Ha Baraan nga Bibliya aton mabasa, “Ngan hinkit-an ko an mga minatay, dagko ngan gudti, nga nanunukdaw ha atubangan han trono. Ginbuksan in mga basahan nga ginbuksan liwat in usa nga basahan, nga amo an basahan han mga buhi. An mga minatay ginhukman sumala han ira mga ginbuhat nga nahisurat dida han mga basahan” (Ginpadayag 20:12). Amo ini an ebedensya nga an Dios may-ada paglilista.
Hi Joshua Harris, usa ka ulitawo tikang ha Maryland USA, nagbakasyon ha Puerto Rico. Usa ka gab-i nag-inop hiya. Naabat niya nga an Dios nagpakita ha iya hini nga inop isip usa nga pagsaway hit iya kakulangan hit pagkamatinumanon. Ini nga inop nagpahanumdom ha iya hit nakakabag-o hin kinabuhi nga gahum ni Hesu Kristo ngan hit iya dugo. Naruyag kami pagpaambit hini ha iyo.
Ha butnga han pagmata ngan han mga inop, nakita ko an akon kalugaringon ha sulod hin usa nga kwarto. Waray gud naiiba nga mga bahin gawas la han usa nga bungbong nga puno hin gudtiay nga mga index-card files. Pareho hira hadton aada ha mga librarya nga nakalista an mga titles pinaagi kun hino an nag surat o subject dida alpabeto nga pagkasunodsunod. Pero ini nga mga file (pundok hin mga papel o card), nga tikang ha salog tubtob ha kisame ngan baga hin waray katubtuban ha bisan ano nga direksyon, may-ada magkaiba gud nga mga ulohan (title). Samtang nagtitikahirani ako ha bungbong, an siyahan nga nakakabig ha akon atensyon amo an usa nga nasiring “Mga Babaye nga akon mga ginkaruyag.” Gin-abrihan ko ito ngan nagpuropakli han mga kard. Ginsarado ko ito dayon, nakalasan ako han pakakilala ko han mga ngaran nga iginsurat ha kada usa.
Ngan bisan waray ako sumati, maaram gud ako kon hain ako. Ini nga waray-kinabuhi nga kwarto nga may-ada gudtiay nga mga file amo an orihinal nga sistema han akon kinabuhi. Nahasurat dinhi an mga ginbuhat ko ha kada panahon, an magdagku ngan an gudtiay, ha detalye nga naiba han akon nahanumduman.
Usa nga pag-abat hin pagkapausa ngan pagkamausisahon, napadisan hin kahadlok, naghisalakot ha akon samtang nagtikang ako ha ini-tapos-adto nga pag-abri hin mga file ngan pag-usisa han mga sulod hito. An iba nakahatag ha akon hin kalipay ngan makaruruyag nga mga panumdoman; ha iba nakaabat ako hin duro nga kaarawdan ngan pagbasol nga tungod hito nagkikinita ako ha ira kon may-ada ba nagkikita ha akon. An usa nga file nga ginngaranan nga “ Mga Sangkay” aada ha sapit han usa nga ginngaranan nga “ Mga Sangkay nga Gintraydor Ko.”
An mga ulohan (title) nagtikang ha ordinaryo tikadto ha kakaiba hinduro. “Mga Libro nga Akon Nabasa,” “Mga Pagbuwa nga Akon Iginyakan,” “Pagliaw nga Akon Iginhatag,” “mga Pagpatawa nga Akon Ginpatawa.” An iba haros nakakatawa tungod han ira kaamohan han nahitabo: “Mga Butang nga Ginguguliat Ko ha Akon Kabugtoan.” Ha iba diri ako nakakatawa: “An mga Butang nga ginngungurutub Ko ha Akon mga Kag-anak.” Waray gud ako kaukyi ha paghipausa ha mga sulod hito. Kaurog mas damu an mga kard kaysa han akon ginlalaoman. Danay, gutiay la liwat kaysa han akon ginlalaoman.
Napuno gud an akon inaabat han kadamu nga ginbuhat han akon kinabuhi. Posible ba nga may-ada ako panahon ha akon 20 ka tuig ha pagsurat hin kada usa hini nga yinukot, bangin minilyon, nga mga kard? Pero an kada-usa nga kard nagpamatuod hini nga kamatuoran. An kada usa iginsurat ha akon kalugaringon nga kasurat. An kada usa pinirmahan gamit han akon pirma.
