo nga iyang gilalang. Si Satanas, ang kaaway sa Diyos, sa wala madugay misulod sa Hardin sa Eden ug naglinla kanila sa pagkadili-masinugtanon sa Diyos. Tungod sa ilang pagkadili-masinugtanon, naputol ang ilang pakig-uban sa Diyos. Si Satanas mao ang hinungdan sa sala ug pagkadili-matarong. Si Jesus miingon mahitungod kaniya, "Ang kawatan dili moanhi, dindili aron makapangawat, ug sa makapatay, ug sa makapanglaglag" (Juan 10:10). Ikaw ug ako mao ang mga tumong sa kasuko ni Satanas, ug buot niyang laglagon ang atong lawas ug kalag sa impiyerno.
Si Jesus mao ang tubag! Siya ang atong paglaom! Iyang gikuha ang atong mga sala diha sa Iyang kaugalingon, ug nagpakamatay sa krus sa Kalbaryo aron nga ang atong relasyon sa Diyos mahibalik. Kining bag-ong relasyon sa Diyos maghatag kanato og paglaom. Si Jesus miingon, "Ako mianhi aron sila makabaton og kinabuhi, ug aron sila makabaton niana nga madagayaon. Ako mao ang maayong magbalantay: ang maayong magbalantay nagahatag sa Iyang kinabuhi alang sa mga karnero" (Juan 10:10-11). Si Jesus nagdapit sa tanan nga mga tawo, "Umari kamo kanako, kamong tanan nga nagabudlay ug nabug-atan, ug hatagan ko kamo og pahulay" (Mateo 11:28).
Gusto ni Jesus nga motuo kita Kaniya. Sa dihang kita maghinulsol ug mosugid sa atong sala, ang Diyos maminaw sa atong mga pag-ampo. Siya mopasaylo kanato ug modawat kanato ngadto sa iyang pamilya. Ang Diyos nagpanalangin sa iyang mga anak pinaagi sa kanunayng presensiya sa Balaang Espiritu. "Kay ang Dios wala maghatag kanato sa espiritu sa kahadlok; apan sa gahum, ug sa gugma, ug sa maayong panghunahuna ". (2 Timoteo 1:7).
Ang kapasayloan sa Diyos maoy maka-palingkawas kanato. Ang pagsalig sa Diyos maghatag og kalinaw sa atong kasingkasing ug hunahuna. Ang kinabuhi makabaton og bag-ong kahulogan ug katuyoan. Bisag unsa pay atong kahimtang sa kinabuhi, kita may paglaom! Kining maong paglaom motabang kanato sa pagsagubang sa mga bagyo ug mga pagsulay sa kinabuhi. "Nagpaabot nianang bulahan nga paglaom, ug sa mahimayaong pagpakita sa dakong Diyos ug sa atong Manluluwas nga si Jesu-Kristo" (Tito 2:13).