Anaa kang Kristo ang seguridad sa tanan nga mga Kristohanon. Namatay Siya alang kanato, gipasaylo kita Siya, ug nagsaad Siya og lugar sa langit alang sa mga matinumanon. Didto, kita magpabilin nga may seguridad diha sa iyang presensya. Bisan karon nga panahon ang mga Kristohanon adunay kasegoraduhan sa kaluwasan kung sila magpabiling matinumanon, samtang buhi pa sila, uban kanila ang giya sa balaang espirito, ug sila mamatay, anaa ang saad nga puloy-anan sa Langit.
Ang Pagtubos nga Magamitan sa Tanan
Gilalang sa Dios ang tawo sa katuyoan sa pagpasidungog ug pahimaya sa Iyaha. Nasabtan daan nga mahulog ang tawo, giplano sa Dios gikan sa pagmugna sa pagtubos kaniya (Mateo 25:34). “Kay gihigugma sa Dios ang kalibutan, sa pagkaagi nga gihatag Niya ang Iyang Anak nga bugtong, aron ang tanan nga motoo Kaniya dili mawala, kondili may kinabuhi nga walay katapusan. Kay ang Dios wala magpaanhi sa Iyang Anak sa kalibutan aron sa paghukom sa silot sa kalibutan, kondili aron ang kalibutan maluwas tungod Kaniya” (Juan 3:16-17). Kini nga pagtubos alang kini sa katawhan, ingon sa gipahayag ni Jesus sa dakong pagdapit: “Umari kanako kamong tanan nga gikapuyan ug gibug-atan, ug papahulayon ko kamu” ( Mateo 11:28).
Kapalaran o Pagpili
Ang uban nagtudlo nga gedesisyonan na sa Dios ang tanan nga nahitabo kanato. Sumala niini nga doctrina, ang ubang tawo gipili na sa kinabuhing dayon ug ang uban ngadto sa walay katapusang kamatayon. Ang ilang katapusang kaugmaon wala madepende sa ilang kaugalingong pagtoo ug personal nga pagpili, apan sa gipili sa Dios alang kanila. Ang uban usab nagtoo nga kung ang usa ka makasasala natawo pag-usab, imposible na kini nga makuha pa kini ni satanas ngadto sa pagpakasala utro. Sila nagtudlo usab nga ang pagpakatawo pag-usab nagpamatuod sa usa nga gipili alang sa langit ug wala nay kondisyon ug luwas sa kahangturan.
Gitudlo sa Biblia nga adunay klaro nga sugo nga gihatag kang Adan ug Eva. Gipili nila ang pagsupak, ug tungod niana gisilotan sila. Diha sa kasulatan, gitudloan ang tawo nga responsabilidad niya ang pagpili sa matarong ug dautan, sa kinabuhi ug sa kamatayon. Giawhag ni Moises ang mga taga Hebreohanon, “Busa pilia ang kinabuhhi” (Deutronomio 30:19). Si Josue miingon, “Magpili kamu karong adlawa kung kinsa ang inyong alagaron” (Josue 24:15). Sa walay pagduha duha, mahimu man unta ni Adan ug Eva ang pagpili sa pagsunud, ikaw ug ako makahimu sa pagpili. Kung atong pillion ang dalan sa sala, pagasilotan gayud kita (Roma 6:23).
Gusto sa Dios nga ang Tanan Maluwas
Ang usa ka nangunang prinsipyo nga nagatudlo sa pulong sa Dios mao kini: Kabubot-on sa Dios nga ang tanang tawo maluwas. “Nga nagatinguha sa tanang mga tawo nga mangaluwas, ug nga makadangat sa pag-ila sa kamauoran” (1 Timoteo 2:4). “Apan Siya may pagkamapailubon alang kaninyo, sanglit dili boot nga may bisan kinsa nga mawala, kondili nga ang tanan makadangat sa paghinulsol” (2 Pedro 3:9). Kinahanglan natong tapuson nga kadtong magaantus sa impyerno dili mahiadto sa impyerno, kondili kadtong dili magbasol ug dili motoo.
