An Kalamrag Han Kalibotan
An Biblia amo an pulong han Dios, an waray kataposan nga kamatuoran. Nagsusulod ito han estorya mahitungod han paglarang, han pagtalapas han tawo ha Dios, ngan han kasakit nga inabat han tawo tungod han sala. Nagsusumat liwat ito ha aton han gugma han Dios ha tawo ha paghimo hin plano ha paglukat ha iya. Nagsusumat ito mahitungod han Manluluwas nga natawo, namatay tungod han sala han tawo, ngan nabanhaw basi matalwas an tawo. An bisan hin-o nga natoo ha mensahe hito makakaeksperyensya hin pagpasaylo han mga sala, kamurayawan ha hunahuna, gugma ha ngatanan nga tawo, gahum ha sala, ngan buhi nga paglaom han kinabuhi nga waray kataposan.
An Kalamrag Han Kalibotanurusahon nga Mga Ginhimo Han Dios
An Dios, an maglalarang han uniberso o universe, naginbuhi na Hiya pirme. Hiya an Pinakamakagarahum ngan an Pinakamaaramon. Pinaagi han Iya daku nga gahum, ginlarang an ngatanan nga butang. Ginhimo han Dyos ini nga tuna nga puno hin tubig, ngan nagsiring Hiya, "Magkamay-ada mamara nga tuna", ngan natuman ini. Iya ginhimo an kabukiran ngan mga walog ngan ginpalibotan ito hin banwa, maghusay nga mga bukad, ngan iba-iba nga klase hin kahoy. Ginhimo Niya an mga tamsi nga nagkakanta hin magkalainlain nga mga kanta. Ginhimo han Dios an ngatanan nga hayop, dagku ngan gudtiay, an mga mananap nga nagkakalakat ha kapatagan ngan kagurangan, sugad man an gudtiay nga mga insekto ngan an mga reptilya o reptile nga naukoy ha tuna. Iya ginhimo an mga linaw ngan kadagatan ngan an ngatanan nga linarang nga naukoy hito. Ginhimo Niya an mga kontinente diin an mga tawo han iba-iba nga kaliwatan mag-uukoy. Ginhimo han Dios an adlaw basi maghatag hin kalamrag ngan kapaso ngan an bulan basi maghatag hin kalamrag ha gab-i. Gin-adornohan Niya an langit hin yinukot nga mahusay nga naglalaga nga mga bitoon. Ha kataposan, ginporma han Dios an tawo tikang ha tapotapo han tuna. Iya ginhuyop ha iya irong an gininhawa han kinabuhi, ngan an tawo nahimo nga buhi nga kalag. Gintawag hiya han Dios nga Adan.
Nakita han Dios nga nagkikinahanglan hi Adan hin kabulig, salit ginpahinabo Niya nga mahulog hiya ha hilarom nga pagkaturog. Katapos, ginkuha han Dios an usa nga gusok ni Adan ngan ginhimo ito nga babaye. Hinigugma ni Adan hi Eva ngan hinigugma liwat hiya ni Eva. May-ada hira matam-is nga pakig-upod. Ini an plano han Dios para ha pamilya.
Ginhimo han Dios an ngatanan nga butang ha unom ka adlaw, ngan ha ikapito nga adlaw nagpahuway Hiya. Gin-usisa han Dios an ngatanan nga Iya ginhimo ngan nakita Niya nga maopay gud ito. Salit ginbendisyonan han Dios an ikapito ka adlaw ngan ginbaraan ito sugad nga adlaw han pagpahuway para ha tawo.
An Biblia nagsusumat mahitungod han usa nga nahulog nga anghel nga gintawag nga Satanas, o Yawa. Ginpaiwas hiya ha langit ngan amo an hinungdan han ngatanan nga karaotan. Tungod ha iya, an kasubo, pag-antos, sakit, ngan kamatayon inabot ha kalibotan.
