Si Jesus ang Imung Higala
Aduna ako’y usa ka higala. Siya maoy akong pinakasuod nga higala. Usa Siya ka bootan ug gusto ko nga ikaw makaila usab Kaniya. Jesus ang Iyang pangalan. Hingyap usab Niya nga mahimu ka Niyang higala.
Togoti ako sa pagsulti kanimo mahitungod Kaniya. Mabasa nato kini nga storya sa Biblia. Ang Biblia usa katinood. Pulong kini sa Dios.
Ang Dios maoy naghimo sa kalibutan ug ang tanan nga ania niini. Siya ang Dios sa langit ug sa yuta. Siya naghatag og kinabuhi ug gininhawa sa tanang butang.
Si Jesus anak sa Dios. Ang Dios nagpadala Kaniya gikan sa langit padulong sa yuta aron mahimong personal nga manluluwas. Gihigugma gayud sa Dios ang kalibutan (nagpasabot nga nahigugma Siya kanimo ug kanako) nga gipadala Niya ang Iyang bugtong anak, si Jesus, (aron mamatay alang sa atong mga sala) nga kung kinsa ang mutoo Kaniya dili mag-antos, kondili makadawat og kinabuhing walay katapusan (Juan 3:16).
Mianhi si Jesus sa kalibutan sama sa usa ka gamay nga bata. Ang iyang amahan mao si Jose ug ang iyang inahan si Maria. Natawo si Jesus sa usa ka kwadra ug sa pasungan Siya naghigda.
Si Jesus nagtubo uban kang Jose ug Maria ug nagtuman Siya sa ilang mga sugo. Aduna Siyay mga igsoon nga lalaki ug mga babaye nga uban Kaniya. Mitabang Siya ni Jose sa ilang gamay nga pandayan.
Sa dihang hamtong na si Jesus sa panuigon iyang gitudloan ang mga tawo mahitungod sa Iyang Amahan nga atoa sa langit. Gipakita Niya nga ang Dios nahigugma kanila. Gi-ayo Niya ang mga masakiton ug gilipay ang mga adunay problema. Suod Siya sa mga bata. Gusto Niya nga ang mga bata duol Kaniya. Aduna Siya’y oras para kanila. Ang mga bata nahigugma Kaniya ug nalipay sila uban Kaniya.
Aduna’y uban nga wala nahigugma kang Jesus. Nasuya sila, ug nasuko sila. Nasuko kaayo sila ug gusto gani nilang patyon Siya. Usa ka makalilisang nga panahon ilang gipatay si Jesus pinaagi sa paglansang sa krus. Walay nabuhat nga sayup si Jesus. Apan kinahanglan Siyang mamatay alang kanato tungod kay ikaw ug ako adunay mga sayup nga nabuhat.
Ang storya ni Jesus wala natapus sa iyang kamatayon. Ang Dios nagbanhaw Kaniya gikan sa mga minatay! Ang iyang mga tinun-an nakakita Kaniya. Ug unya sa usa ka adlaw Siya nibalik sa langit.
Karon nakakita ug nakadungog Siya kanimo. Nahibalo Siya sa tanan mahitungod kanimo ug nahigugma kanimo. Duol lamang Kaniya pinaagi sa pag-ampo. Isulti Kaniya ang tanan nimong problema ug andam Siya nga motabang kanimo. Iduko lamang ang imung ulo ug pakig-estorya Kaniya, sa bisan unsa nga panahon, sa bisan asa.
Muabot ang usa ka adlaw nga Siya mubalik! Kuhaon Niya ang tanan nga mitoo Kaniya ug dalhon ngado sa langit!