Han ginkuha ko an papel nga may marka nga "Mga Kanta nga Akon ginpapamatian", nasantop ko nga an mga file dumako para masudlan han ada ha karantahon. An mga kard pinutos hin maopay, pero katapos hin duha o tulo ka metro, waray ko hiagii an kataposan han file. Gintiklop ko iton, makaarawod, diri tungod han kalidad han musika, kondi tungod han kadaku han panahon nga akon hinsabtan nga ginrirepresentaran hito nga file.
Han nakaabot ako ha usa nga file nga may tigaman nga "Maglaw-ay nga mga Panhuna-huna" inabat ako hin katugnaw ha akon lawas. Ginpagawas ko an file (surudlan) hin usa la ka pulgada, tungod kay diri ko karuyag usisahon an kadako hito, ngan ginkuha ko an usa nga kard. Nahadlok ako han detalyado nga mga impormasyon hito. Nakaabat ako hin malain ha paghunahuna nga ginrekord an sugad nga okasyon.
Tigda la nga inabat ako hin kasinahon o kapungot. Usa la nga ideya an umabut ha akon hunahuna: “Waray gud dapat iba nga pwedi makakita hini nga mga kard!” Kinahanglan ko hira gubaon!” Ha akon duru nga kasina ginkuha ko an file (box). An kadako hito waray na pulos yana. Kinahanglan ko ito kuhaon ngan sunogon an mga kard. Pero dida han ginkuha ko an file (box) ha kataposan ngan nagtikang pagtaktak hito ha salog, waray ako makapagawas hin bisan usa nga kard. Nawad-an ako hin paglaom ngan kumuha ako hin usa nga kard, pero nakita ko nga sugad ka marig-on ito han puthaw han pagsuray ko paggusi hito.
Nawad-an ako hin paglaom ngan waray gud ako mahihimo, iginbalik ko an file ha iya lugar. Iginsandig ko an akon agtang ha bungbong, ngan naghinga pagawas hin halaba upod an kalooy ha kalugaringon. Ngan dida hito hinkit-an ko ito. An ulohan nga nasiring: “Mga Tawo nga Ginsumatan Ko han Ebanghelyo.” Mas mapawa an ganggang kay han mga ganggang ha palibot hito, bag-o, haros waray pa gamita. Gin-abrihan ko an karaptan hito ngan an usa nga gutiay nga kahon nga diri sobra tulo ka pulgada an kahilaba nahulog ha akon mga kamot. Maiihap ko an mga kard nga aada ha usa nga kamot.
Katapos, nagturo na an akon mga luha. Nagtikang ako pagtinangis. Nagtikang ha akon tiyan an duro nga pagnguyngoy ngan an bug-os ko nga lawas nagkurog. Nahikaluhod ako ngan nagtangis. Nagtangis ako tungod han kaarawdan, tungod han duro nga kaarawdan han ngatanan. An mga hilera han mga estante nga may-ada mga dokumento nga nag-uurosa ha akon mga pangitaan nga puno hin luha. Dapat waray gud bisan hin-o nga mahibabaro hini nga kwarto. Kinahanglan ko ito sadhan ngan tagoon an yawi.
Pero katapos, samtang ginpupugngan ko an akon mga luha, nakita ko Hiya. Diri, unta dri Hiya. Diri dinhi. Hala, bis hin-o na la pero diri hi Jesus.
Waray ako nahihimo nga nagikikinita samtang gin-abrihan Niya an mga file ngan ginbabasa an mga kard. Diri ko kaya makita an Iya ipakita nga baton. Ngan ha mga takna nga nakita ko an Iya nawong, nakita ko an kasubo nga labaw pa han akon. Baga hin karuyag Niya kumadto gud han mga magraut nga mga kahon. Kay ano ba nga kinahanglan Niya basahon an ngatanan?
Ha dida hito, liningi Hiya ngan kumita ha akon katugbang han kwarto. Nagkinita hiya ha akon nga may-ada kalooy ha iya mga mata. Pero diri ini an kalooy nga naghahatag ha akon hin kasina. Igintamod ko an akon ulo, gintabonan ko an akon nawong han akon mga kamot ngan nagtikang pagtinangis utro. Naglakat Hiya paharani ha akon ngan Iya ako ginhangkopan han iya butkon. Damu gud an Iya masisiring. Pero waray Hiya magyakan hin bis usa ka polong. Nagtangis la Hiya upod ha akon.