Gihigugma gayud sa Dios ang kalibutan nga “Ang tanan nga mutoo Kaniya dili mawala, kondili may kinabuhing walay katapusan” (Juan 3:16). Ang iyang pagtubos klaro nga dili lamang alang sa mga pipila nga mga pinili kondili para kini sa tanan. Maglipay kita, “Kay ang gracia sa Dios nga nagadala sa kaluwasan nagpakita sa tanang mga tawo” (Tito 2:11).
Ang Kaluwasan Adunay Kondisyon
Kahuman ni Pedro maghatag ug talagsaon nga paagi alang espiritohanon nga pagtubo, gi-awhag ni Pedro angg magtotoo nga dawaton ang “Daku ug bilihon nga mga saad” ug aron madugangan ang ilang kinabuhi sa lainglaing mga hiyas sa Kristohnon. Kahuman giingnan niya ang mga matinuohon: “Hatagi ug labi pang kakugi gayud ang pagtino sa pagtawag ug sa pagpili kaninyo: kay kong pagabuhaton ninyo kining mga butanga, dili gayud kamu mahipangdol” ( 2 Pedro 1:10). Kining gamay nga pulong nga “kong” gigamit kini sa kasulatan sa makadaghang panahon, nagpakita nga ang kaluwasan nagdepende sa pagkamatinumanon sa tawo. Si Jesus miingon, “Busa tungod sa ilang mga bunga maila ninyo sila” (Mateo 7:20).
Unsa man boot pasabot ni Jesus sa dihang miingon Siya, “Ug walay bisan kinsa nga makahimo pag-agaw kanila (akong mga carnero) sa kamot sa akong amahan”? Tan-awa sa Juan 10:27-29. Sa pagsusi ko sa kasulatan, atong makita ang duha nga kinahanglanon kong ang mga carnero gusto nga makaangkon sa pag-atiman sa amahan. Kinahanglan sila “mamati sa iyang tingog,” ug kinahanglan sila “musunod” Kaniya uban ang pagkamasulundon. Walay tawo o gahum ang pwede makakuha sa mga magtotoo gikan sa pagtipig ni Cristo. Pero, kong ang usa ka carnero magdumili pagpaminaw ug pagsunud sa magbalantay, siya sa dili madugay mahilayo gikan sa kiliran sa magbalantay.
Ang usa ka makakasala nga mitubag sa tawag sa kaluwasan ug naluwas, siya musunud kang Cristo. Gitudloan ni Jesus ang iyang mga tinun-an sa pagtudlo sa mga nabautismohan na nga mga magtotoo nga “Managbantay sila sa tanang butang nga gisugo ko kaninyo” (Mateo 28:20). Siya nagpabana nga sila “Musunud sa Iyang mga lakang” (1 Pedro 2:21) aron magpabilin nga luwas. Mao kini ang kondisyon sa atong kaluwasan.
Ang Pagkahulog Possible
Sa Mateo 18:15-17 si Jesus nagtudlo nga ang usa ka magtotoo nga nakasala ug nagdumili sa mga badlong, ang mahitabo mawala kaniya ang kaluwasan. Kini nga paagi naghatag og direkyon sa simbahan aron sa pag-atiman sa mga dili matinumanon nga mga membro. Susama nga panghunahuna nga kanunay gibalik ni Jesus sa iyang pagsangyaw mahitungod sa bagon ug mga sanga. “Kong ang tawo dili mopabilin kanako, igasalibay siya sama sa usa ka sanga ug magamala ug ilang pagatigumon sila, ug igasugnod sa kalayo; ug mangasunug sila” (Juan 15:6). Dinhi klaro nga gisulti ni Jesus nga ang adunay sanga (usa ka magtotoo) sa bagon apan wala magapadayun sa iyang doctrina, siya magaantus!
Sa 2 Pedro kapitolo 2, ang mga apotoles nagsuwat mahitungod sa katawhan “Nga namiya sa dalan nga matuod, nanghisalaag sila” (bersikulo 15). Klaro kaayo nga ang iyang gihisgotan mao ang mga sad-an nga mga magtotoo ug ang paghukom sa Dios ngadto sa ilang pagkahulog. “Kay kong, sa tapus sila makabulag sa mga kahilayan sa kalibutan pinaagi sa kahibalo sa atong Ginoo ug Manluluwas nga si Jesu Kristo, didto nagapus sila pag-usab, ug nadaug, ang ilang kaulahian nga kahimtang labi pang dautan kay sa nahauna. Kay labi pa unta nga maayo alang kanila nga wala nila hiilhi ang dalan sa pagkamatarung, kay sa managsibog sila gikan sa balaang sugo nga gitugyan kanila sa tapus nila maila kini” ( birsikulo 20-21).
