An mga kasamok ngan problema aada ha ngatanan nga lugar. An sakit, kasubo, ngan damo nga karaotan upod bahin han kinabuhi. Diin ito nagtikang? Permi la ba ito sugad? An Biblia, an pulong han Dios, may-ada mga baton hini nga mga pakiana.
An siyahan nga Kapitulo ha Biblia nagsusumat mahitungod han makaruruyag nga hardin nga gintawag nga Eden. Ginlarang ito han Dios para mag-ukoy hira Adan ngan Eva. Ginhimo hira han Dios nga hingpit ngan waray sala. An Eden usa nga lugar han kamurayaw ngan kalipay. Waray mga problema o sakit. Makalilipay ngan makaruruyag gud ito nga lugar nga urukyan. Gintagan Niya hira han ngatanan nga mag-upay nga pagkaon tikang ha hardin. Ha butnga han hardin, Iya gintanom an kahoy han kaaram han maupay ngan maraot. Ginsidngan hira han Dios nga sigurado mamamatay hira kon kumaon hira han bunga hito nga kahoy.
Makasurobo, an kamurayawan ha hardin waray magpadayon. Usa ka adlaw an yawa, an kaaway han Dios, kinadto kan Eva ha porma han usa nga halas. Ginpakianhan niya hi Eva kon ginsidngan ba hira han Dios nga diri kumaon ha igindidiri nga kahoy. "Oo" nagsiring hi Eva, “siring han Dios mamamatay kami kun kumaon kami hito.” An halas binaton: “Diri kamo mapatay kon kumaon kamo hito nga kahoy; kondi kamo masusugad han mga Dios, nga maaram han kaupayan ngan han karaotan.” Han hi Eva kumita han bunga han kahoy, gin-unat niya an iya kamot ngan ginkuha ito. Maupay ito nga pagkaon, ngan ginhatag liwat niya ito kan Adan. Han dida gud nga nakakaon na hira, maaram hira nga may-ada problema. Nahadlok hira ha Dios. Han kinadto ha ira an Dios basi makiistorya, tinago hira tungod kay naawod hira han ira sala. Ginpakianhan hira han Dios kun nagtalapas ba hira han Iya sugo ngan ginsumatan hira mahitungod han mga problema nga permi nira maeksperyensyahan. An kasamok inabot ha kalibotan tungod han ira pagtalapas. An kakurian, sakit, ngan kamatayon upod na yana hit bahin han ngatanan nga kinabuhi dinhi ha kalibotan.
Han ginsidngan hira han Dios nga mamamatay hira kon diri hira magsugot, an Iya iginpapasabot amo an duha nga pisikal ngan espiritwal nga kamatayon. Ugsa han ira pagtalapas, putli hira ha kasingkasing ngan waray sala. Katapos nira magtalapas, nagin mahugaw an ira kasingkasing ngan makasasala hira ha pangitaan han Dios. Tikang hito nga panahon, ini nga espiritwal nga kamatayon inabot ha kada-usa nga tawo nga natawo. An kinaiya han tawo, an kalugaringon mismo han katawohan, nabag-o tikang ha putli ngan waray sala ngadto ha hakugnon ngan makasasala.
An Biblia nagsusumat ha aton ha Salmo 14:3 nga waray bisan hin-o nga nagbubuhat hin maupay. Ha Bag-o nga Testamento mababasa naton nga waray maopay ha aton makasasala nga kinaiya. Usahay karuyag naton magbuhat hin maopay, pero nagbubuhat kita hin maraot lugod. Ha iba nga mga panahon maaram kita nga diri kita angay magbuhat hin maraot, pero kulang kita hin gahum ha pagbuhat hin maopay, tungod han aton makasasala nga kinaiya [Roma 7:18-20].
Yana, damu nga mga tawo an diri malipayon tungod han ira makasasala nga kinaiya. An mga tawo hakugnon nga naruruyag buhaton an ira mga karuyagon. Damu an nagbubuwa, naglilimbong, ngan nangangawat. An iba nag-aaghat hin kasina ngan nag-uukoy ha kapaitan ngan kangalas, tungod nga diri hira mapinasayloon. Damu nga mga panimalay an naguba tungod han hakugnon ngan sala. Pamilyar ba ini ha imo? Naeksperyensyahan mo ba ini nga mga problema? May-ada kaba hini nga mga problema?
Diri ito usa nga waray paglaom nga kahimtang. An Dios may-ada urusahon nga plano para ha aton! Tungod han paghigugma han Diyos ha aton, Iya ginsugo an Iya Anak nga hi Jesus nga mamatay ha krus ngan magpas-an han sirot para han aton mga sala (Juan 3:16). Pinaagi han gahum han Dios, gindaog ni Jesus an kamatayon ngan nabanhaw tikang ha lubnganan. Tungod kay Hiya nabanhaw, makakadaog kita ha aton makasasala nga kinaiya kon makarawat naton an Iya halad para han aton mga sala.
Kinahanglan igtubyan naton an aton bug-os nga kinabuhi ha Dios upod an aton mga karuyagon ngan mga hingyap ngan maghangyo ha Iya ha pagtoo nga pasayloon an aton mga sala. Katapos ginpasaylo kita Niya ngan naginbag-o kita nga tawo! (2 Korinto 5:17)
An bag-o nga kahimtang han aton kasingkasing makikita ha aton panggawi ngan mga desisyon. Ugsa han pagpasaylo han Dios, nabulag kita ha Iya. Yana, kita an iya anak. An Biblia may-ada makaruruyag nga paagi ha pagsiring hini. “Dida hini nga paagi gintagan kita niya han gidadakoi ngan marahalon nga mga hatag nga iya iginsaad, basi pinaagi hini nga mga hatag makalikay unta kamo han nakakadaot nga kaipaon nga aanhi ha kalibutan, ngan makaangbit kamo han dyosnon nga kinaiya.” (2 Pedro 1:4). Ha dida nga hi Hesus nagpasaylo ha aton, Iya kita gintagan hin bag-o nga kasingkasing (Ezequiel 36:26) An diosnon nga kinaiya nag-uupod han gugma, kalipay, ngan kamurayawan nga iginbutang han Dios ha aton kasingkasing.
Magigin-iba gud an aton pagkita ha kinabuhi! Ginpipili naton nga mabuhi para kan Kristo, ngan an sala diri na nagmamando ha aton kinabuhi. An Dios nabulig ha aton nga higugmaon adton nagtratar ha aton ha maraot nga paagi, pasayloon adton nakapasakit ha aton, ngan magkaada gahum nga maginbuotan, mahigugmaon, ngan mapailubon. An mga balay nga waray hadto kalipay maginpuno hin kalipay ngan katumanan.
Ini nga pagbag-o diri nangangahulogan nga diri na gud kita maghihimo hin mga sayop, kundi mahimo naton dad-on ito ngadto ha Dios basi pasayloon. An Dios naghahatag ha aton hin gahum basi maatohan an pagsulay ngan madaog an sala. Igpapahimutang naton an mga panginahanglan ngan mga hingyap han iba labaw ha aton kalugaringon.
An plano han Dios ha pagsugo kan Jesus nganhi hini nga kalibotan basi mamatay ngan mabanhaw, siyahan amo an pagluwas ha aton, ngan paghatag ha aton hin gahum basi mag-ukoy nga malipayon ngan mapinasalamaton, ngan maginmapulsanon ha iba!