An Singbahan han Dios dida kan Kristo, Mennonite o Church of God in Christ, Mennonite, amo an usa nga singbahan han mga magkalainlain nga mga denominasyon han Mennonite. Nangangalimbasog kami nga sundon an mga katutdoan ni Jesu-Kristo ngan han Iya mga apostol ha ngatanan nga mga butang han pagtoo ngan pagbuhat. Ini nga pagtoo ginkarawat ha bug-os nga kasaysayan han tuod nga mga Kristiano, upod na an mga Waldenses, bisan kon urog nga diri hinbabaroan ngan gintitimaraot.
Natuod kami nga an grasya han Dios nagdadara han personal nga katalwasan pinaagi han bag-o nga pagkatawo.
Ini nga bag-o nga pagkatawo nagtitikang ha pagtoo kan Jesukristo nga aton Manluluwas ngan nagriresulta hin pagbasol han sala ngan pagsugot han mga katutdoan ni Kristo. Inin bag-o nga kinabuhi dida kan Kristo nag-uurosa ha aton ha pakig-usa han minagburugto nga gugma.
Natuod kami nga an Biblia nagtututdo hin bunyag para ha mga tumuroo, diri pag-ato, ngan simple ngan kasadangan nga pagkinabuhi. An Biblia nagtututdo nga an mga Kristiano kinahanglan magin bulag (diri-nasunod) ha kalibotan, ha espiritu (panhunahuna ngan panlantaw) ngan paagi han pagkinabuhi. Tungod kay an mga Kristiano sakop han ginhadian han Dios, gintututdoan kita ni Kristo nga magkinabuhi nga mamurayawon kaupod han iba. Diri kami nakikigbahin ha pulitika, ha pinili nga opisina han gobyerno, o ha militar. Nagtututdo kami nga an Kristiano nga kalalakin-an sadang magbungot ngan an Kristiano nga kababayin-an sadang magsul-ot hin debosyonal nga pantabon ha ulo.
Tungod kay an iba hini nga mga doktrina ngan mga buhat naiiba tikang ha nangunguna nga Kristianidad, urog nga gintagad kami nga naiiba kay han iba nga mga Kristiano.
Tinikangan Han Mga Mennonites
An mga Mennonites natikang hadton kilala nga mga Anabaptist han ika-16 ka siglo. Ginsalikway han mga Anabaptist an bunyag han minasus-an (infant) ngan nagpatuman nga an tumuroo an angay bunyagan. Nagtoo hira ngan nagbuhat han pagtoo nga igintutdo ni Jesus ngan han mga apostol. Ini nga pagtoo iginpadayon han siyahan nga mga Waldenses ngan han iba nga nonconformist nga mga grupo tikang ha panahon han mga apostol. Ini nga mga tumuroo gintimaraot gud han mga Katoliko ngan mga Protestante tungod han ira doktrina ngan han ira pagigin bulag tikang ha mga singbahan han estado.
Han 1536 hi Menno Simons (1496-1561), usa nga Katoliko nga padi ha Holland, nagkamay-ada kombiksyon tungod han iya mga sala ngan nagtikang pag-aram ha Biblia. An iya pagbasol ngan pagsurender ha Dios nagresulta han iya espirituwal nga bag-o nga pagkatawo. Ginbawtismohan hiya han mga Anabaptist ngan ha urhi ginpili nga magin ministro. Usa nga may talento, mapainubsanon nga tawo, hi Menno Simon madasigon nga nag-awam han Biblia ngan nagin may kapas nga magturutdo ngan parasurat. Tungod han impluwensya ni Menno, an mga Anabaptist ha urhi gintawag nga mga Mennonites. Inin siyahan nga mga Anabaptist-Menonite kilala tungod han ira pagsunod ha mga katutdoan ni Kristo ha tagsa tagsa nga bahin han kinabuhi: putli nga pagyakan, desente nga panapton, integridad, kaputli ha moral, pagbulag ha bug-os, ngan diri pag-ato. An ira pagpirit nga maeksperyensyahan an pagbag-o han tikang han tinuod nga pagkakombertir kan Kristo amo an basihanan han ira paglakat ha kinabuhi.