Ang pagtulon-an sa walay katapusang seguridad wala matukma sa doktrina ug sa pagdisiplina sa simbahan ingon sa gitudlo ni Kristo ug sa mga Apostoles.
Adunay Hinungdan ang mga Pahimangno sa Biblia
Si Jesus sa kanunay nagpahimangno sa iyang mga disipolo nga magmabinantayon: “Panagtukaw, ug panag-ampo, aron dili kamu mahasulod sa panulay” (Marcos 14:38). Tan-awa sa 1 Pedro 5:8, Mateo 24:24, Marcos 13:35-37, Lukas 18:1, Mga Taga-Efeso 6:11, 1 Mga Taga-Corinto10:12, “Mag-matngon kamu aron dili kamo madala sa kasaypanan sa mga masupilon, ug mahulog kamo gikan sa inyong kaugalingong kalig-on” (2 Pedro 3:17). Gisulat ni Pablo ang bahin sa panginahanglan sa pagdisiplina sa iyang kaugalingon nga kinabuhhi ug gihatag kini nga hinungdan: “ Kay tingali sa human ako makamantala sa uban, ako sa akong kaugalingon igasalikway” ( 1 Mga Taga-Corinto 9:27).
Mga Ehemplo sa Biblia alang sa mga Backslider
Ang Kasulatan naghisgot ug mga pananglitan nga mga tawo nga kanhi mga Kristohanon apan nahimong dili matinumanon.
Kang Judas Escariote, si Jesus nag-ingon, “Wala ko ba pilia kamong napulo ug duha, ug usa kaninyo maoy usa ka yawa?” ( Juan 6:70). Ang uban tingali moingon nga dili siya usa ka tinood nga sumusunod. Hatagan ba ni Jesus si Judas sa pagka-apostol kung dili siya luwas? Ipadala ba Niya siya aron magwali, mag-ayo, ug maghingilin ug mga yawa? Dili kini makatarunganon. Si Pedro miingon kang Judas. “Kay siya giisip nga kauban namo ug siya nakaambit niini nga ministerio, tungod sa pagkahulog ni Judas” (Buhat 1:17-25). Mahulog ba siya kung wala siya maluwas?
Ang libro sa Pinadayag nagsulat sa mga mensahe sa Ginoo alang sa pito ka mga simbahan sa Asia ug naghangyo ngadto sa mga makasasala sa paghinulsol, kon sila dili maghinulsol, ang Ginoo nag-ingon nga ang ilang ngalan mapapas sa libro sa kinabuhi. Pananglitan, ang lider sa taga-Efeso, nakadawat og daghang pagdayeg, apan iyang gibiyaan ang iyang unang gugma. Ang mensahe nagpadayun: “Busa hinumdumi kong diin ikaw mahulog, ug maghinulsol ka, ug buhata ang unang mga bulohaton; kay kong dili, moanha ako kanimo, ug pagakuhaon ko ang imung tangkawan sa iyang dapit, gawas kong ikaw maghinulsol” (Mga Bugna 2:5). Ang mensahe sa matag pito ka Iglesia natapos sa usa ka saad sa usa nga “nga nidaug”. Ang taktika ni Satanas ingon niana mao nga ang mga magtutoo kinahanglan sa kanunay magbantay aron dili sila mapukan. Pinaagi lamang sa grasya sa Dios ug sa Iyang Espiritu mahimu kitang mananaug.
Kinsa ba ang Gipili Alang sa Langit?