An Makasurubo nga Tinikangan Han Sala
Hinigugma han Dios hira Adan ngan Eva. Naghimo Hiya hin makaruruyag nga hardin nga ira urukyan. Gintawag ito nga Tanaman han Eden. Hi Adan an magmamangno hito. Ini nga hardin may-ada damu nga klase hin mga utanon ngan prutas nga ira makakaon. May-ada usa nga kahoy nga gintatawag nga kahoy han kahibaro han maopay ngan maraot. Ginsidngan han Dios hi Adan nga diri hiya sadang kumaon hito nga kahoy, kay ha adlaw nga kumaon hiya hito, sigurado nga mamamatay hiya. Usa ka adlaw, kinadto hi Satanas kan Eva ngan nagsumat ha iya hin buwa. Hiya nagsiring, "Diri kamo mapatay . . . masusugad kamo han mga dios, nga maaram han kaopayan ngan han karaotan" (Genesis 3:4-5).
Samtang nagkikita hiya ha bunga hini nga mahusay nga kahoy, nakita niya nga maopay ito kaonon, ngan an pagkaon hito maghahatag hin kinaadman. Nagkuha hiya hin bunga, ngan gintagan hi Adan, ngan nangaon hira. Ha waray kaiha inabat nira nga salaan gud hira. Waray pa gud hira maka-abat hin sugad hito. Maaram hira nga sayop gud an ira ginbuhat. Naawod hira han ira pagtalapas. Nahadlok hira tungod kay naghunahuna hira nga makikigkita hira ha Dios. Salit tinago hira ha mga kahoy han hardin.
Ha pag-iha han adlaw, gintawag han Dios hi Adan ngan nagsiring, "Hain ka?" Diri hira makakatago tikang ha Dios, salit kinadto hira ha Iya ngan nagtug-an han ira pagtalapas. Ginpahibaro hira han Dios kon ano ka daku nga sala an pagtalapas ha Iya sugo. Ginsidngan Niya hira nga sirotan hira tungod han ira pagtalapas. Maeksperyensyahan nira yana an kasakit ngan problema ha ira kinabuhi. Kinahanglan na nira magtrabaho yana basi mabuhi. An ira mga lawas magkakaada kalagas ngan kagubaan. Mapatay hira ngan mabalik ha tapotapo.
Han ginpaiwas hira tikang hito nga makaruruyag nga hardin, iginbutang han Dios an mga kerubin ngan an naglalaga nga espada basi diri hira kumaon ha bunga han kahoy han kinabuhi. Nagtikang hira pagsabot han mga resulta han sala ngan han daku nga kabidoan nga gindadara hito.
An Makasurubo nga Resulta Han Sala
Nasubo gud hira Adan ngan Eva ha ira pagtalapas ha Dios. Bisan pa han ira sala, hinigugma gihapon Niya hira. Nagsaad Hiya nga magsusugo hin Paratalwas basi matalwas an katawohan.
Hi Kain ngan hi Abel amo an siyahan nga duha nga anak nga lalaki ni Adan ngan Eva. Usa ka adlaw, nagdara hira hin halad ngadto ha Ginoo. Gindara ni Cain an pagkaon nga iya gintanom. Hi Abel nagdara hin pinili nga karnero tikang ha iya panon ngan iginhalad ito, ngan iginbubo an dugo hito. Nalipay an Dios ha halad ni Abel, kondi waray malipay an Dios kan Kain o ha iya halad.
Han nakita ni Kain nga nalilipay an Dios kan Abel, naawa ngan nagdumot hiya kan Abel. Ngan usa ka adlaw, han nakadto hira ha uma, sinulong ni Kain an iya bugto nga hi Abel ngan ginpatay hiya. An Dios nagpakiana kan Kain, "Hain hi Abel nga imo bugto?" Diri karuyag ni Kain nga isumat an kamatuoran, salit nagsiring hiya, "Diri ako maaram: Magbarantay ba ako han akon bugto?" (Genesis 4:9) Hi Kain diri masinugtanon ha pagsunod ha mga instruksyon han Ginoo. Ginpahamangnoan hiya han Dios ugsa niya pataya hi Abel nga kon magbuhat hiya hin maopay kakarawaton hiya. Karuyag la unta niya nga magbag-o an iya disposisyon ngan higugmaon an iya bugto! Tungod han sala, naiiba na liwat an tawo ha Dios. Hi Kain nagin usa nga palagiw ngan usa nga naglilinakat-lakat.