An Simbahan han mga Mennonites ha America
Tungod han pagtimaraot ngan han ira hingyap nga magkaada kagawasan ha relihiyon, an mga Mennonites nagtikang bumalhin ha Amerika han 1683. Nagin maisog hira ha pag-atubang han peligro nga kinabuhi ngan nagin kilala sugad nga malinawon, mahadlukon ha Dios nga mga tawo, maligdong ngan debotado ha pagtoo, maduruto ngan kontrolado ha adlaw-adlaw nga pagkinabuhi. An pagtoo nga ira ginkarawat waray magtugot ha ira nga umapi ha gira, salit nagkaada hira reputasyon sugad nga katawohan nga mahigugmaon ha kamurayawan.
Pero, han mga panahon han pagsari o pagsuray ngan kauswagan nagdara liwat ito hin pagluya ha espirituwal. Ha sulod han ika-19 ka siglo (1801-1900), damu nga mga Mennonites an nagtikang pagbaya ha mga doktrina han ira mga kaapoy-apoyan. Upod hadton mga nakig-away para ha makasaysayanon nga pagtoo hi John Holdeman (1832-1900), han Condado han Wayne, Ohio. Nagtikaduro an iya pagsabot nga an Mennonite nga Simbahan diri na nagbubuhat han tuod nga doktrina ha damu nga bahin. Nanawagan hiya ha mga lider han singbahan para han espirituwal nga pagbangon. Bisan kon an iba inuyon ha iya ebalwasyon, gutiay la nga reporma an nahitabo. Han 1859, hiya ngan an iba nagtikang pagsingba nga bulag. Ha urhi, inin gutiay nga grupo nag-organisa sugad nga an Singbahan han Dios dida kan Kristo, Mennonites.
An Simbahan han Dios Dida kan Kristo, Mennonite
Hi John Holdeman usa nga puno hin Espiritu nga ebanghelista, magturutdo, ngan manunurat. An iya talagsahon nga sinurat amo an Mirror of Truth, usa nga libro han mga doktrina nga gintatahod pa gihapon han simbahan yana. Nagbiyahe hiya ha damu nga lugar sugad nga ebanghelista, ngan damu han namati ha iya pagsangyaw an nakaeksperyensya hin espirituwal nga bag-o nga pagkatawo ngan nabawtismohan. Naestablisar an pipira nga kongregasyon ha Estados Unidos ngan Canada.
Kahuman han kamatay ni John Holdeman, padayon nga nagtikadako an singbahan. Yana, an singbahan nagpupublikar ngan nanhahatag hin Messenger of Truth ngan mga tract ngan naghahatag hin bulig ha kalamidad ngan humanitarian aid o makatawo nga bulig. Makausa ha duha ka semana nga peryodiko, an Messenger of Truth, in iginpublikar tikang han temprano nga bahin han dekada 1900. An pag-ebanghelyo ngan paningkamot han pagmisyonaryo ginhihimo han mga indibidwal ngan pinaagi han organisado nga mga programa.
Yana, naestablisar na an mga kongregasyon o mga estasyon han misyon ha Estados Unidos, Canada, Mexico, ngan ha iba-iba nga nasud ha Aprika, Asia, Sentro ngan Sur Amerika, Caribbean, ngan Europa. Bisan man kon an gidako-i nga konsentrasyon hin mga miyembro aada ha Amihanan nga Amerika, an singbahan mayda mga miyembro ha bug-os nga kalibutan.
Kadam-an han mga kongregasyon an nagpapadalagan hin Kristiano nga eskwelahan ha katuyoan nga maghatag hin maopay, basihan nga edukasyon, samtang ginpapanalipdan an aton mga anak tikang ha kalibotanon nga mga impluwensya han hitaas nga edukasyon, kakulang hin disiplina, ngan kaylap nga pagkabungkag han moralidad ha sosiedad yana.
Gin-iimbitar namon an mga tawo han ngatanan nga kultura, lahi, ngan nasud nga kumadto kan Jesukristo para han katalwasan ngan magin bahin hini nga pagtoo ngan pakig-usa. Upod an buhi nga paglaum ha grasya han Dios nga igo para han aton katalwasan ngan espirituwal nga kaupayan, gin-aatubang naton an tidaraon nga may pagsarig ha Dios, nga naghuhulat han pagbalik ni Jesus.
Summary han Importante nga mga Doktrina han Biblia han Simbahan han Dios dida kan Kristo Church of God in Christ, Mennonite.
