An Kristianidad iginbasar ha Dios, ha Iya Anak nga hi Jesu-Kristo, ngan ha Biblia, nga amo an Pulong han Dios. An usa nga Kristiano amo an usa nga natoo ha Biblia ngan nag-uukoy uyon ha mga katutdoan ni Jesu-Kristo. Ini nga paagi han pagkinabuhi nagdadara hin kamurayawan ngan katagbaw o contentment dinhi hini nga tuna ngan nag-aandam ha aton para ha urukyan ha langit.
Dios nga Amay
An Biblia nagtututdo nga uusa la an Dios nga tikang pa ha tinikangan ngan magpapadayon ha kadayonan. Maaram an Dios han ngatanan nga butang ngan waray katubtoban an Iya kinaadman ngan kahibaro. An Biblia nasiring ha Proberbios 15:3, "An mga mata ni Jehova aada ha ngatanan nga lugar, nga nagbabantay han mga magraot ngan han mga magopay". Aada Hiya ha bisan diin ngan makakaghatag hin bug-os nga atensyon ha ngatanan ha bug-os nga kalibotan ha pariho nga panahon. Makag-ampo kita ha Dios ha bisan diin ngan ha bisan ano nga panahon. Namamati Hiya ha aton mga pag-ampo ngan babatunon ito ha paagi nga Iya ginkikinahanglan. Usa la an Dios ngan iginpahayag Hiya ha tulo nga persona: an Dios nga Amay, an Dios nga Anak, ngan an Dios nga Espiritu Santo. Ini nga tulo diri magkapariho, kondi nagkakaurosa Hira ha pagkaurosa tungod kay uusa la Hira.
An Paglarang Ngan an Pagkapukan Han Tawo
Ginlarang han Dios an kalibotan ngan an ngatanan nga aada hito. Ha sulod hin lima ka adlaw ginlarang han Dios an adlaw, bulan, mga bitoon, tuna, tubig, katamsihan, ngan isda. Ha ikaunom ka adlaw ginlarang han Dios an ngatanan nga linarang ha tuna, ngan katapos ginlarang an tawo ha Iya kalugaringon nga dagway. An tawo amo an korona han mga linarang han Dios ngan an kapahayagan han Iya gugma. Ginlarang han Dios hi Adan, an siyahan nga tawo, nga putli ngan waray sala. Karuyag han Dios nga an tawo mag-alagad ha Iya pinaagi han personal nga pagpili. Gintagan Niya hira Adan ngan Eva hin simple nga sugo, kondi ginpili nira nga magtalapas. Tungod han ira sala, nabulag hira ha Dios. Tungod han ira pagtalapas, an ngatanan nagpakasala ngan namamatay. An Dios la an makakatalwas han katawohan. Tungod han Iya gugma, "iya iginhatag an iya bugtong nga Anak, basi an ngatanan nga natoo ha iya diri mawara, kondi ma may kinabuhi nga waray kataposan" (John 3:16).
Dios nga Anak
Hi Jesu-Kristo amo an Anak han Dios. Kinmanhi Hiya ha tuna sugad nga bata, nga natawo tikang ha usa nga birhen pinaagi han gahum han Espiritu Santo. Hi Jesus nagkinabuhi sugad hin ordinaryo nga tawo. Ginsulay Hiya han Yawa ha damu nga paagi pariho ha aton, kondi waray Hiya makasala. Naglakat hi Jesus ha pagbuhat hin maopay, gintambal an damu nga mga tawo han ira mga sakit. Gintutdoan Niya hira mahitungod han kaluwasan ngan han gugma han Iya Amay. An Iya katuyoan ha pagkanhi ha tuna amo an paghalad han Iya kalugaringon sugad nga halad tungod han sala han bug-os nga kalibotan. Samtang nagsasangyaw hi Jesus kontra ha sala ngan kahakog, nasina ha Iya an mga lider han relihiyon. Sanglit igintubyan Hiya ha ira, ngan iginraysang Hiya ha kros. Katapos mamatay ha krus, iginlubong han Iya mga disipulo an Iya lawas. Ha ikatulo ka adlaw, pinaagi han gahum han Dios, binanhaw hi Jesus tikang ha mga patay. Ugsa Hiya bumalik ha langit, gintutdoan Niya an Iya mga sumurunod kon paonan-o pagtrabaho han ginhadian han Dios.
Dios nga Espiritu Santo
An Espiritu Santo amo an ikatulo nga persona han Dios. Iya iginpapahayag an kaburut-on han Dios ha tawo. Iya ginsasaway an mga tawo tungod han ira idolatriya ngan makasasala nga mga buhat. Gin-iimbitar Niya an tawo nga karawaton an halad ni Jesu-Kristo sugad nga halad ha pagpasaylo han ira sala. Ha ira nga natoo han Ginoo Jesu-Cristo, iginhahatag han Dyos an Espiritu Santo. Usa Hiya nga magsaragdon ha ngatanan nga kakurian han kinabuhi, usa nga paraliaw ha ngatanan nga kakurian. Iya ginsasagdonan an mga tawo han diri pagkamatadong, nga naggigiya ha ira ngadto ha bug-os nga kamatuoran.
An Biblia
An Biblia amo an Pulong han Dios ngan an Iya mensahe ha tawo. Diri ito libro nga hinimo han tawo kondi iginsurat han baraan nga mga tawo ha kadaan nga panahon nga gin-giyahan han baraan nga espiritu. An Biblia nagsusumat han paghimo han kalibotan ngan han tawo. Iginsusumat hito ha aton nga an ngatanan nakasala ngan an sala nagbulag han tawo tikang ha Dios. Iginsasaysay hito an paagi han pagtubos nga makakahatag hin kagawasan ha ngatanan tikang ha pagkauripon han sala. An Biblia nagtututdo ha aton kon paonan-o mag-uukoy hin diosnon nga kinabuhi ngan kon paonan-o mag-aandam para ha waray kataposan.
Pagkinabuhi Sugad nga Kristiano
Basi magin Kristiano kinahanglan masabtan naton an aton makasasala nga kahimtang. Kinahanglan isumat naton an aton sala ngan karawaton an Ginoo nga hi Jesu-Kristo sugad nga aton Manluluwas. Samtang iginhahatag naton an aton kinabuhi ha Dios, ginpuno kita Niya han Iya Baraan nga Espiritu. An gahum han Espiritu nga nag-uukoy ha aton nakakahimo ha aton nga higugmaon ngan pasayloon an iba. An usa nga Kristiano nangangalimbasog nga matipigan an kaputli han Iya kasingkasing ngan magin tangkod ngan matinud-anon. Kon napakyas kita, an Biblia nagsasaad nga "kon igkumpisal naton an aton mga sala, hiya [Dios] matinumanon ngan matadong ha pagpasaylo han aton mga sala, ngan paglinisan kita ha ngatanan nga karaotan" (1 Juan 1:9).
Katapos Han Kinabuhi
An langit amo an urukyan han Dios. Ito an gimaopayi nga lugar han hingpit nga kamurayawan ngan pagpahuway nga igin-andam han Dios. Ha langit mawawara na an kabidoan o kasakit, mawawara na an gutom o sakit. Ito an urukyan han ngatanan nga binaya ha sala ngan kinarawat hi Jesus sugad nga ira Manluluwas. Didto an mga naluwas magkakanta ngan magdadayaw ha Dios ha waray kataposan.