Hinigugma Gud Han Dios an Kalibotan nga Iya Iginhatag an Iya Anak
"Kay natawo ha iyo yana nga adlaw . . . an Manluluwas, nga amo hi Kristo nga Ginoo" (Lukas 2:11).
Katapos mamatay hi Abel ngan bumaya ha ira balay hi Kain, nagkaada liwat hira Adan ngan Eva anak nga lalaki. An iya ngaran amo hi Set. Hi Set usa nga tawo nga may kahadlok ha Dios. Ginbendisyonan han Dios an mga tulin ni Set. Hinbatian ngan tinotoohan nira an urusahon nga mga saad han Dios mahitungod han usa nga Manluluwas nga ha urhi magluluwas ha ira. Hi Abraham, labi na gud, nagtoo ha Dios ngan tungod hito gintawag nga sangkay han Dios. Ginsidngan hi Abraham nga pinaagi han iya katulinan an ngatanan nga pamilya ha tuna mabibendisyonan.
Paglabay hin damu ka gatos ka tuig, gintuman han Dios an Iya saad nga magsusugo hin Manluluwas ha kalibotan. Nahinabo ito ha milagroso nga paagi, ha gutiay nga bungto han Betlehem ha Judea. Didto ha pasungan, natawo an bata kan Maria, nga birhen pa. Usa nga anghel an nagsiring kan Maria nga an ngaran han bata kinahanglan magin Jesus (nga nangangahulogan nga Manluluwas). Magigin bantogan Hiya nga magturutdo nga magsusumat ha mga tawo hin damu nga butang mahitungod ha Dios. Nagdaku hi Jesus pariho han iba nga kabataan. Han 12 anyos Hiya, mas nasabot Hiya han pulong han Dios kay han damu nga doktor ngan abogado ha Jerusalem. Baga hin maaram Hiya han ngatanan mahitungod han balaud ngan han mga propeta. Waray bisan hin-o nga nagpakiana nga diri Hiya makabaton.
Interesado gud hi Jesus ha mga panginahanglan han Iya katawohan. Han 30 anyos Hiya, nagtikang Hiya pagtutdo ha mga sinagoga. Usa ka adlaw Iya ginbasa an usa nga tagna ha Daan nga Testamento mahitungod han tiarabot nga Mesias. Han kahuman na Niya pagbasa, nagsiring Hiya ha mga tawo, "Natuman yana nga adlaw ini nga bahin han kasuratan nga hinbatian niyo". (Lucas 4:21) Gintutdoan Niya an mga tawo nga may awtoridad. Nagwali Hiya nga hirani na an ginhadian han Dios, ngan kinahanglan magbasol an mga tawo basi makasulod ha ginhadian. Gintutdoan Niya an mga tawo nga magsingba ha Dios nga mapainubsanon ngan sinsero. Ginsaway Niya an mga mapahitas-on ngan diri-tumuroo tungod han ira mga sala, ngan iginwali an Maopay nga Sumat han gugma ha mga pobre ngan kablas.
Nagtatanyag Hi Jesus Hin Kinabuhi nga Waray Kataposan
Hi Jesus nagsiring, "Ako amo an pagkabanhaw, ngan an kinabuhi: an natoo ha akon, bisan kon hiya mamatay, hiya mabubuhi" (Juan 11:25).
Hi Jesus nagbuhat hin damu nga mga milagro, nga nagpamatuod ha mga tawo nga Hiya an iginsaad nga Manluluwas nga ginsugo han Dios. Iya gintambal an mga magsakit, ginpahayag an mga buta, ginpabati an mga bungol, ginpaiwas an mga demonyo, ngan ginbanhaw an mga patay. Naglakat Hiya ha bawbaw han tubig ngan ginpahilum an bagyo pinaagi han Iya mga pulong. Naghimangraw Hiya ha kahoy nga igos, ngan han pagkabuwas nakita nga nalaya ito tikang ha mga gamot. Ginpakaon Niya an sobra lima ka yukot nga ginugutom nga tawo pinaagi han lima ka tinapay ngan duha nga isda. Nangaon ngan nagkabubusog an ngatanan, ngan natirok an dose ka basket han mga nanhisalin. An mga parapangisda nakadakop hin damu hinduro nga isda han iginhulog nira an mga pukot ha Iya sugo. Usa ka adlaw, nakaistorya ni Jesus an napulo nga sanlahon nga nakabati han Iya kabantogan. Nagsinggit hira, "Ginoo, kalooyi kami". Pinaagi han Iya pulong hira natambal.
