Napasaylo ka na ba? An imo waray kataposan nga tidaraon nadepende ha baton hini nga seryoso nga pakiana. An Biblia nagtututdo ha aton nga "waray tawo nga matadong, bisan usa man la" (Roma 3:10). An bersikulo 23 han amo gihapon nga kapitulo nasiring, "Kay an ngatanan nakasala, ngan nawad-an han himaya han Dios.” Kinahanglan makabiling kita han pagpasaylo han Dios kon karuyag naton matalwas tikang ha mga resulta han sala. Usa ka adlaw makikigkita kita ha Ginoo ha paghukom. "Kay kinahanglan kita ngatanan magpahayag ha atubangan han hukmanan ni Kristo; basi an tagsatagsa kumarawat han Iya ginbuhat ha Iya lawas, sugad han Iya ginbuhat, kon maopay ó maraot" (2 Korinto 5:10). Maatubang kita ha waray kataposan, ngan tungod hito importante nga hibaroan naton kon ginpasaylo ba kita. Kon mapasaylo kita, kakarawaton kita ha langit. Kon diri kita pasayloon, sisirotan kita ngadto ha impyerno nga waray kataposan upod han yawa ngan han iya mga anghel (Mateo 25:31-34, 41).
Pagpasaylo Pinaagi han Dugo ni Kristo
Salit, ano an mahihimo naton basi matalwas an aton kalag? Diri kita makakatalwas ha aton kalugaringon, kondi makakarawat naton an plano nga iginhatag han Dios para ha aton. Mabubuligan kita nga masabtan ini nga plano kon aton tagdon an Iya iginpakita ha Iya katawohan, ha mga Israelita, ugsa umabot hi Kristo. Ginsugo hira han Dios nga maghalad hin mga hayop. An mga karnero nga ginpatay nagtutudlok ha hingpit nga Kordero han Dios, hi Jesu-Kristo, nga magluluwas han ngatanan nga tawo pinaagi han pag-ula han Iya dugo para han ira mga sala. An pag-ula hin dugo nakabulig liwat ha katawohan nga masabtan an kabug-at han sala. An Efeso 1:7 nasiring, "Ngan ha Iya aada an aton paglukat, an pagpasaylo han aton mga sala".
"Kay hinbaroan niyo nga waray kamo paglukat hin mga butang nga may pagkadunot... kondi han hamili nga dugo ni Kristo, sugad hin karnero nga waray buring ngan waray hugaw" (1 Pedro 1:18-19). An aton pagpasaylo inabot pinaagi han kamatayon ni Kristo ngan han pag-ula han Iya dugo para han mga sala han tawo (Hebreo 9:22).
Tigamnan naton nga tungod han aton mga sala, naaangay kita han waray kataposan nga kamatayon. Kondi tungod han Iya gugma ngan kalooy ha aton, hi Jesus namatay imbes nga kita, salit mapapasaylo kita ngan an aton mga pagtalapas matatabonan.
An Diri Pagpasaylo Nagdadara hin Paguripon
Kon nakakaeksperyensya kita hit grasya hit pagpasaylo ni Jesus, nakakarawat kita hin kamurayaw. Basi matipigan ini nga kamurayawan, kinahanglan pasayloon naton an iba. Hi Kristo nagsusumat ha aton ha Mateo 6:14-15, "Kay kon kamo magpasaylo han mga tawo han ira mga kasaypanan, an iyo Amay, nga aadto ha langit, mapasaylo man ha iyo: Kondi kon diri kamo magpasaylo ha mga tawo han ira mga kasaypanan, diri man an iyo Amay mapasaylo han iyo mga kasaypanan."
Hi Jesus nagsumat hin istorya nga nagtututdo ha aton mahitungod han mga peligro han diri pagpasaylo. An istorya mahitungod han usa nga hadi nga karuyag mag-usisa han mga kuwarta han iya mga surugoon. Hin-agian niya an usa nga uripon nga nakautang ha iya hin damu hinduro nga kwarta, nga katugbang han mga suhol hin damu ka tuig. Ginsidngan han hadi an surugoon nga ibaligya hiya, an iya pamilya, ngan an ngatanan nga iya gintatag-iya. Nangaro hin kalooy an surugoon ngan ginpasaylo hiya han hadi han iya utang. Katapos, inagian han uripon an usa han iya igkasi-uripon nga nakautang ha iya hin gutiay nga kantidad, mga usa ka denario ha usa ka adlaw. Iya ginsidngan an iya igkasi-uripon nga kinahanglan niya baydan an bug-os nga utang. An iya igkasi-uripon naghangyo ha iya nga pasayloon hiya, kondi waray magpasaylo an iya igkasi-uripon. Han hinbatian ini han hadi, gintawag niya an iya surugoon. Hiya nagsiring, "Ginpasaylo ko ikaw han ginhangyo mo ako. Diri ba sadang mo liwat buhaton ito? Salit iginpapreso hiya han hadi tubtob nga mabaydan an utang. Katapos, hi Jesus nagsiring nga diri kita papasayloon han aton langitnon nga Amay kon diri kita nagpapasaylo ha iba. (Mateo 18:23-35)
An pagdumot ha usa, pagtipig hin kasina, o kangalas nagriresulta hin damu nga negatibo nga mga epekto. An tawo nga nag-aaghat hin sugad nga mga disposisyon ha iya kinabuhi nagigin miserable. Nag-aantos an iya kahimsog han iya lawas, sugad man an iya mga relasyon.
