Nakahunahuna ka na ba kun paonan-o nagtikang an ngatanan? Damu an mga hayop, tamsi, kahoy, ngan tanom ha tuna. Diin hira tikang? Permi na ba hira dinhi? It tawo? Kitaa an imo kalugaringon ngan kun paonan-o nagbubuhat an imo lawas. Giggagamit mo an imo mga mata ha pagkita, an imo mga talinga ha pamati, ngan an imo mga tiil ngan mga kamot ha pagbuhat han mga butang ngan pag-kadto ha mga lugar nga karuyag mo. Nahitabo la ba ini ngatanan, o may naghimo hito?
An mga baton hini nga mga pakiana mababasa ha Biblia, an Pulong han Dios. An Biblia nagsusumat ha aton mahitungod han paglarang han kalibotan. An syahan nga bersikulo han Biblia nasiring, "Ha tinikangan ginhimo han Dyos an langit ngan an tuna" (Genesis 1:1). An Dios naeksister na antes o ugsa pa ginhimo an tuna. An Dios nadida na; waray Hiya tinikangan o kataposan.
An siyahan nga kapitulo han Genesis nagtututdo ha aton nga ginlarang han Dios an kalibotan ngan an ngatanan nga aada hito ha sulod hin unom ka adlaw.
Ha siyahan nga adlaw an Dios nagsiring, "Magkaada kalamrag", ngan nagkaada kalamrag. Iya ginlain an kapawa tikang han kasisidman, ngan gintawag hira nga adlaw ngan gab-i.
Dida han ikaduha nga adlaw ginhimo Niya an langit.
Ha ikatulo ka adlaw ginbulag han Dios an tuna tikang ha katubigan ngan ginngaranan ito nga tuna ngan kadagatan. Ginhimo Niya an mga banwa, tanom, ngan mga kahoy ngan gindisenyo ito basi mamunga hin binhi basi tumubo an iba nga mga tanom ngan mga kahoy nga pareho ha ira.
Ha ikaupat nga adlaw ginhimo han Dios an duha nga dagku nga mga laga. An adlaw amo an mas daku nga suga ha pagmando han adlaw ngan an bulan amo an mas gutiay nga suga ha pagmando han gab-i. Tungod hito may-ada kita mga adlaw, mga bulan, ngan mga tuig. Ginhimo liwat Niya an ngatanan nga bitoon.
Ha ika-lima ka adlaw, ginhimo niya an mga tamsi ngan mga isda.
Ha ikaunom ka adlaw ginhimo Niya an ngatanan nga hayop nga naglalakat ngan nag-kakamang ha tuna, ngan ginlarang Niya hira nga mag-anak hin iba nga pariho ha ira. Tungod kay ginlarang Niya ito ha sugad hini nga paagi, may-ada siklo han kinabuhi. Samtang namamatay an mga tigurang, may-ada dugang pa nga magbabalyo ha ira.
Ha ikaunom ka adlaw ginlarang gihap han Dios an tawo uyon ha Iya kalugaringon nga dagway, ginporma Hiya tikang ha tapotapo han tuna. Maaram Hiya nga kinahanglan han lalaki an usa nga mabulig ha iya, salit kinuha Niya an usa nga gusok han lalaki ngan ginhimo ito nga babaye. Ginsidngan hira han Dios nga magdamu ngan pun-on an tuna hin mga tawo ngan magmando ha ngatanan nga Iya ginhimo.
Katapos han paglarang han Dios, nakita Niya nga maopay gud ito.
Ginlarang han Dios an tuna basi magin-urukyan han tawo, ngan an tawo may panuyo ha pagsingba ngan pagpasidungog ha Iya. Iya liwat ginlarang an tawo basi magmando ngan magmangno ha Iya linarang.
An Biblia nag-uupod hin damo pa nga bahin han kasaysayan han kalibotan ngan han tawo ha paglabay han mga tuig, kondi amo ini an rekord kon paonan-o ito ngatanan nagtikang. An Dios nahigugma ha tawo hin labaw pa kay han aton mahibabaroan, ngan Iya ginhimo an damo nga urusahon nga mga butang basi mapahimulsan naton. An pagkugos hin bata nga bag-o natawo, pagkita hin makaruruyag nga bukad, o pagkinita han katunod han adlaw sadang magpagios ha aton nga maghunahuna mahitungod han Dios, an Amay han ngatanan nga butang. Karuyag Niya nga pasidunggan mo Hiya pinaagi han imo kinabuhi. Makagarahum Hiya ha ngatanan nga butang, ngan nahigugma Hiya ha imo ngan karuyag magin-imo Manluluwas ngan sangkay.