Katalwasan
Natuod kami nga an tawo natalwas pinaagi han grasya han Dios tungod han makapapara han sala nga paghalad ni Kristo. Ginpapakamatadong hiya pinaagi han dugo ni Kristo ha pagtapo han mga kondisyon han pagtoo, pagbasol, ngan pagkamasinugtanon. Pinaagi han bag-o nga pagkatawo hiya nagigin anak han Dios, natalwas tikang ha pagkondenar han sala, ngan nakikigbahin han kinabuhi nga waray kataposan. Bendisyon han tawo an pagkakaada han pansakob nga kasigurohan han kamurayawan ha Dios ngan an pagkahibaro han iya mga sala nga ginpasaylo (Mateo 24:13; Juan 1:12-13; Juan 3:16; Buhat 2:38; Roma 2:7, 3:20-26; Tito 2:8:2-9).
An Simbahan
Natuod kami nga an singbahan amo an lawas ni Kristo, nga ginkokomponer hadton mga natawo hin utro ngan nabunyagan ngadto han iya pakig-usa. Gintukod ni Kristo an usa nga tinuod, nakikita nga singbahan, ngan pinaagi ha simbahan Iya gintipigan an Iya pagtoo ngan doktrina ha bug-os nga mga panahon. Amo ini an diosnon nga misyon han singbahan nga magpasamwak han pagtoo han ebanghelyo ha kalibutan, mag-ataman han mga tinubos pinaagi hin pagtutdo hin pagsugot han mga sugo ni Kristo, ngan pagpakita hin surubdan hin mag-upay nga mga buhat para han himaya han Dios (Mateo 16:18; Efeso 5:23:117; 28:19-20; 1 Pedro 2:12).
Kahusay ngan Disiplina han Singbahan
Hi Jesus, komo ulo han singbahan, naghatag ha singbahan han awtoridad ngan responsabilidad nga:
1. Pagtawag ngan pag-ordina hin matinumanon, may kapas nga liderato (2 Timoteo 2:2; 1 Timoteo 3; Buhat 6).
2. Pag-areglar han pagsunod han mga ordinansa, upod na an bunyag ngan Panihapon han Ginoo . (Mateo 28:19-20; 1 Mga Taga-Korinto 11:2, 17-34).
3. Pagbuhat hin disiplina, lakip na an pagpaiwas ha singbahan, basi matipigan an kaputli han singbahan ngan ma-aghat an mga diri masinugtanon nga magbasol (Mateo 18:15-18; Galacia 6:1; 1 Corinto 5:1-5; Tito 3:10).
4. Pagkapot hin baraan nga kasuratan nga paglikay han mga ginpaiwas ha singbahan (Roma 16:17; 1 Corinto 5:11; 2 Tesalonika 3:6, 14-15).
Kamurayawan ngan Diri Pag-ato
An ginhadian ni Kristo mamurayawon ngan diri-naato ngan kinahanglan magpabilin nga bulag ha mga ginhadian hini nga kalibotan:
1. Kinahanglan bulag an singbahan ngan estado (Juan 18:36).
a) An singbahan gintatawag nga magmintinar han ebanghelyo nga suruklan han ginhadian ni Kristo para han mga nabag-o nga mga anak han Dios (Roma 12:17-21; Mateo 5:38-44).
b) An estado narepresentar han kanan Dios probidinsya nga butkon han katadungan ha sakob han sosyedad, pero diri responsabilidad han mga Kristyano nga magin mahidabi ha pagpatuman han katadungan (Roma 13:1-7).
2. An usa nga Kristiano diri puydi magkapot hin katungdanan sibil, bumotos ha sibil nga eleksyon, o lumingkod ha mga hurado sibil (Juan 18:36).
3. An Biblikal nga diri pag-ato iginbasar ha diosnon nga gugma ha ngatanan nga katawohan ngan nagkikinahanglan nga an usa nga Kristiano diri:
a) Parag-away ha iya mga igkasi-tawo.
b) Gamiton an balaud ha pagbulos o umapi ha mga kaso.
c) Pagbalos hin maraot ha maraot.
d) Mabulig ha armado nga pwersa o gerra ha ano man nga porma.
e) Magserbisyo ha sibil nga pagpatuman han balaud.
