Pagkilala kan Satanas Taktika ha Kalamrag han Pulong han Dios
An katuyoan han Baraan nga Biblia diri an pag-unabi o pag-pokus kan Satanas ngan han iya buruhaton. Pero, damu an aton mababasa ha Biblia nga nagpapahayag han iya personalidad ngan mga buhat.
Hi Satanas usa hadto nga anghel, pero nagrebelde hiya ha Dios, ha iya maglalarang, ngan karuyag maginpariho ha Iya. An mga buhat han masirom nga ginhadian ni Satanas diri bag-o. Tigaman ito han iya mga pangalimbasog ha sulod han damu nga katuigan ha pakig-away ha ginhadian han Dios. Nagtatanyag hiya hin alternatibo, kun ano an kanan Dios, pinaagi han Iya Baraan nga Espiritu, ginbubuhat.
Mababasa naton ha Eksodo an gahum han mga salamangkero han Ehipto nga nangalimbasog ha paghimo hin mga milagro nga ginbuhat han Dios pinaagi kan Moises. Ha libro ni Job, iginpapakita ni Satanas nga nasina o naawa gud hi Satanas ha pagkamatinumanon ni Job ha Dios. Gin-gamit niya an kamadarahog ngan kakulangan basi pagpirit kan Job nga bumaya ha Dios.
An mga paagi ni Satanas amo an: kahadlok, panarhog, mga saad hin kalipayan o gahum, pagtarhog, ngan pagruhaduha. An pipira han siyahan nga mga butang nga iya iginpahibaro ha aton baga hin makaruruyag ngan makapa-interes. Nagsasagdon hiya, "Karuyag mo ba mahibaro han tidaraon o magkaada hin hilarom nga pagsabot nga diri nakakarawat han iba?" Bangin magtagana hiya hin mga pagtambal nga labaw pa han Siyensiya o Science. An pag-astrolohiya o pagtagna bangin baga hin waray sala, pero ha waray pag-iha ginsunod ini hin pipira nga mga pulong o mga pormula nga may mahika, pag-obserbar hin pipira nga mga adlaw ngan pagkahadlok ha mga numero nga nagriresulta hin maraot nga kapalaran. An ideya nga may-ada mga espiritu nga sadang tahuron ngan kahadlokan tungod han gahum nga ira mahimo ngadi ha aton. Hini nga paagi, ginlilit-ag ni Satanas an mga waray salabutan ngadto ha mga lugar nga ginkakahadlokan hiya ngan ha iya mga espiritu.
Damu hinduro nga mga indibiduwal an nadakop han pagigin-interesado ha mga butang nga, ha siyahan, baga hin inosente. Pinaagi han pag-eksperimento ha Ouija board , horoskopyo, pag-aram ha palad, ngan damu pa nga mga buhat, ginhimo nira an ira kalugaringon nga masayon mabiktima han magraot nga mga espiritu basi dugang nga makapasamok ha ira.
An tumong ni Satanas amo an pagpaluya ngan pagbungkag han pagtoo han mga Kristiano ha Dios. An Kristiano nakakarawat hin kadaogan pinaagi han pagtoo kan Kristo ngan ha Iya la. An hingyap nga hibaroan an diri hinbabaroan o an kahakog ha gahum nakakapaduso ha usa nga usahay mag-eksperyensya ha mga butang nga sakop ni Satanas. An simple nga pagsarig ha Dios nakakabulig ha usa nga diri mabaraka ha diri hinbabaroan ngan nakakaaghat ha usa nga bug-os nga sumarig ha gahum ni Kristo.