Kadaghanan sa Roma kapitulo 8 gipahinungod kini sa “ Kinabuhi diha sa Espiritu”. Sa wala madugay kini nahimong dayag nga aron maluwas kita kinahanglang maglakaw sumala sa espiritu (birsikulo 1), Espirituwal nga manghunahuna (birsikulo 6), dili magkinabuhi uyon sa unod (birsikulo 13). Ang ingon niana nga balaang pagkinabuhi importante sa kaluwasan. Gitawag sa Dios ang tanan ngadto sa kaluwasan busa, walay tawong gitakdang malaglag. Sa pagkatinood nakita sa Dios ang umaabot apan ang pagkahibalo sa Dios wala makaapekto sa bisan unsang paagi sa pagpili sa tawo kung unsa ang iyang gusto ning kinabuhia. Kining bahina sa pag-ila sa Dios mao ang basehan sa gisulat ni Pablo sa Efeso 1:4-12. Ang laing matahom nga kamatuoran gipadayag niining mga bersikuloha. Alang niadtong mupili sa Dios ug sa iyang dalan, ang Amahan naghimo og dakong pagpangandam alang sa ilang byahe paingon sa langit. Siya modawat kanila ingon nga iya ( bersikulo 6), naghatag og kapasayloan sa mga sala ug pagtubos ( bersikulo 7), naghatag kanila sa kaalam ug pag-amping (bersikulo 8), nagpaila kanila sa iyang kabubut-on ug katuyoan alang sa ilang mga kinabuhi (bersikulo 9),nagsaad sa pagtigum kanila (bersikulo 10), ug naghatag alang kanila og usa ka kabilin ingon nga mga anak sa iyang pamilya (bersikulo 11). Gihimo sa Amahan ang matag gikinahanglan nga pagpangandam, ug sa kini nga pagsabut, aduna nay “gipili” alang sa himaya. Kon ang magtutoo mapakyas sa pagkab-ot sa tumong, siya ang napakyas, dili ang Amahan.
Pananglit usa ka hinigugma nga higala gikan sa layo, nagdapit kanamo aron sa pagduaw kaniya. Kay nahibalo siya nga wala kami kwarta alang sa byahe iya kaming gipadalhan og kwarta aron aduna kami magamit sa amung panaw, ug nagsulti usab siya kanamo mahitungod sa mga banko nga kung diin asa kame makakuha ug dugang. Nagpadala siya kanamo og usa ka detalyado nga mapa diin gipasiugda ang among ruta. Lakip ang daghang mga timailhan nga naghulagway sa mga landmark sa dalan, mga agianan, gipang-ayo nga mga dalan, mga lugar nga adunay peligro, mga lugar nga maayo alang sa pagpahulay.
Dugang pa sa mga instrucksiyon sa among higala nagtug-an kanamo sa mga dapit diin makapalit kami og maayong pagkaon, ug mga dapit nga puy-anan diin kami makapahulay sa gabii. Gidugang sa imbitasyon mao kini ang nakasulat: “Ania ang akong numero sa telepono. Kung mawala kamu sa dalan o adunay problema ang imung sakyanan, tawag lang kanako ug ako magpadala og tabang kanimo. Palihog.pagdali kamu sa pag-ari.
Kini maoy usa ka pananglitan sa gibuhat sa Dios ug ginabuhat pa niya alang kanato. Kung kita magsunud sa Iyang Mapa aduna kitay kasigurohan ug atong gamiton ang mga kahinguhaan nga iyang gitagana. Wala’y hinungdan nga dili kita makaabot ngadto sa balay sa atong Amahan. Ugaling lang, sama sa ilustrasyon, kita makapili og laing dalan, mopili sa pagbyahe sa laing dapit, o mopili sa paggamit sa mga butang nga magpadayun sa mga dili maayong kalingawan o magpalit sa mga dili maayong butang, sa ingon niini nga paagi dili gayud kita makaabot sa ating tumong. Ang Dios naghimo og usa ka paagi aron kita makaadto sa langit, ug ang mga prinsipyo sa Biblia nagtudlo kanato nga ang pagtuo kang Kristo ug ang pagkinabuhing balaan mao ang paagi nga mahimung posible kini. Gibuhat sa Dios ang iyang labing maayo. Karon kinahanglang buhaton nato ang atong bahin. Siya nagbuhat kanato. Iyang gibuhat usab ang langit alang kanato. Makasubo hunahunaon, si Satanas naningkamot sa pagbungkag sa plano sa Dios. Ang atong katungdanan mao ang pagsukol niining dautang pwersa, sa atong pagtugyan sa atong kinabuhi ngadto Kaniya, aron mamati sa mga pasidaan sa pulong, ug sa pagkinabuhi nga balaan. Dayon, kay nabuntog naman nato ang kalibutan, kita makahulat na sa iyang ikaduhang pagbalik uban ang pagsalig.