KADOKAVE ATUM PAP KLEM TAMGLO
Non malom monit atum akematha prekjam-prekjam asonsi do penang atum akematha ke, neli sining kedunji aphan choklim ta kali lapen norokot keleji aphanta kaheno o ta kali, latum kachematha dam ke mesen lapen Arnam jonghe seta sining pedun longji pu.
Monit aphan Bible kopisi kepu ma? “Ason an apar ening pacherai thekmu lapen sopik matsi ening chini un poma?” (Jeremiah 17:9). “Kadokave atum pap klemtanglo lapen Arnam adak atur pen chingbar belang” (Romans 3: 23). “Dhoromi abang enut nat ta ave” (Romans 3:10). Kadokave atum pap klem tamglo neli nangli kadokave ta. Inut amonit habit ajo kangbodet mate kevirdet ason thak thak lo. Alangli manghusi komane vangjima pusi chonghong bom ason nanglita virdet lo ma? Nangli chini loma konatsi kedamji?
NANGLI PHAN ISI NINGTHE DO
Nangli virdetra pap angbong kerengji akam ave. Nangli matha chepesung nangne. Jisu Kristo kadokave atum aphan karengme a chethe kepijisi tovar ingpu pilo. Alangli sining anghap nangli phan ingpu pilo. Nangli inut kedukpik abang chohang chorek chot abang sitame mate keplang pik akiripo ason sitame. Nangli phan bang aman pipe tame, nangli Hemphu Jisu aphan kedengji a ot do. Alangli Bible pen pulo, “Neli long kevang abang aling aphan phlungphle detji” (John 6:37). Hemphu Jisu along nangliphan ningthe do. Alangli kadokave amonit atum aphan isipet akanghon piji. Alangli long vangnon, lapen alangli nangli pap hei-hei pen pejokji.
HEMPHU JISU NANGLI PHAN NINGKANGSAM PIJI
Kethan peklardakji aphan inut athangbang ghori isi otdong si pulo, nangli tum angbong pen komane abang vang serakra labangso a ghori ke en abang aling cheraidet long po. Class arlo inut bihek a oso pen apar mapakta dam abang ave detlo. Alangli bihek sitame labangso a ghori kacherai longlok ke anut kaprek atum ke manghu phrong lo, athema alangli tumke cherai longle det lo. Ador kedo o aghori bihek a oso si cherai long pop lo. Alangli tum lapuan akeme apor panahok det lo.
Halabangso athangbang oso aphan nong-eh kepi ason Hemphu Jisu ta nangliphan ador sopik anong-eh piji. Jisu pulo, “Kadokave anghor kardek lapen kachepaduk atum an ne long vang non, ne nanglitum aphan nangpesangji” (Matthew 11:28). Ongdung amonit labangso akehang arjusi alangliphan denglo lapen ningkangsam longlo. Alangli nangliphanta hangbom lo. Nangli, nangli methang apap pen apot nangli ning kasiksak ave ma? Labangso akasiksak pen apot nangli chethe along akesung avema? Pap ado kedo pen apot nangli kamatha along akesung doma? Tangte nangliphan pesangji pu kehang bom a Hemphu Jisu Kristo adung vangnon. Kedamtang nangli keklem a pap hei hei dia detji lapen pejok detji. Nangli kematha akesung doan alangliphan hodaidet non alangli nangliphan mathapo. Lasi nangli pap anghor an alangli inghor ponpo. Alangli nangliphan ari jarsi hangbom. Nangli non mamat alangli dung dam non.
ALANGLI EKEPI ADAN NON NANGLI DENG NON.
Bihek a oso abang alangliphan kethan abang alam arjusi akengkam chejorsi ghori mate nong-eh denglo. Lapuson thak thaksi Hemphu Jisu nangliphan kepiji pu anong-eh nangli ta deng non.