An pagtikang tungod han pagkamausisahon o pag-ekspermentar ha diri maiha mahadakop han sapot o pukot han kahadlok; kahadlok ha kun ano an mahitabo, kahadlok ha mas gamhanan nga mga gahum, kahadlok ha iba nga mga tawo, kahadlok kan Satanas mismo. Ini nga mga kahadlok nakakaapekto ha indibiduwal nga tinugotan an iya kalugaringon nga mahaupod ha kahina-hinala nga mga buhat. Ha pan-ato hini nga kahadlok, nasiring hi Satanas nga may-ada hiya solusyon. Nagtatanyag hiya hin dugang nga gahum kon an usa magpasakop ha iya kalugaringon ha pipira nga mga rituwal o iba nga mga pagsugot. An kahadlok ha iba nga mga espiritu pwede maatohan pinaagi han pagkaada han espiritu o labaw nga gahum ha aton kalugaringon, siring niya. Hini nga paagi an usa ka tawo iginpapakilala ha sunod-sunod nga mga ranggo han gahum nga, imbes nga magpahinabo han indibiduwal nga makaabot ha mas daku nga mga lebel han kamurayawan, nagriresulta hin diri-natatapos nga paglugsong o pagkahulog ngadto ha kahiladman han makangingirhat nga buhat ni Satanas. An kasigurohan nga iginsaad ni Satanas napapamatud-an nga diri-makatuman, nga ginliwanan han panginahanglan hin panalipod tikang ha mas hitaas pa nga gahum hini nga maraot nga kalibotan. Ini an sistema han Satanismo.
An plano ni Satanas amo an pagsaliwan ha Dios. Hi Satanas ginlarang basi magsimba, diri basi singbahon. Diri hiya an gilalabawi nga gahum; diri hiya makakadaog ha Kordero han Dios; diri hiya makakaghatag hin seguridad; diri hiya interesado han ikaupay ha aton. Bisan pa, padayon hiya nga nagbubuhat ha paggamit hin gahum labaw ha mga tawo basi himoon hira nga masinugtanon ha iya. Nagsuray hiya hin diri pagpasarig ha Dios ngan han iya ginhadian. Naniniguro hiya nga magtukod hin organisasyon nga an iya kalugaringon amo an agaron. Nag-uuswag ini pinaagi han sistema han kahadlok ngan mga ilusyon han gahum. Nagbubuhat hiya hin urusahon nga mga butang basi makahatag hin kahadlok ha mga hunahuna han mga tawo (2 Korinto 11:14-15). An epekto hini nga sistema amo an pagbungkag han kamurayawan ngan seguridad ha mga indibiduwal, mga panimalay, ngan mga gobyerno. Nagbihag ini han mga tawo, nga tungod hito nakaabat hira hin ginhahadlok hin duro kon nagsusuray hira pagkalagiw.
Hi Satanas amo an pinakamapait, pinakamasamok, pinakamasakit, pinakamakangingirhat nga kaaway mo. Waray gud niya dungog. Usa hiya nga buwaon. Waray kamatuoran ha iya: "Hiya buwaon, ngan amay han buwa" (Juan 8:44). Usa hiya nga parapamatay, usa nga parabungkag. Hiya mismo an simbolo han kangalas ngan karaotan. Maraot gud hiya, ngan waray gud niya mahihimo nga maopay pa.
Hi Satanas an nag-aghat han ngatanan nga karaotan. Waray krimen o sala nga maraot hinduro o mahugaw hinduro para ha iya. Hiya an hinungdan han ngatanan nga mga kangalas, pagpatay, pag-abuso ha mga anak o asawa, pag-abuso ha droga, imoralidad, nabungkag nga mga panimalay, pakig-away, pangkukulam o witchcraft, ngan tanan nga klase hin pagbuwa. Nalilipay hiya ha pagpahinabo hin mga krimen tungod han hingyap ngan karaotan, mga krimen nga ginbubuhat kontra ha inosente nga mga tawo nga nahitatabo nga nahulog ha mga kamot han magraot o waray alu nga mga tawo. Waray hiya kalooy ngan diri mapinasayloon. An pag-antos diri nagpapagios ha iya nga magpakita hin kalooy. An pag-ula hin dugo ngan kamatayon amo an mga instrumento nga iya ginagamit ha pagkab-ot han iya mga tumong. Hiya nakanhi "ha pangawat, ngan pagpatay, ngan pagbungkag" (Juan 10:10).