Kon diri kita nagpapasaylo ha iba, nagriresulta ito hin pagkauripon ha aton kalag nga mahimo ikompara ha pagkauripon han mga tawo o pagkaadik ha droga. Ini nga diri pagpasaylo nagriresulta hin kapaitan ha aton. Nagriresulta ito hin kasubo, kasina, ngan pag-away; nagsasatado ito han kalipay, gugma, ngan pakig-upod. Ini nga kapaitan resulta han mapahitas-on nga espiritu nga nangangalimbasog ha pagtipig han rekord ngan pagbulos tungod han ginhuhunahuna ngan tinuod nga mga sayop. Kon diri naton isasalikway an aton nasisina nga mga pagbati, ha urhi maghahadi ito ha aton. Magigin uripon kita ha ira sugad man ha pagkauripon han sala ha atubangan han Dios.
An Waray Kondisyon O Waray Kabalyo nga Pagpasaylo
Igintutdo ni Jesus nga an paagi la nga mapapasaylo naton an iba amo an paagi han pagpasaylo ha aton ni Jehova. Sadang naton pasayloon an nakasala ha aton, bisan kon ano gud an iya kahimtang, kon pira ka beses hiya nakasala, o kon ano gud an iya personalidad. Sadang naton ipakita an waray-kondisyon nga kalooy sugad han kalooy nga iginpakita ha aton han Dios. Kon mapainubsanon kita ngan nagpapasaylo ha iba, gin-aabrihan han Dios an dalan para ha aton nga mangaro hin pasaylo ha aton kalugaringon nga mga sayop ngan mga sala. An Dios bug-os nga nagpapasaylo ha ngatanan nga napahirani ha Iya nga mapainubsanon ngan mabinasulon nga espirito.
Samtang ginsusunod naton an Espiritu Santo, makikilala naton an kamatuoran, ngan an kamatuoran maghahatag ha aton hin kagawasan (Juan 8:32). An bersikulo 36 nasiring: "Kon an Anak magluwas ha iyo, kamo magluluwas gud".
"Hini nga adlaw kon kamo mamati han Iya tingug, diri niyo pagpatig-ahon an iyo mga kasingkasing" (Hebreo 3:15). Ha Mateo 11:28, hi Jesus nagsiring, "Kadi ha akon... ngan tatagan ko kamo hin pagpahuway". Samtang ginsusunod naton ini nga mga katutdoan, mapapasaylo kita ngan makakahimo ha pagpasaylo ha iba.
Pag-Abot Ha Dios
Yana an pakiana amo, paonan-o kita makakadto ha Dios? An baton aada ha Biblia. "Waray tawo nga makakanhi ha Akon, kon diri pag dad-on han Amay nga nagpakanhi ha Akon" (Juan 6:44). An Dios, pinaagi han Iya Baraan nga Espiritu, nagpapasabot ha aton nga makasasala kita ngan nagkikinahanglan hin Manluluwas. Usahay diri naton bug-os nga nasasabtan an pagtawag han Dios. Bangin magtikang kita ha pag-abat hin kawaray pulos, kamingaw ha aton kasingkasing - an panginahanglan hin usa nga butang, an inaabat nga diri kita sakto, an pagsarig nga nawara kita.
Kon nasasabtan naton ini nga kabaraka ha aton espiritu, kinahanglan abrihan naton an aton kasingkasing ha Dios para han giya. An pinas-an na sala magigin makuri hinduro, ngan an aton kasingkasing magigin mabidoon tungod han aton naglabay nga makasasala nga kinabuhi. Karuyag han Dios nga ihatag naton an aton kinabuhi ha Iya ha tuod nga pagbasol. Kon nakita han Dyos an aton mabinasulon ngan nasusubo nga kasingkasing ngan an aton pag-andam hin pagbuhat han Iya kaburut-on, ginpapasaylo Niya an aton naglabay nga makasasala nga kinabuhi, ngan nakakarawat kita hin pasaylo ngan kamurayaw (Salmo 34:18; Salmo 51:16-17). Oo, malipayon gud kita yana, ngan karuyag naton isumat ha iba an ginbuhat ni Kristo ha aton kasingkasing!
Ini nga kagawasan diri naabot pinaagi han panhunahuna han tawo. Ito an buhat han Espiritu Santo ha kasingkasing nga nagbabalhin ha aton ngadto ha bag-o nga kinabuhi. Pinaagi hini nga gahum han Espiritu Santo, may-ada kita pagtoo nga makakasarig ha Dios basi mahihimo naton an aton kalugaringon nga kaburut-on ngan mapasaylo an iba. 2 Korinto 5:17 nasiring, "Sanglit kon an bisan hin-o aada kan Kristo, bag-o hiya nga binuhat: an mga daan nga mga butang nag agi na; kitaa, an ngatanan nga mga butang ginhimo nga bag-o."
An paagi han Biblia ha pagpasaylo makaruruyag. An nasarig nga pagtoo ha halad ni Jesus, upod an bug-os nga pagpasakop ha Dios ngan ha Iya kaburut-on, nagpapara han pagkasad-an tikang ha aton kasingkasing. An aton mga sala bug-os nga natabonan han dugo ni Jesu-Kristo. An pagpasaylo nga iginhahatag ha aton han Dios nagpapara han aton mga sala ngan mga kasakitan. Iya ginpapara an aton mga sala, ngan diri ko na hinunumdoman an ira mga karat-an" (Hebreo 8:12). Makalilipay gud nga kagawasan an aton maeksperyensyahan kon ginpapasaylo han Dios an aton mga sala ngan mapasaylo naton an aton igkasi-tawo. Makakaeksperyensya ka liwat hini ha imo kasingkasing ngan kinabuhi. Kadi ha Ginoo yana nga adlaw!