Maaram ka ba nga may-ada libro nga nagsasaysay kon paonan-o nagtikang an kalibotan? An siyahan nga mga pulong hini nga libro amo ini, “Ha tinikangan ginhimo han Dios an langit ngan an tuna”. Katapos hini nga mga pulong, iginsusumat hito kon paonan-o ginlarang an kalibotan, ngan mahitungod han siyahan nga lalaki ngan babaye nga naukoy dinhi ha tuna. Diri la ito nagsusumat ha aton mahitungod han tinikangan han panahon, kondi nagsusumat liwat kon ano an mahitatabo katapos matapos ini nga kinabuhi. Ha bug-os hini nga libro, mababasa naton kon paonan-o kita sadang magkinabuhi basi magin andam ha kinabuhi katapos mamatay.
Usa ini nga daan nga libro nga ginsurat hin mga 40 nga magkalainlain nga mga tawo(author) ha sulod hin mga 1,500 ka tuig. Iginsurat nira an ginsugo han Dios nga isurat. Ginsumatan han Dios an mga parasurat mahitungod ha Iya. An magsusurat han Genesis, an siyahan nga libro, nagsurat mahitungod han paglarang ngan mahitungod liwat han lunop nga nagtabon han tuna. Hiya ngan an iba nga mga parasurat nagsurat mahitungod han pinili nga katawohan han Dios ngan kon paonan-o Iya ginmandoan hira ha paglabay han mga tuig. Gindasig han Dios an iba-iba nga tawo ha pagsurat han kasaysayan, siday, tagna, ngan mahitungod han mga saad han Dios. Tungod kay ini nga sinurat giniyahan han Dios, waray ngaran han bisan hin-o nga aada ha bawbaw hini. Gintatawag ito nga Biblia, nga nangangahulogan nga “An Libro”. Agsob nga tinatawag ito nga Baraan nga Biblia, nga nangangahulogan nga “An Baraan nga Libro.’’
An Biblia amo an pinakabantog nga libro ha bug-os nga kalibotan. Bisan kon may mga panahon nga may mga tawo nga nangalimbasog ha pagbungkag hito, pirme ini ginpapanalipdan han Dios ngan pirme liwat ito papanalipdan. “Kondi an polong han Ginoo nagpapadayon ha waray katapusan” (1 Pedro 1:25). An Biblia ginkukompwesto hin 66 nga libro. Nabahin ini ha duha nga bahin – an Daan nga Testamento ngan an Bag-o nga Testamento. An Daan nga Testamento nagsusumat han kasaysayan han kalibotan ngan kon paonan-o nagsaad an Dios nga ipapadara ha tuna an iya Anak nga hi Jesus basi talwason kita tikang ha aton mga sala. An Bag-o nga Testamento nagsusumat kon paonan-o kinanhi ha tuna hi Jesus, an Anak han Dios. Nagsusumat ito kon paonan-o natawo hi Jesus sugad nga bata. Damu nga hitabo ha kinabuhi ni Jesus an iginsurat, upod na an damu nga mga milagro nga Iya ginbuhat. Ipinapakita ha aton han Biblia nga hi Jesus an aton hingpit nga susbaranan ha ngatanan nga butang. Han nagyakan hi Jesus, namati an mga tawo ha iya mga katutdoan. Damu hito an mababasa naton ha mga libro nga gintatawag nga Ebanghelyo.
An Ebanghelyo ni Juan nagsusulod hin damu nga mga pulong ni Jesus. Ginsumatan niya an mga tawo nga an Dios amo an iya Amay. Gintutdoan niya nga an Dios nahigugma ha kada tagsa nga tawo ha kalibotan. Ha Juan 3:16 nasiring, “Kay an Dios naghigugma gud han kalibutan, nga iya iginhatag an iya bugtong nga Anak, basi nga an ngatanan nga natoo ha iya, diri mawara, kondi ma may kinabuhi nga waray katapusan”. Hinbaroan liwat naton kon paonano nag-antos ngan namatay hi Jesus basi mabaydan an aton mga sala ngan ginbanhaw hiya basi mabuhi ha waray kataposan. Ginsidngan kita ni Jesus nga mapapasaylo an aton mga sala kon natoo kita ha Iya. Tungod kay damu an ginsiring ni Jesus ha libro ni Juan ngan masayon ito masabtan, usa ito han siyahan nga mga libro han Biblia nga sadang naton basahon.
Naghuhunahuna ka ba kon ano an mahitatabo katapos han kamatayon? An Biblia nagsusumat ha aton nga ha umarabot mabalik hi Jesus ha paghukom ha ngatanan nga tawo. Mababasa naton kon paonan-o mag-aandam para hito nga panahon. Ginsumatan kita ni Jesus nga limnakat hiya basi mag-andam hin lugar ha langit para hadton makarawat ha iya.
Mabibilngan ha Biblia an mga baton ha nakakawurok nga mga pakiana ha kinabuhi. Diin kita tikang? Kay ano nga aanhi kita? Diin kita makadto kon mamatay kita? Ini nga mga pakiana ngan damu pa nga pakiana ginbabaton ha bug-os nga Biblia. Kon an kinabuhi nagigin makuri ngan waray katuyoan, pwede kita kumadto ha Biblia diin an Dios nasiring, “Ako magtututdo ha imo, ngan magtututdo ha imo han dalan nga imo paglalaktan: Ako magmamando ha imo nga an akon mata aada ha imo” (Salmo 32:8). Kon namamatay an usa nga duok ha aton, pwede kita kumadto ha Biblia para han paglipay nga tikang ha Dios. Ginagamit niya an Biblia ha pagyakan ha aton yana.
Usahay nagbabasa kita hin libro ngan naghuhunahuna kon tuod ba ito. Maaram kita nga tuod an Biblia tungod kay ito an Pulong han Dios. May-ada ginatos nga bersikulo ha Biblia nga may-ada hini nga mga pulong, “Sugad hini an siring han Ginoo”. Damu nga tagna an iginsurat ngan ha urhi natuman sugad la han igintagna. Nagsaad hi Jesus nga tatagan niya hin kamurayawan ngan kalipay adton naabot ha iya. Damu an nakaeksperyensya hito. Tungod han gugma han Dios ha katawohan, iginhatag niya an iya Pulong ha ngatanan. An Biblia nakikiistorya ha aton kasingkasing.
Basaha an Biblia yana nga Adlaw!