An waray kataposan nga kapalaran ni Satanas ginhukman na. May-ada lugar nga waray kataposan nga kalayo nga igin-andam para ha iya ngan han iya mga anghel (Mateo 25:41). Karuyag niya nga damu nga tawo an mag-antos sugad ha iya. Maaram hiya nga mahihimo niya ini pinaagi han pag-ugtang ngan ha kataposan pagbungkag han aton pagtoo ha Dios. Hihimoon niya ini pinaagi han dayag nga pag-ato ha Pulong han Dios o pinaagi han mahilom nga pag-aghat hin pagka-aligamgam (lukewarm), waray-pagtagad, matoguton la nga Kristianidad.
May-ada katalwasan tikang ha mga bitik ni Satanas. Karuyag niya nga tumoo ka nga waray na solusyon. An Biblia nagsusumat ha aton nga kinanhi hi Jesus basi buhian an mga bihag. Kimnanhi Hiya basi maghatag hin kinabuhi. Hi Jesus an dalan, an kamatuoran, ngan an kinabuhi. Ha iya kinabuhi dinhi ha tuna iginpakita ni Jesus an iya gahum ha pag-ato kan Satanas pinaagi han pag-ato han mga pagsulay ni Satanas ngan pagpaiwas han magraot nga mga espiritu pinaagi han Pulong han Dios (Mateo 4:1-11; Marcos 9:25-26). Gindaog ni Jesus an gahum ni Satanas pinaagi han iya kamatayon ha krus ngan han iya pagkabanhaw tikang ha mga minatay.
Makakapahimulos ba kita hini nga kadaogan ngan madaog an pinakamasakit nga kaaway han aton kalag? Siyahan, kinahanglan naton hibaroan nga ginbihag kita ni Satanas ngan gin-uuripon kita han iya kahadlok. Kinahanglan karawaton naton nga makasasala ini ngan mawawara kita kon magpabilin kita hini nga kahimtang. Tungod kay nasasabtan naton nga diri naton maluluwas an aton kalugaringon tikang ha pagdakop ni Satanas, kinahanglan magsangpit kita ha Dios para han katalwasan ha bug-os naton nga kasingkasing. Kinahanglan magbasol kita, ngan bumaya ha aton mga sala. Kinahanglan karawaton naton pinaagi han pagtoo an nakakatubos nga dugo ni Jesu-Kristo para han aton mga sala. Kinahanglan magpasakop kita ha Dios, karawaton an iya pagpasaylo ngan matinumanon nga sundon an iya Pulong. Kon gintutuman naton ini nga mga kondisyon, iginhahatag Niya ha aton an kamurayawan ha Iya, ginpapahuway an kabaraka ha aton kasingkasing, ginpasaylo an aton mga sala, iginhatag ha aton an bag-o nga kinaiya ngan ginhimo kita nga usa han iya mga anak. Amo ini an kahulogan han pagin-igin-anak utro. An bisan hin-o nga nasupak ha tawag han Dios aada pa gihapon ha ginhadian ni Satanas, ngan ha urhi dadad-on han paralimbong ito nga tawo ngadto ha waray kataposan nga pagsakit.
Kon diri mo nasasabtan an plano nga ginhimo han Dios para ha imo, pag-aram han Pulong han Dios, pag-ampo ha Iya nga may matinumanon nga kasingkasing, ngan tututdoan ka Niya han dalan. Gintatawag kamo han Dyos hin pag-alagad ha Iya ngan hin paglikay han mga prisohan ni Satanas. Hinaot an Dios magbendisyon ha imo. Basaha an Salmo 91.
Dugang nga basahonon:
Lukas 11:20-23 ............Usa nga mas makagarahum kay Satanas
Mga Taga-Roma 6:20-23 ...Luwas tikang ha sala
Isias 61:1 ..............................Kagawasan han mga Binihag
Mga Taga-Roma 8:1-2 .........Luwas tikang han kasirotan