May-ada ka ba pag-abat nga nag-uusahan, o may-ada ka ba pag-abat nga salaan ngan nahahadlok ha kahiladman han imo kasingkasing? Nagpapakiana ka ba kon ano an katuyoan han imo kinabuhi? Damu nga mga tawo an nangangalimbasog ha pagbiling han baton hini nga mga pag-abat. Bangin makatara ka hin mga kaliawan o iba nga mga buruhaton nga bangin makabulig ha imo nga mawad-an hini nga mga pag-abat ha sulod hin halipot nga panahon, pero katapos nabalik ito, bangin mas makusog pa kay han hadto.
Ha tinikangan perpekto og hingpit an mga linarang han Dios. Waray problema an tawo tubtob nga inabot an Yawa ngan gin-aghat hiya nga diri sundon an Dios. Nakasala hiya ngan diri na perpekto. Tikang hadto nga panahon an ngatanan nga katawohan makasasala.
Maakareleyt o makaabat ka ba gihap hito nga pagkahulog? Han bata ka pa, diri ginhuhunahuna han Dios an imo mga sala kondi ginpasaylo ka niya tungod kan Jesus. Samtang nagtitikadaku ka, nagbag-o ini nga mga butang ngan nagtikang ka ha pagkahadlok han imo pagkasalaan. Ano an nahitabo? Gintutugotan ka han Dios nga makaabat han imo mga sala. An dugo ni Jesus diri na nakakatabon han imo mga sala. Nagsiring an Dios, “Ikaw yana an responsable han imo ginbubuhat.” Kon waray mo karawata hi Jesus sugad nga imo Manluluwas, nagpapas-an ka pa gihapon han kabug-aton han pagkasalaan.
Ano an imo mahihimo basi mawara ini nga mga pag-abat hin kabug-aton han pagkasalaan o pagkaguilty? Diri ka makakabayad han imo mga sala bisan kon magbuhat ka hin damu nga mag-opay nga buhat. Ha mga mata han Dios makasasala ka pa gihapon. An Dios diri nagtutugot hin sala. An sala nagbulag ha aton tikang ha Dios (kitaa an Isaias 59:2).
Ini an maopay ngan simple nga plano han Dios ha pagbulig ha imo. Hi Jesus, an waray sala ngan perpekto o hingpit nga Anak han Dios, kinanhi basi magdara hini nga ginplano. Iya kinuha an aton mga sala ngan namatay ha krus, ginbaydan an baraydon nga ginkikinahanglan para han aton mga sala. Pinaagi han kamatayon ngan pagkabanhaw ni Jesus makakarawat naton an kaluwasan yana. Gin-aaghat kita ni Jesus nga kumadto ha Iya nga may-ada kabug-aton han sala.
Karuyag han Dios nga buligan ka. Pasasayloon ka Niya kon andam ka nga kumarawat nga makasasala ka ngan mag-ampo ha Iya para hin bulig. An ngatanan mo nga pangalimbasog ngan maopay nga mga katuyoan diri makakalimpyo ha imo tikang ha sala. May-ada la usa nga paagi basi malimpyohan ka tikang ha imo mga sala ngan ito pinaagi han dugo ni Jesu-Kristo nga maaplikar ha imo kasingkasing.
Ha dida nga nalimpyohan ka na han dugo ni Kristo, makakasabot ka nga diri mo mababag-o an imo kinabuhi pinaagi han imo kalugaringon nga kusog. Kinahanglan tumoo ka nga an Dios may-ada kinaadman ngan gahum ha pagtipig han imo kinabuhi. Kon dumangop ka ha Dios ha bug-os nga kasingkasing, bumaya ha imo mga sala ngan magmasinugtanon, bubuhaton Niya an pinakamaopay para ha imo. Ito amo an pagtoo-- bug-os nga pagsarig ha Dios ha imo kinabuhi. Kon iginhatag mo na an ngatanan ha Dios, an kamurayawan nga imo makarawat ha imo kasingkasing amo an ebidensya nga ginpasaylo ka na Niya.
An pagpasaylo nga imo makarawat tikang ha Dios maghihimo ha imo nga GAWASNON; pagkagawasnon nga may-ada matam-is nga pagsarig nga ikaw yana usa nga anak han Dios, nga ginhimo nga perpekto o hingpit pinaagi han dugo ni Jesu-Kristo. An bag-o nga katuyoan mabuhi nga mabulig ha imo nga malamposan an mga pag-abat han kahadlok ngan han pagkawaray sulod ha kasingkasing.
Mateo 11:28 Kadi ha akon.
Mateo 6:25-31 An Dios nagtatagad ha imo.
Juan 3:16 Hinigugma ka han Dios.
Juan 14:15 Magmasinugtanon ha Dios