Ngan Hiya bimnuhat ngan bimnalik ngadto ha bungbong han mga file. Tikang ha usa nga kataposan han kwarto, ginkuha Niya an usa nga file ngan, gin-usa-usa, ngan iya gin-tikangan pagperma gamit an Iya ngaran ha ubus han akon ngaran han kada usa nga kard.
“Ayaw!” Suminggit ako ngan nagdagmit paghirani ha Iya. An akon la naiyayakan amo an "ayaw, ayaw," samtang akon ginkukuha an kard tikang ha Iya. It Iya ngaran diri dapat sadang nga aada hini nga mga kard. Pero aadi na, nakasurat na ha madakmol nga kamapula nga kolor, masirom, ngan buhi. An ngaran ni Jesus nagtabon han akon. Ini nakasurat pinaagi han Iya dugo.
Iya hinay-hinay nga ginbawi an kard. Masurub-on Hiya nga humiyom ngan nagpadayon pagpirma han mga kard. Baga hin diri ko gud masasabtan kon paonan-o ito Niya nabuhat hin sugad la kadagmit, kondi ha sunod nga higayon sugad-sugad nga nabatian ko Hiya nga ginsara na an katapusan nga file ngan dumaop ha akon sapit. Ngan Iya ibinutang an iya kamot ha akon abaga, ngan siniring, “Natapos na”.
Tinindog ako, ngan Iya ako gin-updan paggawas ha kwarto. Waray kandado an purtahan. Ngan may-ada pa mga kard nga kinahanglan pagsusuratan.
The Room (An Kwarto) —Copyright 1995—New Attitudes/Joshua Harris
Nahunahuna mo na ba kon ano an pagkita han Dios ha imo kinabuhi? Hi Jesus nagsumat ha aton, "An ngatanan nga waray pulos nga pulong nga ginyayakan han mga tawo, maghahatag hin kasayoran ha Adlaw han Paghukom" (Mateo 12:36). Kon tangkod kita ha aton kalugaringon, aton admitaron upod an kasubo ngan magbabasol nga napakyas kita ha aton mga panhunahuna ngan mga ginbubuhat. Kita gihapon maawud tungod han mga panhunahuna ngan mga buhat nga ginhihimo hin tago. An Biblia nasiring ha Roma 2:16 nga “An Dios maghuhukom han mga tinago han mga tawo pinaagi kan Jesukristo.” Nagwali hi apostol Pedro nga "Sanglit pagbasol kamo ngan balik kamo ngadto ha Dyos, basi pasayloon Niya an iyo mga sala." (Buhat 3:19). Ginpara na ba ni Jesus an imo mga sala, o nagbubukod-bukod pa ito ha imo yana?
Karuyag mo ba nga magin-gawasnon? An mga panhunahuna ngan mga buhat han nag-agi ba nagpapabug-at ha imo? An aton mga sala dagku nga kabug-aton ha aton mga kasingkasing ngan mga kinabuhi. “Kon masiring
kita nga waray naton sala, naglilimbong la kita ha aton kalugaringon, ngan waray gud dinhi ha aton an kamatuoran” (1 Juan 1:8). “Kay an bayad han sala amo an kamatayon, kundi an libre nga hatag han Dyos amo an dayon nga kinabuhi dida ha pakig-usa kan Cristo Jesus nga aton Ginoo” (Romans 6:23)
Naghahatag hi Jesus hin kapasayloan. Kimnanhi Hiya ha tuna ngan igin-ula an iya dugo para ha ngatanan nga makasasala. An plano han katalwasan yana kompleto na. Karuyag mo ba nga magin bug-os? “Kon an Anak maghatag ha iyo hin kagawasan, magkakaada gud kamo kagawasan” (Juan 8:36). (Salmo 51) Pakanhi kan Jesus yana! Pagbasol ngan igkumpisal an imo mga sala. “Kundi kon igkumpisal ta an aton mga sala ngadto sa Dyos, pagtutumanon Niya an iya saad ngan pagbubuhaton an matadong: pasasayloon kita han aton mga sala, ngan lilinisan kita han ngatanan nga karat-an.” (1 Juan 1:9). Sarig kan Jesus nga magdadara ha imo ngadto ha may pagkakontento nga kinabuhi upod ha Iya. Maghahatag Hiya hin giya ha imo ha adlaw-adlaw nga pagkinabuhi.