( 2 Korinto 10:3-4; Mateo 5:38-44; Roma 12:17-21 )
4. Katungdanan han Cristiano an pagbayad han iya mga buhis (Roma 13:6-7), pag-ampo para han mga magmarando sibil (1 Timoteo 2:1-4), ngan magpasakop han estado basta diri ini nasupak han iya Kristiano nga pagtawag (Roma 13:1-7; Buhat 5:29)
Diri Pagsunod ha Kalibutan
Diri pwede higugmaon han usa nga Kristiano an kalibotan o sumunod ha mga paagi han kalibotan. Kinahanglan hiya magin bulag ngan magkinabuhi hin baraan nga kinabuhi (Roma 12:1-2). Salit, ginlilikyan an uso, unodnon nga kalipayan ngan kaliawan, kompetisyon nga mga isport, politika, dungganon nga negosyo, idolatroso nga arte, ngan iba pa. An Kristiano waray interes ha telebisyon, radyo, sine, popular nga musika, ngan sarayaw. Iya ginlilikyan an iya kalugaringon tikang ha de-alkohol nga irimnon, igindidiri nga mga droga, pagsigarilyo, ngan ha ngatanan nga klase hin imoralidad ( Lukas 16:15; 1 Pedro 4:1-4).
Mga Ordinansa han Bag-o nga Tugon
Natuod kami nga importante gud an pagsunod han mga ordinansa sugad han igintutdo ni Kristo ngan han mga apostol:
1. An bunyag in ginbubuhat la ha pagkumpisal han pagtoo han indibidwal. Usa ini nga tigaman ha gawas hin paglimpyo ha sulod ngan pagpuno han Espiritu Santo. An singbahan padayon nga nagbubuhat han bunyag pinaagi hin pagbuhos, sugad han ginbuhat han mga Anabaptist (Mateo 28:19-20; Buhat 2:38).
2. An komunyon ginsasaurog komo paghinumdom han kamatayon ni Kristo, nga nagsisimbolo han dugo ngan lawas ni Kristo, nga gin-uunahan han pag-usisa han kalugaringon (1 Corinto 11:23-33).
3. An paghugas han mga tiil gin-oobserbahan upod han serbisyo han Komunyon, nga nagsisimbolo han malimpyo nga paglakat han kinabuhi ngan han pagpaubos han pagserbisyo ha usa kag usa ha Kristiano nga pagminagburugto (Juan 13:1-17).
4. An head cover o belo in ginsusul-ot han mga sister nga miyembro pinaagi han bunyag. Nagpapasabot ini han ira pagpasakop ha lalaki sumala han sugo han Dios (1 Corinto 11:3-12).
5. An baraan nga pag-asawa in usa nga ordinansa nga nag-uupod han pag-asawa hin usa nga lalaki ngan usa nga babaye ha bug-os nga kinabuhi, nga nagkakaurosa ha Ginoo, nga nagsisimbolo han baraan nga relasyon ni Kristo ngan han singbahan (Genesis 2:18 24; Efeso 5:22-25). Natuod kami nga sayop an pag-asawa han usa nga Kristiano hin diri tumuroo (2 Corinto 6:14).
An Kataposan Hinin Kalibutan Yana
Nagtutuo kami nga ini nga kalibutan yana matatapos pinaagi han mahimayaon nga pagpakita han Ginoo Jesukristo (Mateo 25:31-46; Tito 2:13; 2 Pedro 3:10-14).
1. Kon bumalik na hi Cristo, diri hiya magtutukod hin ginhadian ha kalibutan, kundi maghuhukom hiya han kalibutan (2 Corinto 5:10; Mateo 25:31-46).
2. Magkakaada hin lawasnon nga pagkabanhaw han mga patay, han mga natalwas ngan han mga diri natalwas, ha pagbalik han Ginoo (1 Corinto 15; Juan 5:28-29; 1 Tesalonica 4:13-17).
3. Hi Jesus maabot na ha diri na maiha basi mag-angkon han mga Iya (Juan 14:2-3; Buhat 1:9-11; Pahayag 22:20).
Langit
Natuod kami nga an langit amo an katapusan nga pahuwayan han mga magtadong diin hira mag-uukoy ha kabug-osan han kalipay upod han Dios ngan han mga baraan nga anghel ha kadayonan (Juan 14:1-3; Salmo 16:11; 1 Corinto 15:50-54; Mateo 6:19-20; Pahayag17:9-9). Karuyag han Dios nga matalwas an ngatanan (2 Pedro 3:9; Pahayag 22:17).
Impyerno
Natoo kami nga an impyerno amo an lugar han waray katapusan nga pagsakit nga igin-andam para han yawa ngan han iya mga anghel, ngan an mga maraot mag-aantos upod ha ira ha kadayonan. (Mateo 25:41, 46; Daniel 12:2; Pahayag 19:3, 20:10, 21:8).