Usa han nangunguna nga mga tumong han tawo ha kinabuhi amo an kalipay. An kalipay pwede magin makuri mabilngan. Damu an namimiling hin kalipay ha mga kaliawan ngan karisyohan. Nangangalimbasog hira nga matagbaw an ira kalugaringon pinaagi ha pagbuhat han “makalilipay.” An inaabat nga maopay bangin ha pagkamatuod makakadaot ha kinaiya ngan ha kaupayan han espiritual nga bahin.
Damu nga tawo an natoo nga an kalipay pwede mabilngan kon may-ada “mahadugang pa.” Gintotoohan nga an pagkaada hin damu nga mga papliton ngan mga kasayonan makakatagbaw. An paglaom nga pinaagi han pagkaada hin dugang nga panahon ha paglibang ngan dugang nga kagawasan para ha mga buruhaton sugad han mga kaliawan ngan isport, mabibilngan an katumanan. Ginsasalingabot gud han sistema han komersyo ngan han media ini nga gintotoohan. Ginsusuhestyon nga an ira produkto o eksperyensya magbubuhat han diri bubuhaton han iba. Ginhihimo an mga papliton nga nakakatagbaw ha halipot la nga panahon. An pagtravel ginbubuhat ha paglaom nga may-ada mas totoo nga nagpapadayon nga maeksperyensyahan. Ginbibiling ngan ginpapalit an bag-o nga mga sarakyan, ngan mas damu ngan mas maopay nga mga garamiton ha isport, kondi pirme ini diri nakakahatag hin totoo nga kamurayawan ha hunahuna.
Ha pangalimbasog nga makabiling hin katagbawan, an mga tawo namimiling hin bag-o nga butang, makaruruyag, bisan bayolente o makurulba nga butang. An mga kaliawan ha parke nagtatanyag hin mga pagsakay ngan mga adbentura nga naabot ha tubtoban ha mga kulba ngan ha pagsuray han kaya han lawas ngan hunahuna. An industriya han kaliawan binaton ha mga hingyap han tawo nga may urusahon nga mga resulta. An telebisyon, sine, radyo, internet, magasin, ngan libro hura hin kaliawan nga makaarawod, ha pagsiring. Pinaagi hini nga mga butang ginseserbihan an maibog ngan hakog nga mga hingyap han sosiedad. Damu nga oras an ginagamit ha pagkinita, pagbasa, ngan pamati hin materyal nga nakakadaot ha hunahuna, lawas, kalag, ngan tungod hito, ha panimalay.
Agsob o urog nga an kaliawan ginagamit sugad nga paagi ha pagpalagiw ha kamatuoran han kawaray-pulos nga aton inaabat ha sulod. An mga tawo nga nag-uusahan namimiling hin makakaliaw han ira unodnon nga pagkatawo. Ano gud ba an aton karuyag? Ano gud ba an mabaton han mga panginahanglan han kalag? Mabibilngan ba ito hini nga mga kalipayan?
Labot la han kalipay nga aton nakakarawat tikang hini nga mga buruhaton, may-ada ha aton nakatago nga hingyap nga magin labaw. An hingyap aada ha paglabaw ha aton mga kaupod, o ha naestablisar nga suruklan. Ini nga hingyap an nag-aaghat ha damu nga mamiling hin ngaran para ha ira kalugaringon. An kalibotan han isport nagkikinahanglan, ngan nakakakuha, hin damu nga kwarta ngan atensyon. Iginhahatag han kalalakin-an ngan kababayin-an an gimaopayi nga bahin han ira kinabuhi hini nga pangalimbasog.
Damu hini nga mga kaliawan ngan mga buruhaton an ginbibiling ha kadak-an para ha aton kalugaringon nga kalipayan ngan katagbaw. Mas gintatagad naton kon ano an makakapahimulos ha aton kay han makakapahimulos ha iba. Kadam-an han pag-api ha isport, iba pa nga kaliawan ngan mga buruhaton, an ginpapagios han kahakog. An personal nga kalamposan ngan kalipay amo an waray-ipahayag nga hinungdan hinin kinakarawat han kadam-an nga mga kaliawan.
