“Busa kon ang Anak magahatag kaninyog kagawasan, kamo tinuod nga mahimong gawasnon” (Juan 8:36).
Ang tanan gusto nga mahimong gawasnon. Ang kagawasan sa pagsulti, hunahuna, relihiyon, ug balita maoy pangunang butang sa daghang katilingban sa kalibotan karon. Nakita sa katilingban nga gikinahanglan ang pagpugong sa kagawasan sa mga malapason sa balaod, aron tugotan ang uban sa pagtagamtam sa ilang hustong kagawasan. Mao kana ang hinungdan sa paglungtad sa mga bilanggoan. Ang mga tawo nga molapas sa mga balaod sa nasod mahimong mapiriso.
Ang mga tawo ba tinuod nga gawasnon samtang nagtagamtam sa mga kagawasan nga gihisgotan, o kadaghanan kanila anaa ba sa laing matang nga bilanggoan? Ang Bibliya nagtudlo kanato nga ang mga tawo mahimong naulipon bisan pa og sila nangitag kagawasan. Kung ang usa ka tawo nga nagsulti ug usa ka bakak makakaplag sa iyang kaugalingon nga naulipon sa maong bakak, ug sagad maduso sa pagbakak pag-usab aron sa pagtabon sa unang bakak. Ang mga tawo nga misugod sa pagpanigarilyo, pag-inom, o paggamit ug mga droga makakat-on sa ulahi, sa dihang buot na nilang mohunong, nga sila dili makahimo. Adunay mga kaminyoon nga naguba tungod lamang sa kalingawan ug muabot sa pagpili kung ang kalingawan ba o ang pamilya. Kini maoy mga pananglitan sa pagkaulipon nga gidala sa sala.
Ang pagkaulipon sa sala kaylap ug ang tanan natawo nga makasasala. Ang Bibliya nag-ingon kanato, “Kay ang tanan nakasala, ug nawad-an sa himaya sa Diyos,” ug "Wala ba kamo mahibalo nga kon kamo magtugyan sa inyong kaugalingon ngadto kang bisan kinsa ingong mga ulipon aron sa pagsunod kaniya, kamo mga ulipon niya nga inyong gisunod, kon bahin sa sala ngadto sa kamatayon o sa pagkamasinugtanon ngadto sa pagkamatarong?" (Roma 3:23; 6:16). Tan-awa usab ang Roma 3:10. Samtang kita anaa pa sa atong mga sala, kita anaa sa espirituhanon nga bilanggoan.
Sa unsang paagi kita maluwas? Ang tinuod nga kagawasan, tinuod nga kalipay, kagawasan gikan sa kahadlok, ug kagawasan gikan sa pagkasad-an ug paghukom, mahimong moabut lamang kon kita makigdait sa Diyos ug ang atong mga kinabuhi nahiuyon sa iyang kabubut-on. Sa laing bahin, ang pagkaulipon maoy resulta sa pagtinguha sa bakak nga saad ni Satanas nga kagawasan. Atong susihon ang mga pulong sa atong Manluluwas, nga si Jesu-Kristo, “Ang Espiritu sa Ginoo anaa kanako, tungod kay siya nagdihog kanako sa pagwali sa ebanghelyo ngadto sa mga kabus; siya nagpadala kanako sa pag-ayo sa mga naguba nga kasingkasing, sa pagwali sa kagawasan ngadto sa mga binilanggo, ug sa pagpahiuli sa panan-aw ngadto sa mga buta, sa pagpagawas sa mga nasamdan” (Lucas 4:18).
Aron maluwas gikan sa sala, kinahanglang atong dawaton una nga kita makasasala ug naulipon. Kinahanglang maghinulsol kita sa atong mga sala. Ang paghinulsol naglakip sa kasubo tungod sa atong sala ug pagbiya sa sala. Alang sa uban, lisod kini o imposible. Kon kita magmatinud-anon ug maningkamot, ug magtawag sa Diyos alang sa tabang ug sa kapasayloan sa sala, ang Ginoo magmando kanato sa tanang lakang ngadto sa pagkabig sa kasingkasing. Kinahanglang dawaton nato ang kaluwasan ug kapasayloan pinaagi sa dugo ni Jesus diha sa pagtuo. Atong mabasa diha sa Bibliya, "Nga diha kaniya kita adunay katubsanan pinaagi sa iyang dugo, bisan ang kapasayloan sa mga sala" (Colosas 1:14). Tan-awa usab ang Roma 3:24-25; Roma 5:1; Roma 6:23; Buhat 3:19; ug Juan 3:3.
Unsa ang mga epekto niini nga espirituhanon nga kagawasan? Kung ang usa ka tawo tinuud nga natawo pag-usab ingon nga gihulagway sa ibabaw, ang iyang mga sala nahugasan, ug siya adunay usa ka libre nga consensya. Siya karon adunay gahum batuk sa mga dautang tinguha. Imbis magpadaog sa mga tentasyon, siya karon makasukol sa mga tinguha sa unod. Siya nagkinabuhi na ug bag-ong kinabuhi diha kang Kristo ug ang iyang mga tumong lahi na. Imbis magkinabuhi lamang sa pagpahimuot sa iyang kaugalingon, siya karon nagtinguha sa pagpahimuot sa Diyos ug pagtabang sa uban. Lahi na ang iyang sinultihan ug ang paggamit sa iyang oras. Siya nalipay sa mga hagit sa kinabuhi nga karon napuno sa katuyoan ug direksyon. Labing maayo sa tanan, kining maong kagawasan nagdalag kasigurohan sa kinabuhing walay kataposan sa langit. Bisan sa mga bilanggoan, kining kagawasan sa espiritu ug kasingkasing mahimong usa ka kamatuoran. Atong mabasa, “Busa kon ang bisan kinsa nga tawo nga anaa kang Cristo, siya usa ka bag-ong linalang: ang daang mga butang nangagi na; tan-awa, ang tanang mga butang nahimong bag-o” (2 Corinto 5:17). Tan-awa usab ang Galacia 5:13.
Jesus, Ako Moduol
Gikan sa akong pagkaulipon, kasubo ug kasakit,
Jesus, ako moduol, Jesus, ako moduol;
Ngadto sa imong kagawasan, kalipay ug kahayag,
Jesus, ako moduol kanimo;
Gikan sa akong sakit ngadto sa imong kahimsog,
Gikan sa akong panginahanglan ug sa Imong bahandi,
Gikan sa akong sala ug ngadto sa Imong Kaugalingon,
Jesus, ako moduol kanimo.
Gikan sa akong makauulaw nga kapakyasan ug pagkawala,
Jesus, moduol ako, Jesus, moduol ako;
Ngadto sa mahimayaong ganansya sa imong krus,
Jesus, ako moduol kanimo;
Gikan sa mga kasub-anan sa yuta ngadto sa Imong kalipay,
Gikan sa mga bagyo sa kinabuhi ug ngadto sa imong kalinaw,
Gikan sa kaguol ngadto sa malipayong salmo,
Jesus, ako moduol kanimo.
William T. Sleeper