Balay nga Malipayon
An Biblia naghahatag ha aton hin plano para ha usa nga balay nga mag-opay an disenyo, marig-on an istraktura, ngan makaruruyag an atmospera. An balay pwede magin lugar han pagkaurosa ngan kalipay, o usa nga lugar han tensyon ngan pakiglantugi. Malipayon ba, marig-on, ngan makakatalwas han mga bagyo han kinabuhi an imo balay?
An panimalay importante nga yunit han sosiedad. Gintagan ito han Dios para ha aton espirituwal nga pag-uswag, emosyonal nga kalipay, ngan pisikal nga katagbawan. An plano han Dios pirme nga an mga membro han panimalay maghatag hin kalipay ha usa kag usa ngan an mga pamilya mag-uukoy ha pagkaurosa.
Kay Ano May Mga Pamilya nga Diri Malipayon
Kon sugad, kay ano nga damu nga mga pamilya an diri malipayon? Kay ano nga an mga relasyon ginbubungkag tungod han diri pagkaurosa, pagbulag, ngan pagdiborsyo? Tungod ito kay waray nira tagda an surubdan han Dios. Ha sulod han iya Pulong makikita an ginkikinahanglan nga materyales ha pagtukod hin malipayon nga panimalay. An mga balay nga gintukod uyon ha iya Pulong amo an mga lugar han gugma, pagsarig, interes ha usa kag usa, ngan diri-hakugnon nga pag-alagad ha usa kag usa. An sugad nga mga panimalay magdadara hin kalipay ha aton kinabuhi ngan magpapadayon han aton mga komunidad ngan mga nasud. Ginsusunod mo ba an plano han Dios, an Magaling nga Arkitekto? "Kon diri an Ginoo an magtukud han balay, waray kapulsanan an pagbudlay nira nga nagtukud hito" (Salmo 127:1).
Ha pagkabatan-on, iginbubutang an pundasyon han aton tidaraon nga mga balay. An putli nga pagkinabuhi ha atubangan han Dios importante nga bahin ha aton pag-andam para ha pag-asawa. An sala ugsa han pag-asawa nakakadaot han moral nga magigin marig-on ngan nakakadaot han magigin panimalay. An pagin makikalugaringon ngan an pagtagbaw ha kalugaringon ha aton pagkabatan-on nag-aaghat hin paagi han pagkinabuhi nga nakakadaot ha pag-asawa. An hitaas nga kadamu han mga pagdiborsyo amo an igo nga pamatuod hini nga mga kamatuoran. Ini nga mga sala kinahanglan bug-os nga pagbasolan ugsa magkaada hin bag-o nga kinabuhi dida kan Kristo. An naglabay puydi na bayaan ngan masulod an Dios upod an iya mga bendisyon.
An pamilya nagtitikang kon an lalaki ngan an babaye nag-aasawa. An Biblia nasiring nga sadang kita mag-asawa "ha Ginoo la" (1 Corinto 7:39). Nangangahulogan ini nga an lalaki ngan babaye igintubyan an ira kinabuhi ngan kaburut-on ha Ginoo. An Dios kinahanglan magin siyahan. Kon an bana ngan an asawa diri makikalugaringon, magkakaada hira kalipay.
Pag-Asawa Ha Kaburut-on la Han Ginoo
An pag-asawa "ha butnga han Ginoo" diri la nangangahulogan nga an lalaki ngan babaye mga Kristiano, kondi nangangahulogan liwat nga an Ginoo maggigiya ha ira ha usa kag usa. An mga hingyap ngan unodnon nga paghigugma diri maopay nga tinikangan nga panag-asawa. Kon amo ini an basihan han aton pag-aghat ha usa kag usa, bangin magkaada kapakyasan ngan pagkontra katapos han pag-asawa. Samtang nasarig kita ha Ginoo ha paggiya ha aton pagpili, an iya diosnon nga kinaadman naghuhunahuna na kon hin-o an aton ginkikinahanglan nga padis. An iya plano diri la para yana kondi para liwat ha mga tuig ha tidaraon. An Ginoo pwede magpili hin magkalainlain nga mga templa ngan mga kinaiya nga masuporta ha usa kag usa, nga magriresulta hin mas balanse nga yunit. "Ngan hira nga duha magigin usa nga unod" (Markos 10:8).