Nangli ning arlo labangso anong-eh kelongji aphan klem nangji? Tangte arju ik tha Arnam alam pen pulo, “Hemphu Jisu aphansi kroinon anke nangli lapen nangli monit atum kejok longpo” (Akam 16:31). Nangli mek ingpura langtha nangli pap pen ajok nangli menthang chemathaji, neli kejokji aphan thangnat ta ningthe kave abangle kopusi Arnam angno patebokji ma? Bonta Arnam pulo, “Anghor kardik lapen kachepaduk atum ne dung le vang non” (Matthew 11:28). Bonta Arnam nangliphan lapu le kepu kali,aphrangsi nangtum apap anghor chevar ra cham pangthir etra ne dung vangnon. Nangli keklem apap hei -hei kardom pen alanglilongpen dia longji. Kachepabi pen methang apap hei-hei chekobir non. Lapen aphi nangli komat a birodhe si pap klemlo ma, nangli halatum pen dia chohang non, nangli ning aklong pen akachoningri Hemphu Jisu arju. Bihek a oso ason kekroi pen damra nangli ri chejarra chodeng dun non, lapen nangli ning kangsam, nangli karjong aphan kesang longji. “Neli nanglitum aphan ahok petsi nangpulang, neli lam karju lapen neliphan neketoi abang aphan kekroi abangke kejut un e achethe do. Alangliphan ingsaise detji, bonta alanglike kethi angbong pen damsi chethe angbong lut damtanglo” (John 5:24). Dak Hemphu Jisu kopisi kepuma? Kethi angbong pen chethe angbong lutdamlong pu alam nanglitum ning chebi ik tha. La aphanke apor nang o e. Athema pap pen kejokji anam pi tanglo. Nangli non amat sita kejok longji, atheke Hemphu Jisu kros athak thira itum kadokave apap pen kejok anam tu tanglo. Alangli nangli pharman ta tu et lo.Nangli labangso alam chiniloma? Pilo nangli alangli lam arjura nangli pap hei-hei alangli phan chehodaiji ninghang ma? Alangli ingno nangli pap chekobir non. Dia chohang non.
Alangliphan nangli kapejok abang pura dengnon, lapen kejok a nong-eh deng non. Lapu lote nang chethe kemi longji, Arnam asomar planglongji. Labangso a chethe kemi penpete nangli Arnam arat along lut dun longle. Nangli Hemphu pen chethe kemi long nangji. (John 3:3-5).
NANGLI NING ARONG PEN KRISTO ALONG RENG UN JI.
Arnam asopo Hemphu Jisu aphan Hemphu lapen nepap pen kapejok abang pu kekroi helo nangli karjong pen kengkam kemi kachejor. Alangliphan kroidet pen aphi puthot pap anat matha thuthe det nangji. Nangli ningkangsam pen plengset po. La pen ajok nangli aphrang keklemtang pap akam hei-hei o tekangji lapen kahengno atum pen chelang thuthe det po.
Lapen nangli Arnam kardom pen Bible kelangji aphan ning hang po, arnivang ta alangli lam ingchapji lapen ning arong ponji. Chemitmepin pen nangli Arnam alam karjuji aphan mondoli along damji. Arnam akam along nangli ning arong ji lapen Arnam aphan ro-archoji.
Hem kedo ahut sita, tovar kedam ahut sita kam keklem ahut sita, nahokle damnon nangli ning arlo Arnam aphan kero karcho, kangduk lapen alanglilong kachelangji aphan ning hangji. La pen apot nangli karjong along jakong longji lapen soitan asat pen chedan un ji. Nangli phan soitan asat klolote Arnam nangli long doji.
Alangli nangli dungsi dover lapen kerapjisi kaita nangliphan mathaver. Nangli koansi karjong achethe pen peprang ponji la ansi Bible kangchapji lapen Arnam kardomji aphan nangli ning hang e ji. Lang a ok le lang avete reng un e lasonsi nanglita kardom penpete Arnam pen reng rap-rap un e. Kardom pen achethe ke rengver lapen karjong ame mep un e.
NANGLI JISU APHAN KAM KLEM NANGJI
Arnam nangliphan lapuan a kanghon kethe pen ajok nangliseta Arnam aphan eson ma eson pinangji. Nangli kelong akanghon, kangjinso lapen ning kangsam nangli jirpo jirpi aphanta than pachini nangji. Alanglitum aphanta nangli kelong aningkarong pachini long tha.
Arnam akarjong kangthir pen kelong a gian longdet pen aphi nangli bang aphan than pachini, paklardakra pap pen kejokji atovar paklang thek nangji. Nangli un an pen mondoli arlo akam hei-hei rap nangji. Osomar akachelang along, Bible kangchap pen, dan kepi pen mondali arlo doan akam sita nangli chelang dun nangji. Birta keme akam alongta Arnam aban ason arjan cheplang nangji. Alangli kam keklemji aphan thedung apor nang pitanglo. La hai apor keme dengsi kero, karcho, kangduk pen alangli long nangli mesen a arjan peklang nangji. Hemphu Jisu aban mate sangho atum keklem nangji akam lahai helo.