Samtang ginbubuhat inin makikalugaringon nga pangalimbasog an masunod nahitatabo: an mga singbahan nagtitikaluya, an mga programa ha kaopayan iginpapabay-an ha mga gobyerno, ngan an mga makililimos o waray urukyan bangin pakaunon pero diri gin-aataman. Mas makasurubo pa gud, an kabataan diri nakakabiling hin seguridad han marig-on nga urukyan. An mga tawo nagigin diri kontento ha kinabuhi nga ira nakikita nga waray kahulogan ito ngan waray sulod. Mas nakukurian hira pag-istorya mahitungod han mga butang nga importante gud. An makikalugaringon nga mga kalipayan nagigin mga kasaliwan, ngan mga pagpapalimot ha, kon ano an kulang ha kahiladman han sulod han tawo. Ginpapaligid na la an Ginoo.
An Kalag han Tawo Gin-uuhaw
Siring ni Jesus ha Juan 4:10, 13-14 nga mayda Hiya tubig nga ihahatag ha aton nga makakaparong han aton kauhaw ha kadayonan! Kinahanglan matagbaw an hilarom nga panginahanglan han kalag. An kalag waray katapusan ngan matatagbaw la ha waray katapusan nga mga kamatuoran.
An Biblia nagtututdo nga an Kristiano kontento ngan malipayon nga tawo. Nagtututdo ito nga makakabiling la kita hin kalipay pinaagi han pagbiling anay han kaburut-on han Dios. “Kundi pamilnga niyo anay an Ginhadian han Dios ngan an iya katadongan, ngan ini ngatanan ihahatag ha iyo” (Mateo 6:33). An mga tawo namimiling hin kalipay pinaagi han hakugnon nga mga paagi, kondi an kabantogan o swerte o kalipayan diri gud makakahatag hin labaw pa kay han madaliay la nga katagbawan.
Mayda plano an Dios para ha aton kun diin nakakaeksperyensya kita hin katumanan. Karuyag han Dios nga giyahan kita ngadto ha bug-os nga pagpasakop ha iya kaburut-on, nga magriresulta hin katagbawan ngan kamurayawan nga nagsasaliwan han ngatanan nga tunan-on nga mga kalipayan. An plano han Biblia, kon susundon, matahom nga nagpupuno han tagsa tagsa nga panginahanglan nga may-ada kita.
An Biblia nagtututdo nga pwede kita magkaada duok nga pakig-upod ha Dios. An iya pulong pwede magin pamalandong han aton mga kasingkasing. An kamurayawan pwede umupod ha aton ha adlaw ngan ha gab-i. An Espiritu Santo amo an aton pagliaw ngan pirme nga kaupod. Inin espirituwal nga relasyon ha Dios para ha bisan hin-o nga natawo utro ngan kinaburut-on nga nagpapasakop han iya kalugaringon ha giya ni Kristo ha tagsa tagsa nga bahin han iya kinabuhi. Inin duok nga pakig-usa ha Dios nag-aaghat ha aton hin kinabuhi hin pagserbisyo nga mapulsanon gud.
An mga kaliawan nga igintatanyag han kalibotan diri nakakaaghat hin espirituwal nga kinabuhi. An mga buruhaton, kaliawan, ngan bisan an mga panhunahuna nga nagseserbi ha kalugaringon, supak ha kinabuhi kan Kristo Jesus. Amo ini an hinungdan nga ginduduon ni apostol Juan, “Ayaw niyo higugmaa an kalibutan, bisan an mga butang nga aada ha kalibutan. Kon an tawo nahigugma han kalibutan, waray dida ha iya an gugma han Amay. Kay an ngatanan nga aada ha kalibutan, an kaipa han unod, ngan an kaipa han mga mata, ngan an pagpahitaas han kinabuhi, diri tikang han Amay (Juan-1:15). Hi Pablo, ha Roma 8:5-7, nagtututdo nga an lawasnon nga hunahuna amo an kaaway ha Dios. An unudnon nga hunahuna nahigugma han mga butang han unod kay han mga butang han Dios. An dalan han kalipayan baga hin maopay hinduro; kondi, masaliwan ito han debosyon nga kinahanglan magkaada kita para ha Dios. Ginpapahamangnoan kita nga ha katapusan nga mga adlaw “an mga tawo magigin mahigugmaon ha ira kalugaringon... mahigugmaon han kalipayan labaw han paghigugma han Dyos” (2 Timoteo 3:2-4).