An pag-asawa gindisenyo basi magin permanente nga bugkos, diri la legal nga kontrata. Iginhatag ni Jesus ini nga klaro nga sugo, "Sanglit diri na hira duduha kundi uusa nala. Kinahanglan diri han tawo pagbulagon an gin-usa han Dyos." (Mateo 19:6).
An Diosnon nga Order
An panimalay usa nga gutiay nga komunidad ha sulod hito mismo, ngan, sugad han bisan ano nga sosyal nga yunit, kinahanglanon nga an mga lugar may-ada mga responsabilidad. Iginhatag ha aton han Dios an eskedyol hini nga kahikayan ha Biblia. Usa ito nga suruklan han awtoridad nga, kon ginsusunod, magdadara hin kahusay ngan kalipayan ha panimalay. An pinakadaku nga responsabilidad ginkikinahanglan ha bana, sunod ha asawa, ngan katapos ha anak, uyon hito nga pagkasunodsunod. (Basaha liwat an 1 Korinto 11:3 ngan Efeso 5:22-24.) Kon gintatagad ngan gintutugotan han Dios an usa nga prinsipyo, ito nagigin sagrado. An bisan ano nga pagtalapas hito nga sugo magdadara hin daku nga kasubo. Ha luyo nga bahin, ginbibendisyonan Niya adton masinugtanon ha Dios pinaagi han pagkamatadong, kalipay, ngan grasya.
Ha pag-asawa, an bana ngan an asawa nagtitikang hin relasyon diin an kada tagsa may-ada responsabilidad ngan obligasyon. Hira nga duha ginkikinahanglan tungod han ira magkalainlain nga mga buruhaton ngan natural nga mga abilidad basi magin kompleto an balay. Kinahanglan nga may-ada magdumara, ngan iginhatag han Dios ini nga katungdanan ha lalaki. "Kay an asawa nga lalaki amo an olo han asawa nga babaye, sugad man nga hi Kristo amo an ulo han singbahan... ngan iginhatag niya an iya kalugaringon tungud hito" (Efeso 5:23, 25). An sugad nga gugma nag-uupod hin espiritu han pagsakripisyo. An mahigugmaon nga gugma amo an nagpapagios ha bana nga trataron an iya asawa "sugad han iya kalugaringon nga lawas" (Efeso 5:28). An mahigugmaon nga bana diri nagtatagad ha iya asawa sugad nga ubos ha iya. Lugod, isasangyaw niya ha iya an iya mga pagbati ngan mangangaro hin sagdon ha iya, ngan tungod han iya gugma ha iya, magigin tinuod hiya nga padis.
"Ha sugad man nga paagi, kamo nga mga asawa, magpasakup kamo ha iyo mga asawa nga kalalakin-an" (1 Pedro 3:1). Kon ginsusunod han asawa an pagpanguna han iya bana ha panimalay, sugad la nga masinugtanon nga nasunod hiya kan Kristo, ito nga balay magigin usa nga urukyan han kamurayawan ngan kakontento. An Efeso 5:33 nasiring, "An asawa nga babaye magtahud ha iya asawa nga lalaki.” An pagrebelde kontra hini nga prinsipyo nagresulta hin daku nga kasubo ha mga panimalay yana nga panahon. An pagbalewaray hini nga prinsipyo diri la nagriresulta hin pagkontra ha kinabuhi han pamilya, kondi nagriresulta liwat hin espirituwal nga pagkontra ha kasingkasing han asawa.
An Lugar Han Kabataan
Karuyag naton hunahunaon nga putli ngan inosente an kabataan. Kondi, an ngatanan natawo nga may-ada makasasala nga kinaiya. Samtang nagtitikadaku an bata, an iya hakugnon nga kinaiya mas nakikit-an. Magdadara hiya hin duro nga kasubo ha iya kalugaringon ngan ha iba kon diri disiplinahon han mga kag-anak ini nga mga hilig.