Laso alam aputhak Paul amat ta than peklar dak si do; “Tangte lahelo, neli kachinghon akorte marli atum, ning thirklong pen do thip non kaiketa Hemphu aphan le klem non. Pima Hemphu aphan keklem pike ale do, lake nanglitum chenilo” (1 Corinthians 15:58).
Eson alam tengne nangne - Arnam alam lapen karjon kangthir pen akapaphrang pon abang ke tengne nangne; athema etum aning along kedo karjong kang thir etum aphan Arnam alam pen katheang atovar along eja ponji. Hemphu Jisu labangso alam aputhak lapuson si ningje lo; “Nephan Hemphu, Hemphu kepu abang phutinle sining arat lutdun longji, lapu kali, bonta sining athak kedo nepo aning kehang ateng keklem alingsi lutdun longji” (Matthew 7:21).
ARNAM NANGLI PHAN ANAM NANGPIJI
Tangte Arnam kepiji anam kopi? Anam ke soni do. Isi ke non achethe ahut longji; akaprek abangke mo kevang ji achethe, jongsi elitum Arnam akang jinso pen dora kahing no an haiver lapen akekroi achethe pen renglote lake ahirjume pen plengset achethe plangpo.
Arnam kethan alam non ephong matha pon lo nang. Alangli pulo; “Ne nangli tum aphan ning kangsam nangpi tekanglo, ne nemethang aning kangsamsi nangtum aphan nangpi tekanglo. Pirthe nangkepi asonthotle ne nang kepi kali. Nangtum aning aduk chepedori lapen phereri” (John 14:27).
Hemphu Jisu komat aphansi ningkangsam piji? Labangso aning kangsam ke hala pap kadia tang, alangli ning Jisu avi pen kechamtang lapen aning ingthir et atum aphan. Amethang aning Hemphu aphan kahodai pame atum aphansi labangso aningkangsam halatum aphan lo. Arnam aban mansi kereng atum kelong ahirjume angbong pen ningkangsam helo kenangsot. Lasi nangli chethe angbong akesung asatle vang sita Hemphu aphan langnon, nangli Alangli pen ningkagsam longji.
Pap a sat pen kachechak thek aningkangsam Hemphu Jisu nangli kardom hei-hei arjuji lapen nangli soitan pen kejok thek atovar peklang thek. Alangliphan chinine atumke labangso akerap longle. Nangli jongsi Hemphu aphan kroithip lote sining angsong nangli anam longji. Non achethe nangli keduk, kesung achethe angbong le do sita mo sining angsong kejut un e achethe longji. Mo nangli sining lelote ningkasiksak, ningkebi hei-hei anta virdetji. Hadak akesung, keduk, kangchir kalang it ave detji. Kekroitang atum along nangli akai apar Hemphu pen dorap-rap ji. Lake akai papar-akai kejut un e anam longpo.
HEMPHU JISU VANG DAPRANG PO.
Bible pen itum aphan kopisi pulo-Hemphu Jisu labangso a pirthe along vangthu daprang po. Bonta aphrang ason kangjinsothek lapen kapejok abang arje penke vangve. Non alangli kevangji ke recho apar recho lapen kangsai abang mansi vangji. “Halabangso ahut alangli anutin aphan amethang akam atengsi anam piji” (Matthew 16:27).
Pap aning pen methang aning kehang chepapleng atum an soitan aphan kesik pitang me herang alongsi dampo. Alanglitum kejok kelong apor lit tanglo, anke halatum kejokji thang atovar ta avelo. Bible aputhak labangso alam lapusonsi do; “Halabangso arat asomar atum aphan ingtan akangtingsi vardetji. Hadak latum chiru-charnapsi aso chardengji” (Matthew 8:12). “Hadak halatum aphan kecho angthan atum kaita thithe, lapen halatum aphan kecho ame kaita mepme” (Mark 9:44).
Arnam aso an ke phere nangne. Hemphu Jisu Alangli somar atum aphan sining hem rengme keponjisi vangji. Alangli nanglitum apham kepuke; “Inghong dingnon, lapen no kang-ar penle donon, pima labangso apor komantusi vangjima, lake nanglitum chinine” (Mark 13:33). Athema, Hemphu Jisu nengve amamat vangtahai.