· An lalaki limningkod ha bangko han parke nga an iya ulo aada nasandig ha iya mga kamot. May-ada hiya masurub-on nga pamahongpahong. An iya marig-on nga mga butas ha pagtrabaho daan na nga ruba, ngan an tahi han iya mga jaket nagbibitay na. Nag-inusaan hiya hito nga adlaw han panahon han kathagkot.
· Ginkuha han daraga an iya lunch tray ngan nagkinita ha palibot. Hin-o an iya ikakaglingkod yana, o hin-o an maruyag makigkalingkod ha iya? Tungod kay nahadlok nga waray naruruyag ha iya, limningkod hiya ha lamesa ha kanto. Usa ka paghinga hin pagawas, usa nga pag-agham(groan) ha sulod, usa ka adlaw nga ligas la an natapos. Nabuhi hiya ha panagdumirian ngan pag-abuso,... siyahan tikang ha iya pamilya, yana tikang ha iya kasangkayan ngan mga kaeskwela. May-ada ba paagi hadto nga makalikay?
· Naglabay na an alas-dose han gab-i, katapos ala una, alas dos, alas tres na han aga samtang an lalaki nga nahigda waray hangaturog ha higdaan han hotel. Ha sulod hin pipira ka oras, ginlalaoman nga maglilipay hiya ha pag-entertain han kadam-an, magpapahayag han ira mga emosyon, ngan magpapahimulos han ira pagtawa ngan pag-admirar. Kondi kay ano nga diri na hiya nakakapahuway? Diri ini an paagi nga sadang mahitabo. Nakuha niya an kabantogan ngan bahandi pero waray hiya kamurayawan ha hunahuna.
· Nahigda hiya nga waray pagkikiwa, an kasakit nakit-an han iya agtang. Nagtikang ito, mga tuig na an naglabay an kawaray pan-abat ha iya mga tudlo han tiil, katapos ha iya mga tudlo ha mga kamot. Yana waray na gamit an iya mga butkon ngan mga tiil, ngan diri na gud hiya nakakakomunikar. Nag-ukoy hiya ha ilarom han mabug-at nga panluya.
Ano an katuyoan han kinabuhi? Kitaa, para ha usa nga nakakasabot ngan nagtatagad!
Ini ngan damu pa nga kahimtang an nahitatabo ha mga tawo han ngatanan nga nasyonalidad ngan kultura. Damu nga mga tawo, batan-on ngan lagas, an nag-aatubang hin mga sakit nga waray tambal. Kada tuig, damu an namamatay tungod han grabe nga sakit. An kakulang hin pagkaon, tubig, panapton, ngan igo nga urukyan amo gud nga mga kahimtang nga nakakaapekto ha minilyon nga tawo.
Damu nga mga tawo an nagdumiri ha Dios basi magkaada hin tunan-on nga mga relasyon ngan mga tumong nga kanan pisikal nga butang la. Nagpapabilin ini nga kawaray-pagpahuway ngan kawaray sulod han lawas ngan kalag. Urog nga ginbabasol han mga tawo an Dios tungod han ira mga problema. An napupukan nga mga hingyap, napapakyas nga mga pag asawa, kabungkagan ha pinansyal, pag-abuso, pagdumiri, droga, ngan de-alkohol nga irimnon nag-aaghat han depresyon ngan pag-unay nga pagpatay ha kalugaringon ha kalibotan yana.
Ha tinikangan an Dios naghimo hin hingpit o perpekto nga kalibotan. Malipayon nga Hiya may duok nga relasyon kan Adan ngan Eva, an siyahan nga mga tawo nga iya ginhimo. Ha waray pag-iha, hi Satanas, an kaaway han Dios, kinadto ha Hardin han Eden ngan ginsulay hira nga magtalapas ha Dios. Tungod han ira pagtalapas, nawara an ira pakig-upod ha Dios. Hi Satanas an hinungdan han sala ngan karat-an. Hi Jesus nagsiring mahitungod ha iya, "An kawatan diri makanhi, kondi ha pangawat, ngan pagpatay, ngan pagbungkag" (Juan 10:10). Ikaw ngan ako amo an mga tarhog han kasina ni Satanas, ngan karuyag niya bungkagon an aton lawas ngan kalag ha impyerno.
Hi Jesus an baton! Hiya an aton paglaom! Ginkuha Niya an aton mga sala tikada ha Iya ngahaw, nagpakamatay ha krus han Kalbaryo basi an aton relasyon ha Dios mahibalik. Ini nga bag-o nga relasyon ha Dios naghahatag ha aton hin paglaom. Hi Jesus nagsiring: "Ako nakanhi, basi hira magkaada
kinabuhi, ngan maada hira hin kahuraan. Ako amo an maopay nga paramangno: an maopay nga paramangno naghahatag han iya kinabuhi tungud han mga karnero" (Juan 10:10-11). Gin-aaghat ni Jesus an ngatanan nga mga tawo, "Kadi kamo ha akon, kamo ngatanan nga ginugul-an hin pagdara han iyo mabug-at nga mga paras-anon, ngan tatagan ko kamo hin pahuway" (Mateo 11:28).
Karuyag ni Jesus nga tumoo kita ha Iya. Ha dida nga nagbabasol kita ngan nagsusumat han aton sala, namamati an Dios ha aton mga pag-ampo. Ginpapasaylo kita Niya ngan gin-ampon ha iya pamilya. Ginbibendisyonan han Dios an iya mga anak pinaagi han nagpapadayon nga presensya han Baraan nga Espiritu. “Kay an Dios waray paghatag ha aton han espiritu han kahadluk; kondi han gahum, ngan han gugma, ngan han kaligdong” (2 Timoteo 1:7).
An pagpasaylo han Dios naghahatag ha aton hin kagawasan. An pagsarig ha Dios naghahatag hin kamurayawan ha aton kasingkasing ngan hunahuna. An kinabuhi nakakakarawat na hin bag-o nga kahulogan ngan katuyoan. Anoman an aton kahimtang ha kinabuhi, may-ada kita paglaom! Ini nga paglaom mabulig ha aton nga malamposan an mga bagyo ngan mga pagsari ha kinabuhi. “Naghuhulat han bulahan nga paglaum, ngan han mahimayaon nga pagpahayag han daku nga Dios ngan aton Manluluwas, nga hi Jesukristo” (Tito 2:13)