An katungdanan han bata amo an pagsugot han iya mga kag-anak. "Mga anak, magmasinugtanon kamo ha iyo mga kag-anak ha Ginoo: kay ini amo an matadong" (Efeso 6:1). An hingpit nga susbaranan hini nga pagkamasinugtanon makikita ha kinabuhi ni Jesus sugad nga bata. "Ngan linusad hiya upud ha ira, ngan inabut ha Nasaret, ngan nagmasinugtanon ha ira" (Lukas 2:51). Kon an prinsipyo han pagpasakop ginsusunod ngan amo an rutina han panimalay, an mga kag-anak ngan mga anak magigin mas malipayon, ngan an balay magigin mas makalilipay.
Kon tipigan an kahikayan o order han Dios, an mga kag-anak mabubuhi para ha ira mga anak, an mga anak para ha ira mga kag-anak, ngan an ngatanan mabubuhi para ha Dios. An sugad nga mga balay magbibendisyon han aton mga komunidad ngan maghahatag hin kalidad ha aton mga nasud.
Damu nga batan-on an naapi ha mga droga, fashion, mga uso, ngan kalibotan han kaliawan. Nabibitik hira han malaksi nga sosyodad nga naghahapil o nagbaliwaray han mga prinsipyo ngan moralidad. Ha usa ka panahon, ini nga mga prinsipyo o moralidad naghatag hin gitas-on nga karig-onan ha aton mga komunidad. An kawaray kasigurohan ngan kawaray kamalipayon nga mga panimalay ba an hinungdan han aton masamok ngan diri kontento nga mga batan-on? Ano an imo mahihimo mahitungod hito? Nahinunumdoman mo na ba nga an paghimo han imo balay nadepende ha imo ngan ha imo pagin tangkod ha Dios?
Hi Kristo an Patukoranan
Kon karuyag naton magtukod hin marig-on ngan malipayon nga pamilya, hi Jesu-Kristo an kinahanglan nga magin pundasyon. An uran bangin umabot ngan an mga bagyo makusog kontra hito, kondi upod ni Kristo magpapabilin ito nga marig-on (Mateo 7:24-27). Hiya an mahatag ha aton han giya, kusog, ngan kaisog nga magigin malampuson ngan malipayon an aton mga panimalay dinhi hini nga mabangis, waray-pagpailob nga kalibotan. Andam na hi Jesus nga sumulod ha aton mga balay. Hiya nasiring, "Kitaa, ako natukdaw ha ganghaan, ngan nagtutuktok" (Pahayag 3:20). Siyahan, Iya gintutuktok an purtahan han aton mga kasingkasing ngan katapos an purtahan han aton mga balay. Tutugotan ba naton Hiya nga sumulod?
An malipayon nga panimalay nagtitikang ha aton kasingkasing. Diri kita magkakaada tuod nga kamurayawan ha aton mga balay kon waray kamurayawan ha aton kasingkasing. An personal nga kada adlaw nga kadaogan ha mga irritasyon ngan mga kapakyasan han adlaw pwede magin aton kon nasarig kita ha Dios. "An Iya hunahuna aada ha imo, imo Hiya pagbantayan ha hingpit nga kamurayaw; kay Hiya nasarig ha imo" (Isaias 26:3).
An diosnon nga pamilya mag-aampo para ha ira kalugaringon nga mga kasingkasing, para ha ira balay, ngan para ha mga panginahanglan han komunidad. An pag-ampo nag-uurosa han pamilya. Sugad han ginsisiring, "An pamilya nga nagkakaurosa ha pag-ampo nagpapabilin nga nagkakaurosa".
Tumoo ngan karawata an plano han Dios para ha imo kinabuhi ngan balay. Abrihi an ganghaan han imo kasingkasing kan Kristo. "Niyan nga adlaw kon kamo mamati han iya tingug, diri niyo pagpatig-ahon an iyo mga kasingkasing" (Hebreo 3:7-8). An Ginoo naghuhulat ha pagbendisyon han imo kasingkasing ngan balay. Magbasol ha Iya ha bug-os mo nga kasingkasing ngan magin matinumanon. Maabot an usa ka nga adlaw aabrihan Niya an purtahan hito nga langitnon nga urukyan para ha imo, diin an kalipay ngan hingpit nga kamurayawan mag-aabiabi ha imo ha kadayonan.