Adlaw-adlaw nga ginsunod hi Jesus han damu nga tawo, ha mga bungto man o ha mga dalan. Ginbendisyonan an mga tawo pinaagi han Iya mahigugmaon nga mga pulong, pagkabuotan, pagpaid, ngan mga milagro nga Iya ginbuhat.
Nagtikang hiya pagsumat ha mga tawo nga hiya an Anak han Dios, ngan an Dios an iya Amay. An tanan nga tumuo han Iya mga pulong ginbendisyonan. Ginsidngan niya adton natoo nga hira mga anak han Dios.
Hi Jesus nagsiring ha Iya mga disipulo: "Makadto ako ha pag-andam hin lugar para ha iyo. Ngan kon ako kumadto, ngan mag-andam hin lugar ha iyo, ako makanhi liwat, ngan kakarawaton ko kamo ha akon ngahaw, basi kon diin ako, aadto man kamo. Ini nga lugar ha langit para ha ngatanan nga tangkod nga mga Kristiano.
"Kadi, kamo nga mga ginbendisyonan han akon Amay, panurundon an ginhadian nga igin-andam ha iyo tikang ha tinikangan han kalibutan" (Mateo 25:34).
Namatay Hi Jesus Para Ha Aton Mga Sala
"Han pag-abot nira ha dapit nga gintatawag “An Kalbaryo o calvary,” didto iginraysang nira ha krus hi Jesus" (Lukas 23:33).
An mga eskriba ngan mga Pariseo nasina hinduro kan Jesus ngan ha Iya katutdoan. Urog nga ginsaway Niya hira tungod han ira pagtinguha ha kadungganan ngan han ira ilegal nga mga paagi ha paghimo hin kwarta. Duro an ira pangabugho ngan kasina kan Jesus, kay damu nga mga tawo an natoo ha Iya, nagsunod ha Iya, ngan nagdadayaw ha Iya. Nahadlok hira nga himoon han mga tawo hi Jesus nga ira hadi.
Gin-aaghat nira hi Jesus nga magyakan o magbuhat hin mga butang nga makakapaluya han pagtoo han mga tawo ha Iya, kondi hi Jesus maaram hinduro para ha ira. Nagtikaduro an ira kangalas ngan kasina samtang nagtitikadamu an pagkilala kan Jesus. Kundi duro gud an ira kapungot, nga nagplano hira hin pagpatay kan Jesus.
Gindara nira hi Jesus ha hukmanan ngan gin-akusar Hiya sugad nga usa nga kriminal ngan nagpapasipara. Ngan damu an mga buwa nga ira iginsumbung kontra ha Iya. Katapos, gindara Hiya ngadto kan Poncio Pilato, an Romano nga gobernador han Judea. Tungod kay waray na Hiya makaagi hin sala kan Jesus, nagdesisyon hi Pilato nga buhian Hiya. Kondi an mga nag-aakusar kan Jesus nagin nasisina nga grupo ngan nagsinggit, "Igraysang Hiya ha krus! Igraysang Hiya ha krus! Han hinbatian ni Pilato an ira mabangis nga mga singgit ngan mga panarhog, ginsugot niya an ira mga hangyo ngan igintubyan hi Jesus ha ira. Ginkaptan nira hi Jesus ngan iginbutang ha Iya ulo an korona nga tunokon, ngan gin-insulto Hiya nga nasiring nga hadi Hiya. Ngan ira gintuprahan an Iya bayhon, ngan ginhampak Hiya. Ha kataposan, iginraysang nira Hiya ha krus ngan ginbayaan Hiya basi mamatay.
Hi Jesus waray sala nga ginpatay, pariho han karnero nga iginhalad ni Abel ha halaran ginatos ka tuig na an naglabay. Iginhalad ni Abel an iya karnero sugad nga simbolo han Kordero han Dios nga mamamatay para han mga sala han kalibotan. Igintagna liwat han kadaan nga mga propeta an pag-antos ngan kamatayon ni Jesus. Hi Juan nga Parabaptis nagsiring, "Kitaa, an Kordero han Dios nga nagkukuha han mga sala han kalibutan" (Juan 1:29). “Kay an Dios naghigugma gud han kalibutan, nga Iya iginhatag an Iya bugtong nga Anak, basi nga an ngatanan nga natoo ha Iya, diri mawara, kondi ma may kinabuhi nga waray katapusan.” (Juan 3:16).
GINBANHAW HI JESUS BASI MALUWAS KITA
"Waray Hiya dinhi, kay Hiya nabanhaw sugad han Iya siring. Kadi, kitaa niyo an lugar nga ginhigdaan han Ginoo" (Mateo 28:6).
Ha ikatulo ka adlaw katapos mamatay ngan iglubong hi Jesus, nga amo an siyahan nga adlaw han semana, an pipira nga kababayin-an kinadto ha lubnganan basi magdihog han Iya lawas. Tungod kay temprano pa ito ha aga, nahipausa hira nga nakita nga waray sulod an lubnganan. Waray na an lawas ni Jesus! Nababaraka gud hira. Tigda la nga duha nga anghel nga nagsusul-ot hin magsilaw nga mga bado an tinmindog hirani ha ira. Nagsiring hira: "Kay ano nga ginbibiling niyo an buhi dida ha mga minatay? Waray Hiya dinhi, kondi nabanhaw (Lukas 24:5-6). Nagdagmit hira pagbalik ngan iginsumat ha mga disipulo an ira hinkit-an ngan hinbatian. Waray tumoo an mga disipulo ha ira sumat, salit kinadto hira Pedro ngan Juan basi usisahon mismo. Hira, liwat, nakaagi han lubnganan nga waray sulod. Sinmulod hira ngan hinkit-an nira an lino nga bado ngan an hilawig nga dugnit nga ginputos ha ulo ni Jesus. Han pakakita nira hini nga mga butang, tinmoo hira han ginsiring han kababayen-an. Han pagkagab-i na hadto ngahaw nga adlaw, nagtirok an mga tinun-an ha sulod hin balay nga pinanadhan an mga porta kay nahadlok hira han mga punoan nga Judiyo. Ngan hi Jesus tinukdaw ha butnga nira, ngan siniring: ¡An kamurayaw magin iyo! Iginpakita Niya ha ira an Iya mga kamot ngan an Iya kagiliran. Nalipay an mga tinun-an han pakakita nira han Ginoo, ngan tinmoo hira nga amo Hiya hi Jesus nga iginraysang ha kros ngan nabanhaw. Katapos hini, nagpakita hi Jesus ha damu nga mga tawo sugad nga bug-os nga pamatuod han iya pagkabanhaw.
Han aga han pagkabanhaw ni Jesus amo pa gihapon an pinakamahimayaon nga adlaw ha kasaysayan. Hini nga adlaw, natapos an urusahon nga plano han Dios para ha katalwasan. Ini nga plano han katalwasan nag-aaghat hin pagbag-o ha mga kasingkasing ngan mga kinabuhi han mga tawo pinaagi han grasya han Dios pinaagi han pagtoo ha kamatayon ngan pagkabanhaw ni Jesus. "Sanglit kon an usa ka tawo aada kan Kristo, bag-o hiya nga binuhat: an mga daan nga mga butang nag agi na; kitaa, an ngatanan nga mga butang ginhimo nga BAG-O" (2 Korinto 5:17). Yana an ngatanan nga nakarawat kan Jesus ha ira kasingkasing ngan masinugtanon nga nasunod ha Iya ha bug-os nira nga kinabuhi babanhawon ngan mabubuhi ha waray kataposan ha langit. Hi Jesus nagsiring, "Tungod kay Ako buhi, kamo liwat mabubuhi" (Juan 14:19).
Nakakapalipay ba ha imo ini nga mensahe? Ano an imo baton? Magbabasol ka ba ngan matoo ha ebanghelyo? "Waray liwat katalwasan ha bisan hin-o nga iba: kay waray iba nga ngaran ha ilarom han langit, nga iginhatag ha mga tawo, nga sadang ta kaluwasan" (Buhat 4:12). Ayaw paglangan. Daop kan Jesus Yana.